ខេត្តប៉ៃលិន ៖ សំរាមជាច្រើនការ៉ុងដែលត្រូវបានអាជីវករ និងប្រជាពលរដ្ឋយកទៅគរចោលរយៈពេលជាង១អាទិត្យទៅហើយបានបង្កជាក្លិនស្អុយអសោចិ៍ប៉ះពាល់ដល់សុខភាពផ្លូវដង្ហើមអ្នកបើកបរម៉ូតូចេញ-ចូលទៅមកក្នុងផ្សារក្រុងប៉ៃលិន។ ជាក់ស្តែងគេឃើញមានកាលពីព្រឹកថ្ងៃទី២១ ខែកញ្ញា ឆ្នាំ២០២០ នៅបរិវេណផ្សារសាមគ្គី ហៅប៉ាហ៊ី ស្ថិតក្នុងភូមិប៉ាហ៊ីជើង…
ខេត្តប៉ៃលិន ៖ សំរាមជាច្រើនការ៉ុងដែលត្រូវបានអាជីវករ និងប្រជាពលរដ្ឋយកទៅគរចោលរយៈពេលជាង១អាទិត្យទៅហើយបានបង្កជាក្លិនស្អុយអសោចិ៍ប៉ះពាល់ដល់សុខភាពផ្លូវដង្ហើមអ្នកបើកបរម៉ូតូចេញ-ចូលទៅមកក្នុងផ្សារក្រុងប៉ៃលិន។ ជាក់ស្តែងគេឃើញមានកាលពីព្រឹកថ្ងៃទី២១ ខែកញ្ញា ឆ្នាំ២០២០ នៅបរិវេណផ្សារសាមគ្គី ហៅប៉ាហ៊ី ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
បើតាមប្រភពព័ត៌មានពីបុរសម្នាក់ឈ្មោះ សារ៉េត អាយុ៥០ឆ្នាំ និងឈ្មោះ អូន អាយុ៥៣ឆ្នាំ រស់នៅក្បែរកន្លែងគេគរចោលសំរាមខាងលើ ដោយអត់មានក្រុមហ៊ុនដឹកយកទៅចោលនោះ បានរៀបរាប់ឱ្យដឹងថា ៖ នៅពេលមានខ្យល់បក់បោកមកពីគ្រប់ទិសម្តងៗ ធ្វើឱ្យពួកគាត់ដែលមានផ្ទះនៅក្បែរគំនរសំរាមនេះ ពិតជាមានការលំបាកទ្រាំខ្លាំងណាស់ ដោយស្អុយដូចគំរង់ខ្មោចសត្វងាប់ ស្ទើរក្អួតចង្អោរម្តងៗទៅហើយ ជាពិសេសពេលហូបអាហារម្តងៗស្ទើរតែចេញមកក្រៅវិញទាំងអស់ ។
គាត់បន្តទៀតថា កំទេចសំរាម ដែលគេដឹកយកទៅគរទុកចោលនៅក្នុងបរិវេណផ្សារ និងក្បែរផ្ទះរបស់គាត់ រួមមានដូចជា ៖ កំទេចបន្លែ កាកសំណល់ផ្ទះបាយ សំបកពងមាន់ ពងទា ឆ្អឹងគោ ឆ្អឹងជ្រូក ក្បាលត្រី ស្រកាត្រី រួមជាមួយនឹងកាកសំណល់បន្លែគ្រប់ប្រភេទផងដែរ ដោយពេលនេះក្លាយទៅជាដង្កូវតូចធំជាច្រើនវាររវើកគួរឱ្យខ្ពើម ។
គាត់បន្តទៀតថា ៖ សំរាមដ៏ច្រើនបែបនេះ ត្រូវគេគរទុកចោលតាំងពីមុនភ្ជុំបិណ្ឌមកម្ល៉េះ ដោយមិនឃើញក្រុមហ៊ុនដឹកសំរាមនាំគ្នាមកកើបយកទៅចោលឡើយ ។ ការទុកគរចោលសំរាមអស់រយៈពេលជាយូរថ្ងៃបែបនេះ ពិតជាប៉ះពាល់ខ្លាំងណាស់ដល់អាជីវករលក់ដូរក្នុងផ្សារ នៅក្បែរផ្សារ និងប្រជាពលរដ្ឋ ព្រមទាំងភ្ញៀវទេសចរដែលចូលមកលេងកម្សាន្តក្នុងខេត្តប៉ៃលិន ក៏អាចប៉ះពាល់ដល់ផ្លូវដង្ហើមផងដែរ ។
ចំណែកអ្នកភូមិប៉ាហ៊ីជើង ក៏បានរិះគន់ផងដែរថា គួរតែមេការក្រុមហ៊ុនសំរាម ដឹកយកទៅចាក់ចោលនៅកន្លែងទីលានចាក់សំរាមឱ្យបានញឹកញាប់ កុំទុកយូរពេក ព្រោះរាល់ថ្ងៃនៅក្នុងខេត្តប៉ៃលិន មានរថយន្តអនាម័យដឹកសំរាមជាច្រើនគ្រឿងដែរ គួរតែយកទៅបោះចោលនៅទីនោះរយៈពេល២ទៅ៣ថ្ងៃម្តង ទើបមិនបង្កផលប៉ះពាល់សុខភាពផ្លូវដង្ហើម ។ ជាពិសេសការទុកចោលសំរាមគ្មានសណ្តាប់ធ្នាប់បែបនេះ ធ្វើឱ្យប៉ះពាល់ដល់បរិស្ថាន និងខូចសោភ័ណភាពក្រុងផងដែរ។
ពាក់ព័ន្ធទៅនឹងបញ្ហាសំរាមខាងលើនេះ លោក ស៊ុន យី អភិបាលក្រុងប៉ៃលិន បានឱ្យដឹងថា ខាងលោកអត់ទាន់ដឹងរឿងនេះទេ ចាំប្រាប់មន្ត្រីក្រោមឱវាទឱ្យចុះពិនិត្យ និងទាក់ទងទៅមេការក្រុមហ៊ុនដឹកសំរាម ឱ្យដឹកយកចាក់ចោលនៅទីលានចាក់សំរាម ៕
ចែករំលែកព័តមាននេះ