រាជធានីភ្នំពេញ ៖ សមត្ថកិច្ចជំនាញការិយាល័យស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថរាជធានីភ្នំពេញ នារសៀលថ្ងៃទី១២ ខែកញ្ញា ឆ្នាំ២០២០ បានបញ្ជូនជនសង្ស័យម្នាក់ទៅតុលាការ ដើម្បីចាត់ការតាមនីតិវិធីច្បាប់ ពាក់ព័ន្ធករណីឆបោកគំរាមសម្លាប់ និងលាក់ទុកប្រើប្រាស់កាំភ្លើងខ្លីដោយខុសច្បាប់ចំនួន២ដើម ។
ជនសង្ស័យឈ្មោះ យន្ត ដារ៉ា ហៅ នូ រស្មី ភេទប្រុស អាយុ៤៤ឆ្នាំ មុខរបរគ្រូឱសថបុរាណ តែបានតាំងខ្លួនជាឧត្តមសេនីយ៍យោធា មានស្រុកកំណើត ភូមិតាលួស ឃុំតាលួស ស្រុកស្វាយជ្រុំ ខេត្តស្វាយរៀង ទីលំនៅបច្ចុប្បន្នបន្ទប់ជួលភូមិបឹងទំពុន សង្កាត់បឹងទំពុន ខណ្ឌមានជ័យ ។
ក្រោមវិធានការជំនាញរបស់សមត្ថកិច្ចអាវុធហត្ថរាជធានីភ្នំពេញ ក្រោយពេលចាប់ខ្លួនជនសង្ស័យ យន្ត ដារ៉ា បានសារភាពថា កាលពីអំឡុងខែកក្កដា ឆ្នាំ២០២០ ខ្លួនពិតជាបានឆបោកប្រាក់ពីជនរងគ្រោះជាបន្តបន្ទាប់សរុប៣២.១០០ដុល្លារអាមេរិកពិតប្រាកដមែន ពាក់ព័ន្ធករណីទិញលក់សំរឹទ្ធ ។
នៅពេលដែលជនរងគ្រោះដឹងខ្លួនថា ត្រូវបានខ្លួនបោកប្រាស់ ជនសង្ស័យក៏បានផ្ញើសារទៅកាន់ជនរងគ្រោះគំរាមកំហែងម្តងហើយម្តងទៀត តាមរយៈបណ្តាញទំនាក់ទំនង Messenger ក្នុងទូរស័ព្ទដោយប្រើពាក្យសម្តីថា នឹងសម្លាប់ចោលទាំងពូជសូម្បីតែកូនង៉ែតក្នុងអង្រឹងក៏មិនទុកដែរ ។
ដោយមានការភ័យខ្លាច ជនរងគ្រោះក៏មកដាក់ពាក្យបណ្តឹងនៅអាវុធហត្ថរាជធានីភ្នំពេញ ។ បន្ទាប់ពីទទួលបានបណ្តឹងសមត្ថកិច្ចជំនាញបានបើកការស្រាវជ្រាវរហូតឈានដល់ការឃាត់ខ្លួនជនសង្ស័យ ព្រមទាំងដកហូតអាវុធខ្លីចំនួនពីរដើម គឺ ម៉ាក K54 និង ម៉ាក Swees នៅចំណុច ភូមិខ្វា ទល់មុខធនាគារ អេស៊ីលីដា ផ្លូវ២១៧ សង្កាត់ដង្កោ ខណ្ឌដង្កោ ។
ចំណែកកាំភ្លើងខ្លីទាំងពីរដើមខាងលើ លោកគ្រូបោកហៅគ្រូប៉ោកប្រាប់ថា ខ្លួនបានទិញពីអ្នកស្គាល់គ្នា ដែលបច្ចុប្បន្នបានស្លាប់បាត់ទៅហើយ ៕
ចែករំលែកព័តមាននេះ