វី ឌីណែត និង ឈីន រតនៈ ប្រជែងគ្នាខ្លាំង ដើម្បីពានវគ្គ២ លើកនេះកាន់តែល្អមើលហើយ
- ភ្នំពេញ
រាជធានីភ្នំពេញ ៖ បើយោងទៅលើតួលេខនៃការផ្ញើសារបស់មហាជន ដែលបានគាំទ្រតារាចម្រៀងសំណព្វចិត្តរបស់ពួកគេឃើញថា រវាង វី ឌីណែត និង ឈីន រតនៈ…
រាជធានីភ្នំពេញ ៖ បើយោងទៅលើតួលេខនៃការផ្ញើសារបស់មហាជន ដែលបានគាំទ្រតារាចម្រៀងសំណព្វចិត្តរបស់ពួកគេឃើញថា រវាង វី ឌីណែត និង ឈីន រតនៈ មានតួលេខផ្ញើសារប្រកិតគ្នាប៉ុន្មានសប្តាហ៍នេះ។ ពួកគេកំពុងតែក្លាយជាខ្លាកំណាចប្រកួតប្រជែងយុទ្ធគុន នៅក្នុងកម្មវិធី I am a Single Cambodia វគ្គ២ ដែលឈានមកដល់វគ្គផ្តាច់ព្រ័ត្រ ហើយកាន់តែល្អមើល។
បើនិយាយពី វី ឌីណែត វិញ ធ្លាប់ចូលប្រឡងកម្មវិធីខាងលើនេះម្តងរួចទៅហើយកាលពីឆ្នាំមុន ប៉ុន្តែមិនមានភាពជោគជ័យឡើយ ។ នេះជាការតាំងចិត្តលើកទី២ ហើយនាងអាចរក្សា ជំហ៊ានបោះពួយទៅមុខពីមួយវគ្គទៅមួយវគ្គយ៉ាងរលូន។ ជាពិសេសបើពិនិត្យលើការប្រកាសលទ្ធ ឌីណែត បើមិននៅលេខរៀងទី១ ឬក៏ត្រឹមទី២ដែរ។ ជាការល្អពេលនេះ ឌីណែត បានចូលដល់វគ្គផ្តាច់ព្រ័ត្រ ដោយក្នុងចំណោមបេក្ខជន៧រូប នាងឈរលើសំឡេងសារនាំមុខគេលំដាប់ទី១។
ចំណែក ឈីន រតនៈ វិញ នាងទើបតែមកប្រឡងកម្មវិធីនេះដំបូងទេ ក្រោយក្លាយជាអ្នកចម្រៀងលេចធ្លោ។ ជាមួយសំឡេងល្អឆ្វាច រតនៈ ពិតជាបានបង្កភាពភ្ញាក់ផ្អើល ក្រោយពេលបទចម្រៀងនាងមួយៗ មានភាពលំបាកធ្វើ ហើយបើមិនមានតិចនិចច្រៀងនោះ គឺទៅមិនរួចឡើយ។ រីឯការផ្ញើសារវិញ ខ្លះបានលេខ១ និងខ្លះទៀតបានលេខ២ ធ្វើឱ្យដៃគូ មិនអាចមើលស្រាលបានឡើយ។
ចាំមើលមើល៍! នឹងមានអ្វីប្រែប្រួលទៀត បើម្នាក់ៗមានភាពទាក់ទាញដូចគ្នា ហើយរំពឹងលើភាពវ័យឆ្លាត និងសមត្ថភាពប៉ុណ្ណោះ។ លើសពីនេះ ក៏មិនអាចមើលរំលងបេក្ខជនតារាចម្រៀងផ្សេងទៀតបានដែរ ព្រោះសុទ្ធតែមានហ្វេនៗគាំទ្រដូចៗគ្នា។
គួររបញ្ជាក់ថា វី ឌីណែត គឺជាកូនស្រីរបស់លោក ហួរ ឡាវី ដែលបច្ចុប្បន្នជាគ្រូបង្ហាត់ចម្រៀង និងជាតារាចម្រៀង។ ឌីណែត ចេះច្រៀងតាំងពីនៅវ័យកុមារភាព ដោយទទួល បានការហ្វឹកហាត់ពីលោកប៉ាយ៉ាងផុសផុល យល់ដឹងច្រើនពីបច្ចេកទេសប្រើសំឡេង។ ម្ល៉ោះហើយគ្រប់ប្រភេទបទចម្រៀង មិនថាខ្មែរ ឬភាសាអង់គ្លេស វី ឌីណែត ធ្វើបានល្អគួរឱ្យចាប់អារម្មណ៍។ ផ្សំជាមួយបទពិសោធន៍ ដែលនាងឆ្លងកាត់ផងនោះ រឹតតែរុញឱ្យខ្លាំងបាន។
គួរបញ្ជាក់ទៀតថា ចំណែកឯ ឈីន រតនៈ វិញ ធ្លាប់ហាត់រៀននៅសាលាវិចិត្រសិល្បៈ បានមួយរយៈ។ គ្រូរបស់នាង គឺការច្រៀងតាមហាងយប់ឡើង ដែលផ្តល់គន្លឹះឱ្យនាងធ្វើបានពីមួយថ្ងៃទៅមួយថ្ងៃ។ រតនៈ មានសំឡេងខ្លាំងល្អ ហើយអាចស្រែកច្រៀងបទតឹងៗបាន នេះជាចំណុចពិសេសមួយ។ ជាពិសេសការប្រើសំឡេងក្រោមៗ ច្បាស់ពាក្យពេចន៍ មិនបន្លំ។ អ្នកខ្លះថា នាងមានសំឡេងស្រដៀង មាស សុខសោភា ។ រតនៈ ក៏ធ្លាប់ឆ្លងកាត់ការប្រឡង ចម្រៀងធំមួយនៅហង្សមាស រហូតជុំផ្តាច់ព្រ័ត្រផងដែរ។ នាងស្រូបបានភាពល្បីល្បាញយ៉ាងលឿន ក្រោយប្រឡង ព្រោះតែមានសំឡេងល្អ មានសម្រស់ស្អាត និងសមត្ថភាពពូកែ ដូចជាក្បាច់រាំជាដើម។
ចែករំលែកព័តមាននេះ