ខេត្តកំពង់ចាម ៖ ក្រោមការយកចិត្តទុកដាក់ពីសំណាក់លោកអ៊ុន ចាន់ដា អភិបាលនៃគណៈអភិបាល ខេត្តរួមនិងសហការី បានអញ្ជើញចុះត្រួតពិនិត្យមើលរណ្តៅបេតុង ក្បែរលូធំម្តុំមាត់ទន្លេដែលបានបាក់ស្រុត ព្រមទាំងស្រូបយកម៉ូតូគ្រឿង និងបុរសម្នាក់…
ខេត្តកំពង់ចាម ៖ ក្រោមការយកចិត្តទុកដាក់ពីសំណាក់លោកអ៊ុន ចាន់ដា អភិបាលនៃគណៈអភិបាល ខេត្តរួមនិងសហការី បានអញ្ជើញចុះត្រួតពិនិត្យមើលរណ្តៅបេតុង ក្បែរលូធំម្តុំមាត់ទន្លេដែលបានបាក់ស្រុត ព្រមទាំងស្រូបយកម៉ូតូគ្រឿង និងបុរសម្នាក់ ប៉ុន្តែសំណាងល្អបុរសជាម្ចាស់ម៉ូតូបានរួចផុតគ្រោះថ្នាក់ ។ ទីតាំងកើតហេតុនេះមានទំហំ៧ម៉ែត្រ៤ជ្រុង និងជម្រៅ៦ម៉ែត្រនៅសួនច្បារមាត់ទន្លេក្នុងសង្កាត់វាលវង់ ក្រុងកំពង់ចាម នាព្រឹកថ្ងៃទី១៤ កញ្ញា ២០២០ ។ ជាមួយនោះក៏បានណែនាំឲ្យស្ថាប័នជំនាញធ្វើការសិក្សានិងជួសជុលជាបន្ទាន់ ដើម្បីចៀសវាងកុំឲ្យកើតមានគ្រោះថ្នាក់ជាយថាហេតុណាមួយ ដល់ប្រជាពលរដ្ឋដែលមកលេងកម្សាន្តនៅសួនច្បារមាត់ទន្លេ។ គួររំលឹកថា បុរសភ័យស្ទើរគាំងបេះដូង! កំពុងជិះសុខៗបាក់ស្រុតបេតុងសួនច្បារមាត់ទន្លេ(វីដេអូ)
លោកសុខ ស្រ៊ុន ប្រធានមន្ទីរសាធារណការនិងដឹកជញ្ជូនខេត្តមានប្រសាសន៍ឲ្យដឹងថា:
ប្រព័ន្ធលូធំសម្រាប់បង្ហូរទឹកសំអុយ ចេញពីតាមបណ្ដាលូជាច្រើនខ្សែ ដោយបានហូរកាត់លូនេះចូលទៅក្នុងទន្លេមេគង្គ។ ចំពោះមូលហេតុដែលបណ្ដាលឲ្យបាក់ស្រុតបេតុង និងមានរណ្ដៅធំបែបនេះ ដោយសារតែបាក់លូចាស់ ដែលមានសភាពទ្រុឌទ្រម កសាងឡើងតាំងពីសម័យបារាំងមកម្ល៉េះ។
លោកប្រធានមន្ទីរសាធារណការខេត្តមានប្រសាសន៍បន្តថា ក្នុងពេលដែលលោកអ៊ុន ចាន់ដា អភិបាលខេត្ត អញ្ជើញចុះពិនិត្យដោយផ្ទាល់នាព្រឹកថ្ងៃទី១៤ កញ្ញា បានណែនាំដល់ស្ថាប័នមន្ទីរសាធារណការខេត្ត ឲ្យបញ្ជូនក្រុមបច្ចេកទេសមកសិក្សាជាបន្ទាន់ និងត្រៀមសាងសង់ប្រព័ន្ធលូស្តង់ដារថ្មីដែលមានមុខកាត់៨ទឹកចំនួន៣ខ្សែ ។ មានលក្ខណៈធំទូលាយជាងលូចាស់ ហើយបណ្ដោយប្រវែង៨០ម៉ែត្រ ដើម្បីសម្រួលក្នុងការបង្ហូរទឹកសំអុយចេញពីក្នុងក្រុង ចូលទៅទន្លេមេគង្គ។
លោកបានបន្តថា តែដោយសារបុណ្យភ្ជុំ កម្មករសំណង់មួយចំនួនធំបានវិលត្រឡប់ទៅលេងស្រុកកំណើត ជួបជុំញាតិមិត្តប្អូនបងនិងឪពុកម្ដាយជីដូនជីតា ។ ក្រោយភ្ជុំបិណ្ឌនៅថ្ងៃទី២១ កញ្ញា ២០២០ នឹងចាប់ផ្ដើមបើកការដ្ឋានសាងសង់ប្រព័ន្ធលូតាមលក្ខណៈបច្ចេកទេសថ្មី ដោយធ្វើយ៉ាងណាឱ្យមានគុណភាព និងប្រើប្រាស់បានយូរអង្វែង។
លោកបន្តទៀតថា សួនច្បារមាត់ទន្លេក្រុងកំពង់ចាម បានធ្វើឱ្យមានការចាប់អារម្មណ៍ពីសំណាក់ប្រជាពលរដ្ឋបាននាំគ្នាដើរកំសាន្តលេងនឹងស្រូបយកខ្យល់អាកាស ជំនោរពីទន្លេមេគង្គ ហើយនៅពេលល្ងាចមិនថាក្មេងឬចាស់នោះទេ តែងតែនាំគ្នាដើរហាត់ប្រាណ។ ចំណែកម៉ូតូម៉ាកវ៉េវដែលបានកប់នៅក្នុងរណ្ដៅដីមានទឹក ក្រុមជំនាញមន្ទីរសាធារណការខេត្ត និងស្ដារឡើងលើគោកដើម្បីប្រគល់ជូនម្ចាស់វិញឲ្យបានឆាប់នេះ។
គួររំលឹកថា មានករណីបាក់ស្រុតបេតុងម្តុំសួនច្បារមាត់ទន្លេ ក្បែរលូធំបង្ហូរទឹកចូលទៅក្នុងទន្លេមេគង្គ ជិតក្រោមស្ពានគីហ្សុណាក្រុងកំពង់ចាម កាលពីយប់រំលងអាធ្រាត្រថ្ងៃទី១២ ឈានចូលព្រឹកថ្ងៃទី១៣ កញ្ញា ២០២០ បណ្តាលឱ្យម៉ូតូមួយគ្រឿងម៉ាកវ៉េវត្រូវបានស្រូបធ្លាក់ចូលទៅក្នុងលូលិចបាត់ រកពុំទាន់ឃើញនៅឡើយ សំណាងល្អមិនបណ្ដាលឱ្យគ្រោះថ្នាក់ដល់អាយុជីវិតម្ចាស់ម៉ូតូនោះទេ ចំណែកអាជ្ញាធរវិញបានរុំខ្សែព័ទ្ធនិងហាមមិនឲ្យមនុស្សចូលទៅកន្លែងបាក់ស្រុតបេតុងនោះទេ ព្រមទាំងរៀបចំជួសជុលឡើងវិញ ឲ្យបានឆាប់បំផុត។
លោកនេន សុខឃីន អាយុ៤៤ឆ្នាំ អ្នកលក់បបរស ដែលមានផ្ទះជួលនៅក្នុងសង្កាត់វាលវង់ មានចម្ងាយប្រមាណ៣០០ម៉ែត្រ ពីកន្លែងកើតហេតុបានរៀបរាប់ទាំងតក់ស្លុតថា មុនពេលកើតហេតុ នៅពាក់កណ្ដាលអាធ្រាត្រថ្ងៃទី១២ កញ្ញា ២០២០ គាត់បានជិះម៉ូតូម៉ាកវ៉េវមួយគ្រឿងតែម្នាក់ឯងនៅលើខឿនបេតុងសួនច្បារមាត់ទន្លេ ជិតក្រោមស្ពានគីហ្សុណា ពេលនោះស្រាប់តែបាក់ស្រុតបេតុងដោយចៃដន្យ ក្រោយពីមេឃបានធ្លាក់ភ្លៀងជាហេតុធ្វើឲ្យម៉ូតូនិងគាត់បានធ្លាក់ចូលក្នុងរណ្ដៅដីដែលមានទំហំប្រមាណ៥ម៉ែត្របួនជ្រុង គ្រានោះគាត់បានប្រឹងឡើងលើគោកបានទាំងត្រហេបត្រហប និងមានការភិតភ័យជាខ្លាំង ស្ទើរតែគាំងបេះដូង។
បុរសរងគ្រោះបានរៀបរាប់បន្តថា ក្នុងពេលកើតមានហេតុការណ៍បាក់ស្រុតលូខាងលើនោះ មិនមានមនុស្សណាម្នាក់នៅកន្លែងកើតហេតុនោះទេ គឺមានតែរូបគាត់ម្នាក់ប៉ុណ្ណោះ ។ បន្ទាប់មក គាត់ក៏បានទូរសព្ទហៅប្អូនថ្លៃនៅផ្ទះឲ្យជិះម៉ូតូមកឌុបគាត់ត្រឡប់ទៅផ្ទះជួលកន្លែងលក់បបរសវិញ។
បុរសរងគ្រោះបានរៀបរាប់បន្តទៀតថា រហូតមកដល់ព្រឹកថ្ងៃទី១៣ កញ្ញា គាត់បានជិះម៉ូតូមកកាន់កន្លែងបាក់ស្រុតបេតុងនៅជាប់ពីលើប្រព័ន្ធលូធំ បង្ហូរទឹកចូលទៅក្នុងទន្លេដោយមានទាំងឬស្សីមួយដើមបម្រុងយកមកចាក់មើលរណ្ដៅដែលបាក់ស្រុត រកម៉ូតូដែរ តែឬស្សីមួយដើមនោះខ្លីពេកចាក់មិនដល់ ហើយក៏ខ្លាចគ្រោះថ្នាក់បាក់ស្រុតបន្ថែម និងរង់ចាំមើលអាជ្ញាធរដែនដីជួយអន្តរាគមន៍យកម៉ូតូចេញពីក្នុងដីដែលបានលិចនៅក្នុងទឹកទៀតផង។
តាមប្រភពពីសាក្សីបាននិយាយថា ក្រោយពេលទំនេរពីការលក់ដូរបបរស ជារឿយៗ បុរសម្ចាស់ម៉ូតូតែងតែឌុបកូនដាក់នៅពីខាងមុខ ដើម្បីដើរលេងលំហែកាយតាមផ្លូវមាត់ទន្លេ ។ តែនេះសំណាងល្អដែលគ្រោះថ្នាក់បាក់ស្រុតលូម្តុំសួនច្បារមាត់ទន្លេ គឺមានតែបុរសរងគ្រោះម្នាក់ប៉ុណ្ណោះ បើសិនជាមានកូនតូចមកជាមួយអាចនឹងត្រូវគ្រោះថ្នាក់ជាក់ជាមិនខានឡើយ ។
នៅព្រឹកថ្ងៃទី១៤ កញ្ញា ឆ្នាំ២០២០ មន្ត្រីសាលាក្រុងបានដឹកយកដែករបាំងមកដាក់នៅត្រង់កន្លែងដែលបេតុងបានបាក់ស្រុត នឹងមិនឲ្យមនុស្សចូលទៅកន្លែងនោះទេ ដើម្បីការពារកុំអោយមានគ្រោះថ្នាក់ជាយថាហេតុណាមួយកើតឡើង ៕ (កែសម្រួលដោយ ៖ ធីតា)
ចែករំលែកព័តមាននេះ