រំដោះអ្នកទេសចរជាង១ពាន់នាក់ជាប់គាំងលើកោះរ៉ុងត្រឡប់មកដីគោកវិញហើយ
- ព្រះសីហនុ
ខេត្តព្រះសីហនុ ៖ នៅថ្ងៃទី២០ ខែកញ្ញា ឆ្នាំ២០២០ លោក គួច ចំរើន អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត…
ខេត្តព្រះសីហនុ ៖ នៅថ្ងៃទី២០ ខែកញ្ញា ឆ្នាំ២០២០ លោក គួច ចំរើន អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត បានដឹកនាំបញ្ជាផ្ទាល់ក្នុងកិច្ចអន្តរាគមន៍ដឹកជញ្ជូនភ្ញៀវទេសចរណ៍ដែលជាប់គាំងនៅក្រុងកោះរ៉ុង រយៈពេល៣ថ្ងៃកន្លងមកហើយ ដោយសារតែឥទ្ធិពលព្យុះទី១១ ឈ្មោះ «នូល» ដែលបង្កឱ្យមានភ្លៀង ខ្យល់កន្ត្រាក់ និងរលកសមុទ្រខ្ពស់ៗមិនអាចឱ្យទូក កាណូត ឬអូប៊័រ ធ្វើដំណើរនៅលើផ្ទៃសមុទ្របាន។
ក្នុងប្រតិបត្តិការខាងលើនេះ គឺបានចាប់ផ្តើមធ្វើឡើងនៅម៉ោង១០ព្រឹក រហូតដល់ម៉ោង៣និង៣០នាទីរសៀលថ្ងៃទី២០ ខែកញ្ញា ដោយបានប្រើប្រាស់កាណូតល្បឿនលឿនចំនួន១៨គ្រឿង ចេញទៅដឹកជញ្ជូនភ្ញៀវចំនួន២៦ជើង។ ហើយភ្ញៀវទេសចរដែលជាប់នៅលើកោះករ៉ុងមានចំនួនសរុប ១៣៩១នាក់ ក្នុងនោះស្រី៥៩៥នាក់ និងក្មេងអាយុក្រោមអាយុ១៥ឆ្នាំមានចំនួន១០៩នាក់ ។
ក្នុងនោះមានភ្ញៀវបរទេសចំនួន៣៧៣នាក់ ស្រី១៥៤នាក់ ដែលជាប់នៅលើកោះ ដោយសារតែព្យុះនេះ និងត្រូវបានដឹកជញ្ជូនតាមកាណូតល្បឿនលឿន មកកាន់ដីគោកវិញប្រកបដោយសុវត្ថិភាព ក្រោមការចូលរួមសហការពីរដ្ឋបាលក្រុងកោះរ៉ុង រដ្ឋបាលក្រុងព្រះសីហនុ កងកម្លាំងមានសមត្ថកិច្ច មន្ទីរអង្គភាពពាក់ព័ន្ធ វិស័យឯកជន និងសមាគមទូកទេសចរណ៍ខេត្តព្រះសីហនុផងដែរ។
លោក គួច ចំរើន អភិបាលខេត្តព្រះសីហនុ អមដំណើរដោយមន្ត្រីអង្គភាពពាក់ព័ន្ធបានអញ្ជើញទៅពិនិត្យ និងទទួលភ្ញៀវទេសចរដែលត្រឡប់មកពីកោះរ៉ុងវិញដោយផ្ទាល់នៅចំណតផែរ៉ូយ៉ាល់ ជិតកំពង់ផែក្រុងព្រះសីហនុ ក្នុងនោះក៏មានក្រុមគ្រូពេទ្យពីមន្ទីរពេទ្យបង្អែកខេត្តមកពិនិត្យសុខភាព និងរង់ចាំជួយសង្គ្រោះផងដែរ។
លោកអភិបាលខេត្តបានមានប្រសាសន៍ថា អ្នកទេសចរណ៍ច្រើនរាប់ពាន់នាក់បានធ្វើដំណើរទៅលេងកោះរ៉ុងមុនថ្ងៃដែលមានភ្លៀងធ្លាក់ ខ្យល់កន្ត្រាក់ និងរលកខ្លាំង និងក្រោយមកក៏បានជាប់គាំងនៅលើកោះមិនអាចត្រឡប់មកវិញបាន ព្រោះតែនៅតំបន់សមុទ្ររងនូវឥទ្ធិពលព្យុះទី១១ ឈ្មោះ «នូល» ដែលបង្កឱ្យមានភ្លៀងធ្លាក់ ខ្យល់កន្ត្រាក់ រលកសមុទ្រខ្ពស់ៗផងដែរ។
ដោយពិនិត្យឃើញថា ថ្ងៃទី២០ កញ្ញានេះ គឺចន្លោះពេលធាតុអាកាសធូរស្រាលបានបន្តិច ទើបក្នុងពេលរសៀលរដ្ឋបាលខេត្តចាត់វិធានការជួយដោះស្រាយដឹកយកបងប្អូនអ្នកទេសចរណ៍ទាំងអស់នោះមកកាន់ដីគោកក្នុងក្រុងព្រះសីហនុវិញ ហើយដំណើរការនេះប្រកបដោយសុវត្ថិភាព។
ចែករំលែកព័តមាននេះ