ប្រទេសលីបង់ ៖ សោកនាដកម្មថ្មីមួយទៀតកើតមានកាលពីថ្ងៃទី១០កញ្ញានៅកំពង់ផែក្រុងបេរូតរដ្ឋធានីលីបង់ ដោយឆេះឃ្លាំងធំមួយស្ថិតក្នុងកំពង់ផែនោះ។
ឧប្បត្តិហេតុថ្មីនេះបណ្ដាល ឲ្យមានភាពជ្រួលច្របល់ក្នុងចំណោមប្រជាជនលីបង់ ដែលនៅមិនទាន់បាត់ក្ដុកក្ដួលនៅឡើយ ក្រោយការផ្ទុះឆេះសម្លាប់មនុស្សដ៏ច្រើន និងពោរពេញដោយការបំផ្លាញដ៏មហាសាល ក្នុងរដ្ឋធានីលីបង់កាលពីជាង១ខែមុន។ គេឃើញពពកផ្សែងខ្មៅហុយចេញ ដោយភ្លើងចាប់ឆេះក្នុងឃ្លាំងមួយដែលស្តុកប្រេងនិងកង់រថយន្ត។ អាជ្ញាធរបានអំពាវនាវដល់ប្រជាជនឲ្យចាកចេញពីបណ្ដាសង្កាត់ស្ថិតនៅក្បែរកំពង់ផែនោះ។
ទូរទស្សន៍លីបង់មួយរៀបរាប់ថា ភ្លើងចាប់ឆេះបណ្ដាប៊ីដុងប្រេងមុនពេលឆេះរាលដាលដល់សំបកកង់រថយន្ត តែមិនបានបញ្ជាក់ពីមូលហេតុនៃភ្លើងឆេះនោះឡើយ។ ចំណែកកាកបាទក្រហមអន្តរជាតិប្រកាសថា ភ្លើងបានចាប់ឆាបឆេះក្នុងឃ្លាំងមួយ ដែលកាកបាទក្រហមស្តុកជំនួយស្បៀងដោយអះអាងថា គ្រោះមហន្តរាយនោះអាចធ្វើឲ្យស្ទះដល់ប្រតិបត្តិការរបស់ខ្លួនព្រោះស្បៀងសម្រាប់ជំនួយរងការបំផ្លាញដោយសារភ្លើងឆេះនោះ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ