លោកមហាសេដ្ឋីវ៉ារេន បាហ្វេត (Warren Buffett) គឺជាវិនិយោគិនដ៏ជោគជ័យមួយរួប និងជាអ្នកគាំទ្រការអភិវឌ្ឍន៍ខ្លួនដែលពោរពេញទៅដោយដំបូន្មានល្អៗ ដើម្បីចែករំលែកដល់អ្នកដទៃផងដែរ។ ដំបូន្មានដ៏មានតម្លៃមួយ ជាពិសេសក្នុងពេលដែលពិភពលោកកំពុងតែប្រឈមមុខនឹងកូវីដ ១៩…
លោកមហាសេដ្ឋីវ៉ារេន បាហ្វេត (Warren Buffett) គឺជាវិនិយោគិនដ៏ជោគជ័យមួយរួប និងជាអ្នកគាំទ្រការអភិវឌ្ឍន៍ខ្លួនដែលពោរពេញទៅដោយដំបូន្មានល្អៗ ដើម្បីចែករំលែកដល់អ្នកដទៃផងដែរ។ ដំបូន្មានដ៏មានតម្លៃមួយ ជាពិសេសក្នុងពេលដែលពិភពលោកកំពុងតែប្រឈមមុខនឹងកូវីដ ១៩ នេះគឺ «ក្នុងពិភពអាជីវកម្ម មនុស្សដែលជោគជ័យជាងគេ គឺជាមនុស្សដែលធ្វើអ្វីដែលខ្លួនស្រលាញ់»។
តើអ្នកមានដែលគិតពីវាទេ ខណៈដែលខិតខំប្រឹងប្រែងធ្វើការជារៀងរាល់ថ្ងៃ? មនុស្សជាច្រើនបានព្យាយាមខិតខំធ្វើការរហូតលាយឡំជាមួយនឹងពេលសម្រាក និងពេលទុកចំណាយជាមួយក្រុមគ្រួសារ ខណៈដែលនៅតែមិនអាចរកចំណូលបានគ្រប់គ្រាន់ក្នុងការប្តូរយកជីវភាពធូរធាដដែល។
ប៉ុន្តែផ្នត់គំនិតនេះ នឹងផ្លាស់ប្តូរ ប្រសិនបើអ្នកពិតជាស្រលាញ់ការងារ និងមនុស្សដែលអ្នកធ្វើការជាមួយពិតមែន។
លោកធីម ឃុក (Tim Cook) ដែលជានាយកប្រតិបត្តិរបស់ Apple ក៏បានផ្តល់ដំបូន្មាននេះដែរ និងបានអះអាងថា វាជាអ្វីដែលបង្កឲ្យលោកជោគជ័យដូចសព្វថ្ងៃ។ យោងទៅតាមលោក ឃុក បានឲ្យដឹងទៀតថា មូលហេតុដែលមនុស្សជាច្រើនមិនចូលចិត្តការងាររបស់ខ្លួន គឺមកពីពួកគេមិនទាន់រកបានអ្វីដែលខ្លួនស្រលាញ់ពិតប្រាកដ និងអ្វីដែលអាចធ្វើឲ្យពួកគេជួយដល់អ្នកដទៃបាន។
ហើយការរកបានការងារទាំងនេះ គឺជាកត្តាសំខាន់មួយដែលធ្វើឲ្យមនុស្សទទួលបានជីវិតដែលស្កប់ស្កល់ និងមានសុភមង្គល។ ពេលដែលអ្នកមានសុភមង្គល អ្នកនឹងមានទឹកចិត្តក្នុងការខិតខំប្រឹងប្រែងបន្ថែមលើការងារផងដែរ។
ពេលដែលអ្នកស្រលាញ់ការងាររបស់អ្នក អ្នកមានចិត្តចង់ធ្វើការព្រោះអ្នកជឿជាក់លើអ្វីដែលអ្នកកំពុងតែធ្វើ និងឥទ្ធិពលដែលការងាររបស់អ្នកអាចជះលើអ្នកដទៃដែលអ្នកព្យាយាមជួយ និងបម្រើ។ លើសពីនេះទៅទៀត ពេលដែលអ្នកស្រលាញ់ការងាររបស់អ្នក វាមិនត្រឹមតែជាការងារទៀតឡើយ។ តែវាប្រៀបបានជាអ្វីដែលជំរុញទឹកចិត្តអ្នកឲ្យក្រោកពីដំណេកជារៀងរាល់ថ្ងៃទៅវិញ។
ចែករំលែកព័តមាននេះ