ខេត្តកំពង់ស្ពឺ ៖ លោកជំទាវ ឌី សុខីទីឃាយុកោ ភរិយាលោក ហ៊ុន ម៉ានិត បានដឹកនាំក្រុមការងារកម្មវិធីផ្ទះទេវតាចុះទៅប្រគល់ផ្ទះទេវតាចំនួន០៣ខ្នងជាបន្តទៀតជូនដល់ទុរគតជន ចាស់ជរាគ្មានទីពឹងនៅខេត្តកំពង់ស្ពឺ នាព្រឹកថ្ងៃទី២០ ខែកញ្ញា ឆ្នាំ២០២០ ដែលពិធីនេះក៏មានការចូលរួមពីអាជ្ញាភូមិឃុំផងដែរ។ ពិធីប្រគល់ផ្ទះទេវតានេះដែរ លោកជំទាវបាននាំយកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងពីរតែងគិតគូរអំពីសុខទុក្ខដល់ពុកម៉ែ បងប្អូន ប្រជាពលរដ្ឋគ្រប់ទីកន្លែង។
លោកជំទាវបានមានប្រសាសន៍ឱ្យពុកម៉ែ បងប្អូនប្រជាពលរដ្ឋបង្កើនការយកចិត្តទុកដាក់ពីសុខភាពប្រចាំថ្ងៃ ជាពិសេសអនុវត្តការលាងដៃជាប់ជាប្រចាំ និងពាក់ម៉ាស់ផងដែរ ដើម្បីការពារជំងឺកូវីដ-១៩។ ១-ផ្ទះលេខ២៨៣ ប្រគល់ជូន ប្រាក់ នៅ មានអាយុ៧៥ឆ្នាំ រស់ភូមិគោល ឃុំមនោរម្យ ស្រុកថ្ពងខេត្តកំពង់ស្ពឺ ជាអំណោយរបស់លោក ហ៊ីវ គឹមហេង និងលោកស្រី លឹម ស្រីពៅ។ ២-ផ្ទះលេខ២៨៤ ប្រគល់ជូនមីង ជិន សម្បត្តិ មានអាយុ៦២ឆ្នាំ រស់នៅភូមិចំបក់ផ្អែម ឃុំមនោរម្យ ស្រុកថ្ពង ខេត្តកំពង់ស្ពឺ ជាអំណោយរបស់ លោក ហេង ណន និងលោកស្រី ហ៊ីវ រតនា។
៣-ផ្ទះលេខ២៨៥ ប្រគល់ជូនលោកយាយ ហ៊ុន ផាន មានអាយុ៧៨ឆ្នាំ និងលោកតា ហ៊ុន ហឿន មានអាយុ៧៦ឆ្នាំ រស់នៅភូមិចំបក់ស ឃុំរុងរឿង ស្រុកថ្ពង ខេត្តកំពង់ស្ពឺ ជាអំណោយរបស់លោក វណ្ណហុង និងលោកស្រី អ៊ឹមផាន វណ្ណឌី។ លោកយាយ លោកតា ដែលទទួលបានអំណោយផ្ទះខាងលើ ក៏បានទទួលអំណោយពីសម្តេចតេជោ និងសម្តេចកិត្តិព្រឹទ្ធបណ្ឌិតបន្ថែមទៀតរួមមានសម្ភារប្រើប្រាស់ក្នុងផ្ទះ គ្រឿងឧបភោគ-បរិភោគជាច្រើនមុខ និងថវិកាមួយចំនួន។
ក្នុងឱកាសនោះ លោកជំទាវ និងក្រុមការងារ ក៏បានចែកអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិត ជូនដល់លោកយាយ លោកតា និងក្មួយៗសិស្សានុសិស្សដែលបានចូលរួមអបអរសាទរពិធីប្រគល់ផ្ទះទេវតានេះដែរ អំណោយផ្តល់ជូនរួមមាន៖ សម្ភារសិក្សា, នំកញ្ចប់, សម្លៀកបំពាក់, ជែលលាងដៃ, សាប៊ូលាងដៃ និងថវិកាមួយចំនួន៕ ដោយ ៖ សុខ សារ៉ាយ
ចែករំលែកព័តមាននេះ