ខេត្តកណ្ដាល ៖ ប្រជាពលរដ្ឋរស់នៅភូមិទំនប់ទទឹង ឃុំគគីរធំ ស្រុកកៀនស្វាយ និងភូមិតាយោ ឃុំប្រាសាទ ស្រុកស្អាង ខេត្តកណ្តាល ភាគច្រើនគឺពួកគាត់រស់ពឹងអាស្រ័យលើការប្រកបមុខរបររកនេសាទត្រីចិញ្ចឹមជីវិត។…
ខេត្តកណ្ដាល ៖ ប្រជាពលរដ្ឋរស់នៅភូមិទំនប់ទទឹង ឃុំគគីរធំ ស្រុកកៀនស្វាយ និងភូមិតាយោ ឃុំប្រាសាទ ស្រុកស្អាង ខេត្តកណ្តាល ភាគច្រើនគឺពួកគាត់រស់ពឹងអាស្រ័យលើការប្រកបមុខរបររកនេសាទត្រីចិញ្ចឹមជីវិត។ ប៉ុន្តែសម្រាប់ឆ្នាំនេះពួកគាត់ពិតជាជួបវិបត្តិសេដ្ឋកិច្ចក្នុងគ្រួសារយ៉ាងខ្លាំង ព្រោះដល់ខែ៩ ហើយនៅមិនទាន់មានទឹកហូរចូលមកឲ្យពួកគាត់បានរកនេសាទត្រីទៀត។ បច្ចុប្បន្នពួកគាត់កំពុងដើរដាក់អង្គុបកណ្តុរជួនកាលលក់បាន១០០០០-២០០០០រៀល ឬ៣០០០០រៀល គ្រាន់ផ្គត់ផ្គង់ជីវភាពគ្រួសារ និងជួយឲ្យកូនចៅបានទៅរៀនសូត្រខ្វះមុខខ្វះក្រោយ។
ដោយមើលឃើញពីទុក្ខលំបាករបស់បងប្អូនប្រជាពលរដ្ឋរស់នៅភូមិ ឃុំ ស្រុកខាងលើ នាថ្ងៃទី១១-១២ ខែកញ្ញា ឆ្នាំ២០២០ លោក សុខ យៀង ជាសប្បុរសជនរស់នៅភូមិព្រែកត្រែង ឃុំសំរោងធំ ស្រុកកៀនស្វាយ បាននាំយកអំណោយទៅចែកជូនដល់ប្រជាពលរដ្ឋក្រីក្រ និងចាស់ជរាគ្មានទីពឹងតាមខ្នងផ្ទះក្នុងរដូវបុណ្យកាន់បិណ្ឌ និងបិណ្ឌភ្ជុំចំនួន៧៥គ្រួសារ ដោយក្នុង១គ្រួសារទទួលបានអង្ករ១៥គីឡូក្រាម ក្រមា១ សារុង១ និងថវិកា១០០០០រៀល។ ក្នុងនោះចាស់ជរាគ្មានទីពឹងលោក សុខ យៀង បានឧបត្ថម្ភថវិកាបន្ថែម និងបានជួយថវិកាចំនួន៥០០០ដុល្លារ សម្រាប់កសាងខ្លោងទ្វារវត្តតាយោផងដែរ។
លោក សុខ យៀង បញ្ជាក់បន្ថែមថា ការធ្វើបុណ្យដាក់ទាននេះ គឺដោយសាររូបលោកពីមុនធ្លាប់ឆ្លងកាត់ជីវភាពក្រីក្រ ហេតុដូច្នេះហើយទើបរូបលោកយល់ច្បាស់ពីទុក្ខលំបាករបស់អ្នកក្រ នៅពេលដែលខ្លួនមានធនធានផ្ទាល់ខ្លួនបន្តិចបន្តួចក៏បានបរិច្ចាគចែកជូនបងប្អូនប្រជាពលរដ្ឋនៅឃុំគគីរធំ និងឃុំប្រាសាទនេះជាបន្តបន្ទាប់រយៈពេល២ឆ្នាំមកហើយ ហើយលោកនឹងធ្វើការងារមនុស្សធ៌មនេះជាបន្តបន្ទាប់ទៀតទៅតាមលទ្ធភាពដែលធ្វើទៅបាន។
ប្រជាពលរដ្ឋសម្តែងនូវទឹកចិត្តសប្បាយរីករាយ និងសូមថ្លែងអំណរគុណចំពោះសប្បុរសជន លោក សុខ យៀង ដែលបានចែកអំណោយជូនពួកគាត់ខណៈកំពុងជួបការខ្វះខាត ទោះបីអំណោយនេះវាតិចតួចមិនអាចផ្គត់ផ្គង់តម្រូវការយូរអង្វែងក៏ពិតមែន ក៏ជាការយកចិត្តទុកដាក់អាចជួយសម្រួលដោះស្រាយដល់ពួកគាត់រួចមួយរយៈពេលផងដែរ៕ ដោយ ៖ ស៊ឹម សាន់
ចែករំលែកព័តមាននេះ