ខេត្តសៀមរាប ៖ ប៉ូលិសស្រុកស្វាយលើបានអះអាងប្រាប់នៅថ្ងៃទី២០ ខែកញ្ញា ឆ្នាំ២០២០នេះថា ក្មេងប្រុសស្រីចំនួន២ នាក់បងប្អូននឹងបង្កើតគ្នាបានលង់ទឹកស្រះ បណ្តាលឱ្យបាត់បង់ជីវិត ខណៈដើរទៅលេងផ្ទះជីតាដែលមានចម្ងាយពីផ្ទះឪពុកម្តាយប្រហែល៤០ម៉ែត្រពីគ្នា ហើយហួសទៅក្រោយផ្ទះជីតាក៏ចុះទឹកលេងស្រះ បណ្តាលឱ្យលង់ទាំង២នាក់ បង្កការភ្ញាក់ផ្អើលកាលពីម៉ោង៣និង៣០នាទីរសៀល ថ្ងៃទី១៨ ខែកញ្ញា ឆ្នាំ២០២០ ស្ថិតនៅភូមិត្រព្រាំងពពេល ឃុំតាសៀម ស្រុកស្វាយលើ ។
ប្រភពពីប៉ូលិសបានបញ្ជាក់ថា ក្មេងរងគ្រោះទាំង២នាក់ខាងលើមា ១- ឈ្មោះ វី សុវណ្ណរ៉ា ភេទប្រុស ឣាយុ៤ឆ្នាំ និង២- ឈ្មោះ វី សារ៉ា ភេទស្រី ឣាយុ៣ឆ្នាំ មានឪពុកឈ្មោះ វី សុវណ្ណា អាយុ៣០ឆ្នាំ និងម្តាយឈ្មោះ សាយ ស្រីណុគ ឣាយុ៣១ឆ្នាំ រស់នៅភូមិ-ឃុំកើតហេតុខាងលើ។
សមត្ថកិច្ចបន្តទៀតថា ចំពោះមូលហេតុ គឺខណៈពេលដែលឪពុកម្តាយនៅផ្ទះ ក្មេងរងគ្រោះទាំងពីរនាក់បានទៅលេងផ្ទះជីតានៅខាងកើតផ្ទះរបស់ខ្លួនដែលមានចម្ងាយប្រហែល ជា៤០សិបម៉ែត្រពីគ្នាប៉ុណ្ណោះ។ លុះដល់ម៉ោងកើតហេតុ ម្តាយក៏មកសួររកកូននៅផ្ទះជីតា តែតាថា ចៅទៅវិញហើយ ។ គ្រានោះម្តាយក្មេងស្រីខំមករកកូនទាំង២នាក់នៅផ្ទះផ្សេងទៀត ប៉ុន្តែនៅតែរកមិនឃើញឡើយ ក៏បង្កឱ្យមានការផ្អើលឆោឡោ រួចក៏នាំគ្នាដើររក។
ក្រោយមក ដោយមានការសង្ស័យទៅលើស្រះទឹកដែលនៅជិតផ្ទះមានចម្ងាយ៦០ម៉ែត្រពីផ្ទះ ក៏នាំគ្នារចុះរាវរកឃើញ ស្រាប់តែប្រទះឃើញក្មេងរងគ្រោះទាំង២នាក់តែម្តង និងបាននាំយកទៅកាន់មណ្ឌលសុខភាពកន្ទួត តែជាអកុសលក្មេងទាំងពីរនាក់បានបាត់បង់ជីវិតទៅហើយ៕
ចែករំលែកព័តមាននេះ