ខេត្តកណ្ដាល ៖ បើតាមសេចក្តីរាយការណ៍បានឲ្យដឹងថា មានករណីចោរគាស់ផ្ទះលួចយកទ្រព្យសម្បត្តិ មាសប្រាក់ លុយកាក់ប្រមាណជាង២ម៉ឺនដុល្លារអាមេរិក ខណៈម្ចាស់ផ្ទះចេញដើរលេងពិធីបុណ្យភ្ជុំបិណ្ឌដល់ខេត្តមណ្ឌគិរី ។
សេចក្តីរាយការណ៍បន្តថា ជនរងគ្រោះជាម្ចាស់ផ្ទះខាងលើឈ្មោះ សួន ចន្ថា ភេទស្រី អាយុ ៤៧ឆ្នាំ មុខរបរលក់សំបក់កង់រថយន្ត គ្រឿងបន្លាស់រថយន្ត ប្ដូរប្រេងម៉ាស៊ីនគ្រប់ប្រភេទ និងវេលុយទ្រូម៉ានី ដែលមានទីតាំងស្ថិតក្នុងភូមិដើមត្រាំង ឃុំអន្លង់រមៀត ស្រុកកណ្ដាលស្ទឹង ខេត្តកណ្ដាល ។
តាមការអះអាងពីម្ចាស់ផ្ទះបានប្រាប់សមត្ថកិច្ចឱ្យដឹងថា សម្ភារៈដែលបាត់បង់រួមមាន ៖ ១.ប្រាក់ដុល្លារ ៦.០០០ ដុល្លារអាមេរិក, ២.ប្រាក់រៀល ១៦.០០០.០០០ រៀល, ៣.ខ្សែ.កលោហៈធាតុពណ៌លឿងដាំពេជ្រ១ខ្សែ មានតម្លៃ ៦.០០០ដុល្លារ, ៤.ខ្សែ.កលោហៈធាតុពណ៌ ស ១ឈុត តម្លៃ១.៣៥០ដុល្លារ, ៥.ខ្សែដៃលោហៈធាតុ ពណ៌លឿង១ខ្សែ តម្លៃ១.០០០ដុល្លារ,៦.ចិញ្ចៀនលោហៈធាតុ ពណ៌លឿង ដាំពេជ្រ១វង់ មានតម្លៃ ១.០០០ដុល្លារ, ៧.បណ្តោងខ្សែ.ក តម្លៃ១០០ដុល្លារ, ៨.ខ្សែ.កលោហៈធាតុពណ៌លឿង ២ខ្សែ តម្លៃ ២.០០០ ដុល្លារ, ៩.ចិញ្ចៀនលោហៈធាតុ ពណ៌លឿង ដាំពេជ្រ១វង់ តម្លៃ៦០០ដុល្លារ, ១០.បណ្តោងខ្សែ.កគុជខ្យង១ តម្លៃ៥០០ដុល្លារ និង១១.បណ្តោងខ្សែ.កលោហៈធាតុ ពណ៌ស ១ មានតម្លៃ២៥០ដុល្លារ ។ ដែលសរុបជាទឹកប្រាក់គឺ ១៨.៨០០ ដុល្លារអាមេរិក និងប្រាក់រៀល ១៦.០០០.០០០រៀលឯណោះ ។
ចំណែកវត្ថុតាងដែលត្រូវសមត្ថកិច្ចចាប់យកបានរួមមាន ៖ ១.កាំបិតបុ័ងតោដងឈើផ្លែដែក ប្រវែង៣០សង្ទីម៉ែត្រ, ២.កាំបិតបុ័ងតោដងជ័រផ្លែដែកប្រវែង៣០សង្ទីម៉ែត្រ, ៣.សោរ៣គ្រាប់, ៤.ដែកដាប់ចំនួន១ និង៥.មេសោចំនួន៣ (ខូចរប៉ើក) ទៀតផង ។
ម្ចាស់ផ្ទះខាងលើបន្តថា មុនពលកើតហេតុ កាលពីម៉ោង៧ព្រឹក ថ្ងៃទី១៥ ខែកញ្ញា ពួកគាត់ និងក្រុមគ្រួសារបាននាំគ្នាចេញដំណើងដើរលេងកំសាន្តនៅខេត្តមណ្ឌលគីរី រយៈពេល៣ថ្ងៃក្នុងពិធីបុណ្យភ្ជុំបិណ្ឌ លុះដល់ថ្ងៃទី១៨ កញ្ញា វេលាម៉ោង៥និង៤០នាទីព្រឹក ខណៈពេលសមត្ថកិច្ចបុស្តិ៍នគរបាលរដ្ឋឃុំអន្លង់រមៀត បានចេញល្បាតតាមដងផ្លូវក៏ឃើញទ្វាររបងមុខផ្ទះរប៉ើក ក៏មានការសង្ស័យ ទើបឈប់មើល ហើយក៏បានទូរស័ព្ទប្រាប់រូបគាត់ថា មានចោរ គាស់ផ្ទះ ។
ម្ចាស់ផ្ទះបន្តថា ភ្លាមៗនោះ រូបគាត់ជាជនរងគ្រោះបានតេប្រាប់ប្អូនប្រុសឈ្មោះ សួន គឹមសុង ឲ្យទៅមើលជាមួយសមត្ថកិច្ចប៉ុស្តិ៍នគរបាលរដ្ឋឃុំអន្លង់រមៀត ទើបដឹងថា មានចោចូលគាស់ផ្ទះលួចយកលុយកាក់ និងសម្ភារៈពិតប្រាកដមែន ។ ភ្លាមនោះផងដែរ កម្លាំងប៉ុស្តិ៍នគរបាលរដ្ឋបាល ក៏បានធ្វើការហ៊ុមព័ទ្ធកន្លែងកើតហេតុរួច ក៏រាយការណ៍ទៅផ្នែកជំនាញឲ្យចុះទៅពិនិត្យ ដើម្បីធ្វើការស្រាវជ្រាវ និងស៊ើបអង្កេតតាមនីតិវិធី ៕
ចែករំលែកព័តមាននេះ