ខេត្តស្វាយរៀង ៖ ទីបញ្ចប់ សមត្ថកិច្ចតាមប្រម៉ាញ់ចាប់បក្ខពួកក្រុមចោរប្លន់ប្រដាប់អាវុធបានម្នាក់ទៀតហើយ ក្រោយពីធ្វើសកម្មភាពប្លន់ម៉ូតូមួយគ្រឿងនៅស្រុករមាសហែកខេត្តស្វាយរៀង ហើយរត់គេចខ្លួននោះ ត្រូវកម្លាំងនគរបាលតាមបង្ក្រាបបានរហូតដល់ខេត្តក្រចេះកាលពីរសៀលថ្ងៃទី១២ ខែកញ្ញា ឆ្នាំ២០២០ ខណៈបក្ខពួកម្នាក់ត្រូវចាប់បាននៅចំណុចកើតហេតុ ក្រោយធ្វើសកម្មភាពបានប៉ុន្មានម៉ោងប៉ុណ្ណោះ ។ គួររំលឹកថា ប្លន់កណ្តាលទីប្រជុំជនទាំងព្រឹក និងបាញ់តដៃសំដៅរថយន្តនគរបាល៣គ្រាប់ទៀត
បើតាមសមត្ថកិច្ចខេត្តស្វាយរៀងបានឲ្យដឹងថា ក្រោមការយកចិត្តទុកដាក់ និងដឹកនាំបញ្ជាផ្ទាល់ពីលោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង និងមានការសម្របសម្រួលពីលោកខាំ សុផារី ព្រះរាជអាជ្ញាអមសាលាដំបូងខេត្ត កម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តស្វាយរៀង បានសហការជាមួយកម្លាំងនគរបាលខេត្តក្រចេះបានធ្វើការបង្ក្រាបនិងឃាត់ខ្លួនជនសង្ស័យម្នាក់ទៀត ឈ្មោះរ៉េន ម៉ាប់(ដែលជាមុខសញ្ញាក្នុងខេត្តក្រចេះ)និងជាបក្ខពួករបស់ជនសង្ស័យប្លន់ប្រដាប់អាវុធ យកម៉ូតូមួយគ្រឿង ពីជនរងគ្រោះនៅភូមិកំពង់ត្រាច ឃុំកំពង់ត្រាច ស្រុករមាសហែក ខេត្តស្វាយរៀង កាលពីព្រឹកថ្ងៃទី១២ កញ្ញា ឆ្នាំ២០២០នេះ។
តាមប្រភពដដែលបានបន្តទៀតថា ក្រោយពីបង្ក្រាបជនសង្ស័យបានហើយ កម្លាំងការិយាល័យជំនាញនគបាលខេត្តក្រចេះ បានប្រគល់ជនសង្ស័យមកស្នងការដ្ឋាននគរបាលខេត្តស្វាយរៀងដើម្បីចាត់ការតាមនីតិវិធី។
សូមរំលឹកថា កាលពីវេលាម៉ោង៦ព្រឹកថ្ងៃទី១២ ខែកញ្ញា ឆ្នាំ២០២០ មានករណីជនសង្ស័យចំនួន២នាក់ ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ប្រដាប់ដោយអាវុធខ្លីម៉ាករ៉ូឡូ១ដើម បានធ្វើសកម្មភាពចូលភ្ជង់យកម៉ូតូមួយគ្រឿងម៉ាកហុងដាឌ្រីម ធុនC125 ពណ៍ខ្មៅ ស៊េរីឆ្នាំ2020 ពាក់ស្លាកលេខ ស្វាយរៀង 1P-5053 ពីជនរងគ្រោះឈ្មោះវរ័ អឿន ភេទប្រុស អាយុ៤៩ឆ្នាំ រស់នៅភូមិកំពង់ត្រាច ឃុំកំពង់ត្រាច ស្រុករមាសហែក ដែលជនរងគ្រោះបំរ៉ុងជិះចេញពីផ្ទះទៅផ្សារក៏ត្រូវជនសង្ស័យផ្ជង់យកកណ្តាលទីប្រជុំជនស្រុកតែម្តង។
ក្រោយពីធ្វើសកម្មភាពភ្ជង់ប្លន់យកម៉ូតូពីជនរងគ្រោះបានសម្រេច ខណៈនោះជនរងគ្រោះបានប្តឹងសមត្ថកិច្ចឲ្យជួយអន្តរាគមន៍តាមបង្ក្រាបរហូតមានការបាញ់តបតជាមួយសមត្ថកិច្ចមួយប្រាវចំនួន៦គ្រាប់ សមត្ថកិច្ចបានសម្រេចចិត្តបើករថយន្តកៀរ បំបុកម៉ូតូជនសង្ស័យម្នាក់បណ្តាលឲ្យដួលខ្ទាតកាំភ្លើងចេញពីដៃ បន្ទាប់មកជនសង្ស័យព្យាយាមរត់គេចខ្លួនចូលតាមផ្ទះប្រជាពលរដ្ឋរហូតដល់វាលស្រែ ស្ថិតនៅភូមិមុន្នីព្រឹក្សា ឃុំត្រស់ស្រុករមាសហែកក៏ត្រូវសមត្ថកិច្ចព័ទ្ធចាប់បាននៅកណ្តាលវាលស្រែដែលជនសង្ស័យម្នាក់ឈ្មោះរ៉ាត់ សារ៉ាន់ ហៅចុន រ៉ាន់ ហៅតឿ អាយុ២៨ឆ្នាំមានទីលំនៅភូមិថ្មី ឃុំត្រពាំងផ្លុង ស្រុកពញាក្រែក ខេត្តត្បួងឃ្មុំ និងដកហូតម៉ូតូវត្ថុតាងបានមកវិញផងដែរ។
សមត្ថកិច្ចមួយក្រុមបានដេញតាមបង្ក្រាបជនសង្ស័យម្នាក់ទៀតរហូតដល់ខេត្តក្រចេះទើបចាប់ខ្លួនបាន ។ លទ្ធផលតាមប្រម៉ាញ់ចាប់ក្រុមចោរប្លន់ប្រដាប់វុធបានទាំងពីរនាក់យកមកផ្តន្ទាទោសតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ