រាជធានីភ្នំពេញ ៖ បុរសម្នាក់បានបើករថយន្តមួយគ្រឿងម៉ាកឡិចស៊ីស ៥៧០ ឈប់តាមផ្លូវ ដើម្បីឱ្យនារីម្នាក់ដែលជាអ្នករួមដំណើរមានអាការៈពុលឡានចុះស្រូបយកខ្យល់អាកាស ស្រាប់តែមានបុរសម្នាក់ទៀតបើករថយន្តម៉ាកធុនដ្រាចុចស៊ីផ្លេឮខ្លាំងៗ បន្ទាប់មកបុរសជាអ្នកបើកបររថយន្តម៉ាកឡិចស៊ីស ៥៧០ បានសួរថា «មូលហេតុអ្វីបានបងឯងចុចស៊ីផ្លេឮខ្លាំងម៉្លេះ?» ស្រាប់តែបុរសជាអ្នកបើកបររថយន្តម៉ាកធុនដ្រាបើកបុក ហើយរីយ៉ែថយក្រោយបំរុងកិនទៀត ប៉ុន្តែត្រូវបុរសជាអ្នកបើករថយន្តម៉ាកឡិចស៊ីស៥៧០ គេចទាន់និងបណ្ដាលឲ្យរងរបួសបែកក្បាល បែកមុខ បែកមាត់ ។ ដោយឡែកអ្នកបើកបររថយន្តម៉ាកធុនដ្រា បានរត់គេចខ្លួនបាត់ ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង៤០នាទីយប់ថ្ងៃទី១២ ខែកញ្ញា ឆ្នាំ២០២០ នៅតាមផ្លូវបេតុង ស្ថិតនៅក្នុងភូមិកោះនរា សង្កាត់និរោធ ខណ្ឌច្បាអំពៅ រាជធានីភ្នំពេញ ។
ជនរងគ្រោះឈ្មោះ ថាច់ ភក្តី ភេទប្រុស អាយុ២៩ឆ្នាំ មុខរបររត់កង់បី ស្នាក់នៅភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ជាអ្នកបើកបររថយន្តមួយគ្រឿងម៉ាកឡិចស៊ីស ៥៧០ ពណ៌ខ្មៅ ពាក់ស្លាកលេខ ភ្នំពេញ 2J-9007។ ដោយឡែកភាគីខាងរថយន្តមួយគ្រឿងទៀតម៉ាកធុនដ្រា ពណ៌ខ្មៅ ពាក់ស្លាកលេខ ភ្នំពេញ 1AH-1226 អ្នកបើកបរមិនស្គាល់អត្តសញ្ញាណ បានគេចខ្លួនបាត់។
តាមសម្តីជនរងគ្រោះបានឱ្យដឹងថា មុនពេលកើតហេតុ គាត់បានបើករថយន្តមួយគ្រឿងធ្វើដំណើរតាមផ្លូវបេតុង រួមដំណើរជាមួយនឹងនារីម្នាក់ទៀត លុះពេលមកដល់កន្លែងកើតហេតុខាងលើ នារីម្នាក់ដែលអ្នករួមដំណើរជាមួយគាត់នោះមានអាការៈពុលឡាន ពេលនោះគាត់បានឈប់រថយន្ដនៅចិញ្ចើមផ្លូវ ហើយក៏បើកទ្វារឲ្យនារីដែលជាអ្នករួមដំណើរនោះចេញមកក្រៅ ដើម្បីស្របយកខ្យល់អាកាស។
តាមប្រភពដដែលបានបន្តថា ខណៈពេលគាត់ឈប់រថយន្ដ ហើយបានមកឈរនៅខាងក្រៅ ស្រាប់តែមានបុរសម្នាក់បើករថយន្តមួយគ្រឿងម៉ាកធុនដ្រា រួមនឹងនារី២នាក់ទៀតជិះក្នុងរថយន្តនោះ បានបើកបរក្នុងល្បឿនលឿនមកពីក្រោយ ហើយចុចស៊ីផ្លេឮៗ ពេលនោះជនរងគ្រោះបានសួរទៅបុរសជាអ្នកបើករថយន្តម៉ាកធុនដ្រាថា «មូលហេតុអ្វីបានជាបងឯងចុចស៊ីផ្លេឮខ្លាំងម្ល៉េះ?» ។
តាមប្រភពដដែលបានបន្តថា បន្ទាប់ពីគាត់សួរបែបនេះ បុរសជាអ្នកបើករថយន្តម៉ាកធុនត្រានោះមិនបានឆ្លើយតបអ្វីនោះទេ ក៏បើករថយន្តបុកធ្វើឲ្យគាត់ដួលអែបក្បែររបងផ្ទះប្រជាពលរដ្ឋ ហើយអ្នកបើកបររថយន្តម៉ាកធុនដ្រានោះបានរីយ៉ែថយក្រោយបំណងកិនដែរ ប៉ុន្តែគាត់បានគេចខ្លួនទាន់ បណ្ដាលឲ្យរងរបួសបែកក្បាលប៉ោងមុខប៉ោងមាត់និងមានស្នាមរយះជាច្រើនកន្លែងនៅលើខ្លួន ។ ភ្លាមៗនោះដែរ នារី២នាក់ដែលអង្គុយនៅក្នុងរថយន្តម៉ាកធុនដ្រានោះក៏បានបើកទ្វាររត់គេចខ្លួនបាត់ ចំណែកអ្នកបើកបររថយន្តម៉ាកធុនដ្រាក៏ឈប់រថយន្តហើយក៏បានរត់គេចខ្លួនបាត់ស្រមោលផងដែរ។
បន្ទាប់មកសមត្ថកិច្ចមូលដ្ឋានក៏បានចុះទៅដល់កន្លែងកើតហេតុនិងបានយករថយន្តមករក្សាទុកនៅអធិការរដ្ឋានខណ្ឌច្បារអំពៅ ។
ភ្លាមៗនោះជនរងគ្រោះរួមទាំងក្រុមគ្រួសារបានទៅដាក់ពាក្យបណ្ដឹងនៅអធិការដ្ឋានខណ្ឌច្បារអំពៅ ដើម្បីស្នើសុំសមត្ថកិច្ចស្រាវជ្រាវរកម្ចាស់រថយន្តម៉ាកធុនដ្រាឱ្យចូលខ្លួនមកដោះស្រាយ។
ក្រោយពីបានទទួលពាក្យបណ្ដឹងពីជនរងគ្រោះខាងលើរួចមក សមត្ថកិច្ចនគរបាលខណ្ឌច្បាប់ពៅក៏បានឱ្យជនរងគ្រោះទៅព្យាបាលរបួសសិនទៅ ចាំសមត្ថកិច្ចធ្វើការស្រាវជ្រាវរកម្ចាស់រថយន្តម៉ាកធុនដ្រាដើម្បីឲ្យចូលខ្លួនមកដោះស្រាយជាមួយជនរងគ្រោះនៅពេលក្រោយជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ