ខេត្តស្វាយរៀង ៖ យ៉ាងហោចណាស់ មនុស្ស២នាក់បានរងរបួស និងផ្ទះចំនួន១២ខ្នងផ្ទះបានខូចខាត ខណៈមានភ្លៀងធ្លាក់លាយឡំដោយខ្យល់កន្ត្រាក់ កាលពីថ្ងៃទី៩ ខែកញ្ញា ឆ្នាំ២០២០ វេលាម៉ោងប្រមាណ៤និង៤០នាទីល្ងាច…
ខេត្តស្វាយរៀង ៖ យ៉ាងហោចណាស់ មនុស្ស២នាក់បានរងរបួស និងផ្ទះចំនួន១២ខ្នងផ្ទះបានខូចខាត ខណៈមានភ្លៀងធ្លាក់លាយឡំដោយខ្យល់កន្ត្រាក់ កាលពីថ្ងៃទី៩ ខែកញ្ញា ឆ្នាំ២០២០ វេលាម៉ោងប្រមាណ៤និង៤០នាទីល្ងាច នៅឃុំសំបួរ និងវេលាម៉ោង៥ទៅ៦ល្ងាច នៅឃុំពពែត
ស្រុកស្វាយទាប ។ ទោះជាយ៉ាងណាក៏ដោយ ពុំមានមនុស្សណាម្នាក់រងគ្រោះថ្នាក់នៅក្នុងគ្រោះធម្មជាតិនេះទេ ។
បើតាមសមត្ថកិច្ចឱ្យដឹងថា នៅភូមិអូរក្អាម ឃុំសំបួរ ផ្ទះចំនួន៧ខ្នងបានខូចខាតនៅក្នុងគ្រោះធម្នជាតិនេះ ដែលមានម្ចាស់ ៖
១-ឈ្មោះ គឹម សាខន ភេទប្រុស អាយុ៥៦ឆ្នាំ រលំផ្ទះទំហំ៤ម៉ែត្រគុណនឹង៦ម៉ែត្រ ដំបូល និងជញ្ជាំងស័ង្កសី និងបាត់ប្រាក់ចំនួន៣០ម៉ឺនរៀល
២-ឈ្មោះ ព្រំ ប្រុស ភេទប្រុស អាយុ៣៧ឆ្នាំ រលំផ្ទះទំហំ៥ម៉ែត្រគុណនឹង៦ម៉ែត្រ ដំបូលនិងជញ្ជាំងស័ង្កសី
៣-ឈ្មោះ ហែម សូនី ភេទស្រី អាយុ៤២ឆ្នាំ រលំផ្ទះទំហំ៥ម៉ែត្រគុណនឹង៦ម៉ែត្រ ដំបូលនិងជញ្ជាំងស័ង្កសី
៤-ឈ្មោះ ភោគ សំអាល់ ភេទប្រុស អាយុ៣៧ឆ្នាំ រលំផ្ទះទំហំ៨ម៉ែត្រគុណនឹង៦ម៉ែត្រ ដំបូលនិងជញ្ជាំងស័ង្កសី
៥-ឈ្មោះ សំ ចិន ភេទប្រុស អាយុ២៩ឆ្នាំប៉ើងដំបូលអស់សង្ក័សី៦សន្លឹក
៦-ឈ្មោះ មាស សាបឿន ភេទប្រុស អាយុ៤០ឆ្នាំ ប៉ើងដំបូលហ្វ៊ីប្រូស៊ីម៉ង់ត៍៦សន្លឹក និង
៧-ឈ្មោះ ឈុន សាបាន ភេទប្រុស អាយុ៣៨ឆ្នាំ រលំរោងសម្អាងការទំហំ៤ម៉ែត្រគុណនឹង៦ម៉ែត្រ ។
ចំណែកនៅឃុំពពែត ខ្យល់កន្ត្រាក់បណ្ដាលឱ្យប៉ើងដំបូលផ្ទះនៅភូមិថ្លុកព្រីង៣ខ្នង នៅភូមិគុម្ពោតម្រ័ក្សណ៍១ខ្នង និងនៅភូមិទូលច្រេស១ខ្នង សរុប៥ខ្នង ។
កន្លងមក ឯកឧត្តម ម៉ែន វិបុល អភិបាលខេត្ត តែងអំពាវនាវដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ចំពោះគ្រោះធម្មជាតិដែលអាចកើតមានឡើងគ្រប់ពេលវេលា ជាពិសេសនៅពេលមានភ្លៀង ផ្គរ រន្ទះ ខ្យល់កន្ត្រាក់ ជាដើមនារដូវវស្សានេះ ។
នៅពេលមានភ្លៀង ខ្យល់ សូមបងប្អូនរកទីទួលសុវត្ថិភាព និងត្រូវមើលថែកូនចៅតូចៗកុំឱ្យលេងទឹកស្រះ ត្រពាំង បឹង ទន្លេ ដែលអាចបង្កឲ្យមានគ្រោះថ្នាក់ដល់អាយុជីវិតដោយការលង់ទឹកនិងត្រូវបិទវិទ្យុ ទូរស័ព្ទ ទូរទស្សន៍ នៅពេលមានភ្លៀងធ្លាក់ ៕
ចែករំលែកព័តមាននេះ