ដោយផ្អែកលើបទពិសោធន៍ក្នុងការដាំស្វាយកែវ រមៀតរបស់កសិករម្នាក់ និងតាមរយៈការអានឯកសារផ្សេងៗ យើងខ្ញុំសូមលើកយកមកបង្ហាញដូចខាងក្រោម ៖
១-ការជ្រើសរើសទីតាំង ៖ គាត់ជ្រើសរើសទីតាំងដាំនៅតាមភ្លឺស្រែ ព្រោះជាដីធូរសំបូរដោយជីជាតិ និងជិតប្រភពទឹក ដែលអាចឱ្យស្វាយមានការលូតលាស់លឿន ។
២-ការរៀបចំរណ្ដៅ និងការដាក់ជី ៖ ក្នុងការដាំ ត្រូវជីករណ្ដៅជំរៅ៧តឹក និងទំហំ៧តឹកបួនជ្រុង ។ បន្ទាប់មកទុករណ្ដៅ ហាលចោលរយៈពេលពី២ទៅ៣ថ្ងៃ ដើម្បីសំលាប់មេរោគ ។
ចំពោះការដាក់ជីគាត់រៀបជាស្រទាប់ដូចខាងក្រោម ៖
-ស្រទាប់ទី១ ៖ នៅបាតរណ្ដៅដាក់កំបោរ ចំនួន២ស្លាបព្រា ឬដាក់ប្រេងម៉ាស៊ីន ដើម្បី ការពារកណ្ដៀរ
-ស្រទាប់ទី២ ៖ ដាក់កំទេចកំទីចំបើងមិន ទាន់រលួយកំរាស់ចំនួន១តឹក
-ស្រទាប់ទី៣ ៖ ដាក់អាចម៍គោក្រៀម ដែលពុកផុយកំរាស់ចំនួន១តឹក
-ស្រទាប់ទី៤ ៖ ដាក់ជីធម្មតា (ដី ស្រទាប់លើ) ចំនួន១តឹក
-ស្រទាប់ទី៥ ៖ ដាក់ចំបើងលាយជាមួយ ស្លឹកឈើ អង្កាម សំដីស្រូវកំរាស់ចំនួន១តឹក និងរោយកំបោរចំនួន១ ស្លាបព្រា ដើម្បី សំលាប់កណ្ដៀរ និងធ្វើឱ្យដីឆាប់រលួយចូល គ្នា
-ស្រទាប់ទី៦ ៖ ដាក់អាចម៍គោម៉ដ្ឋៗ លាយជាមួយដីធម្មតាកំរាស់ចំនួន២,៥តឹក ។
បន្ទាប់ពីដាក់ជីរៀបជាស្រទាប់រួចហើយ ទុករយៈពេល១៥ថ្ងៃ ដើម្បីឱ្យជីពុកផុយ ទើប យកកូនស្វាយមកដាក់ដាំ ។ ការដាំចាប់ផ្ដើម ដាំនៅដើមរដូវវស្សា ឬនៅខែកក្កដា ព្រោះវា ធ្វើឱ្យស្វាយលូតលាស់ល្អ និងមិនសូវពិបាក ក្នុងការស្រោចទឹក ។
៣-ការថែទាំ ៖ នៅឆ្នាំទី១ គាត់បានកាប់ដីជុំវិញដើម ដោយមានចំងាយពីគល់ប្រហែលជា១តឹក បន្ទាប់មកយកអាចម៍គោក្រៀមមកដាក់ក្នុង រណ្ដៅ (ដោយមិនកំណត់) ហើយស្រោចទឹក រយៈពេល៣ទៅ៥ថ្ងៃម្ដង (នៅរដូវប្រាំង) ។ នៅឆ្នាំទី២ ទី៣ គាត់មិនបានធ្វើការដាក់ជី បំប៉នបន្ថែមទៀតទេ ដោយគាត់គិតថា ឫស របស់វាអាចមានលទ្ធភាពគ្រប់គ្រាន់ក្នុងការ ស្រូបយកជីជាតិបាន ។ ចំណែកឯបញ្ហាសត្វ ល្អិតវិញ តាមការសង្កេតកន្លងមក មិនឃើញ មានការបំផ្លាញទេ ហើយសូម្បីតែសត្វក្រាក៏ គ្មានដែរ ។
៤-ការប្រមូលផល ៖ ក្រោយពេលដាំអស់រយៈពេល៣ឆ្នាំ ស្វាយចាប់ផ្ដើមផ្លែ ។ ប៉ុន្ដែការផ្លែនៅលើកទី ១នេះ ទិន្នផលដែលទទួលបានមានកំរិតទាប នៅឡើយ ជាមធ្យម៥-១០ផ្លែ ក្នុងមួយ
ដើម ។ ឆ្នាំទី៤ និងឆ្នាំទី៥ ស្វាយបានឱ្យផល ២ដង ក្នុងមួយឆ្នាំ ប៉ុន្ដែទិន្នផលដែលជាក់ លាក់នោះគឺគាត់មិនបានកត់ទុកទេ បើគិតជា មធ្យមបានប្រហែលជា១ទៅ១ផ្លូន ក្នុង១ ដើម (១ផ្លូន ស្មើនឹង៥០ផ្លែ) ក្នុងមួយរដូវ ។ ប៉ុន្ដែនៅរដូវទី២ ឬរដូវដែលប្រជាជនខ្មែរ តែងតែហៅថា ផ្លែខុសរដូវនោះគឺទិន្នផលតិច ជាងរដូវធម្មតា ។
ចំពោះប្រាក់ចំណូលដែលគាត់ទទួលបាន ក្នុងមួយរដូវជាមធ្យមបានត្រឹមតែពី១០ទៅ ២០ម៉ឺនរៀលប៉ុណ្ណោះ ព្រោះភាគច្រើនគឺគាត់ ចែកជូនបងប្អូន និងញាតិមិត្ដជិតខាងច្រើន ជាងការលក់ដូរ ។
ជាសរុបចំណុចដែលធ្វើឱ្យស្វាយលូត លាស់ល្អ និងទទួលបានទិន្នផលខ្ពស់មាន ៖
-ដាក់ជីទ្រាប់បាតឱ្យបានច្រើន (ជីធម្ម ជាតិរៀបជាស្រទាប់)
-ដាំក្បែរប្រភពទឹក (ងាយស្រួលស្រោច ទឹក)
-ដាក់ជីបំប៉នឱ្យបានច្រើននៅឆ្នាំទី៤
-ឧស្សាហ៍ចៀរដើម ដើម្បីឱ្យឆាប់រីក ដើម និងស្ទុះធំលឿន
-ដាំកណ្ដាលវាល ដើម្បីឱ្យស្វាយទទួល បានពន្លឺគ្រប់គ្រាន់ ៕
(ដកស្រង់ចេញពីទស្សនាវដ្តីកសិកររបស់អង្គការសេដាក)
ចែករំលែកព័តមាននេះ