ខេត្តកណ្តាល ៖ តាមព័ត៌មានបឋមឲ្យដឹងថា គ្រួសារកសិករមួយនៅភូមិពោង ឃុំសំបួរមាស ស្រុកមុខកំពូល បានត្រូវចោរលួចក្របីពីក្រោលអស់៥ក្បាល និងមានការភ្ញាក់ផ្អើលកាលពីវេលាម៉ោងប្រមាណ៥និង៤០នាទីភ្លឺថ្ងៃទី១០ ខែកញ្ញា ឆ្នាំ២០២០…
ខេត្តកណ្តាល ៖ តាមព័ត៌មានបឋមឲ្យដឹងថា គ្រួសារកសិករមួយនៅភូមិពោង ឃុំសំបួរមាស ស្រុកមុខកំពូល បានត្រូវចោរលួចក្របីពីក្រោលអស់៥ក្បាល និងមានការភ្ញាក់ផ្អើលកាលពីវេលាម៉ោងប្រមាណ៥និង៤០នាទីភ្លឺថ្ងៃទី១០ ខែកញ្ញា ឆ្នាំ២០២០ ខណៈម្ចាស់ងើបពីដំណេក។
ស្ត្រីឈ្មោះ អុន សុខជា អាយុ៣២ឆ្នាំ ជាម្ចាស់ក្របី រៀបរាប់ប្រាប់សមត្ថកិច្ចថា ប្ដីប្រពន្ធគាត់ចិញ្ចឹមក្របីចំនួន៧ក្បាល គឺមេ៤ក្បាល កូន២ក្បាល និងឈ្មោល១ក្បាល ។ ជារៀងរាល់ថ្ងៃ នៅវេលាម៉ោង៥ទៅ៦ព្រឹក គាត់តែងដឹកក្របីចេញពីក្រោលទៅចងនិងលែងឲ្យស៊ីស្មៅនៅក្រោយផ្ទះ រហូតវេលាម៉ោង៥ល្ងាចទើបដឹកចូលក្រោលវិញ ។
នៅថ្ងៃទី៩ ខែកញ្ញា ឆ្នាំ២០២០ គាត់បញ្ចូលក្របីក្នុងក្រោល និងចងបិទទ្វាររបងខាងក្រោមផ្ទះដូចសព្វដង រួចក៏ចូលដាំបាយហូបជាមួយក្រុមគ្រួសារ ។ បន្ទាប់មក រូបគាត់និងប្តីនាំគ្នាទៅចូលរួមពិធីបង្កក់កូនគេនៅផ្ទះឈ្មោះ អុន វិចិត្រ ហើយមានការផឹកស៊ីនៅទីនោះ ។ រហូតដល់វេលាម៉ោងប្រមាណ៩យប់ គាត់ក៏មកផ្ទះមុនប្តីដើម្បីមើលកូន ដែលពេលមកដល់ទៅមើលក្របីក្នុងក្រោលឃើញនៅទាំងអស់ ហើយគាត់ក៏ឡើងទៅដេកនៅលើផ្ទះជាមួយកូនទៅ ។
លុះនៅម៉ោងប្រហែល១១យប់ ប្ដីគាត់មកពីចូលរួមកម្មវិធីដល់ផ្ទះវិញ ទៅមើលក្របីក្នុងក្រោលក៏ឃើញនៅទាំងអស់ដែរ រួចក៏ឡើងលើផ្ទះចូលដេកដែរទៅ ។
នៅវេលាម៉ោងប្រមាណ៥និង៤០នាទីភ្លឺ គាត់មានបំណងទៅបោះបាយបិណ្ឌ ក៏ដាស់ប្ដីឲ្យដឹកក្របីចេញពីក្រោលយកទៅចងឲ្យស៊ីស្មៅ ពេលនោះស្រាប់តែប្ដីស្រែកទាំងរំជួលចិត្តថា ក្របីយើងបាត់អស់ហើយ ។ ពេលនោះក៏មានការផ្អើលឆោឡោឡើង និងបានទូរសព្ទ័ប្រាប់បងប្អូនចែកផ្លូវគ្នាដើររក និងទូរស័ព្ទទៅប្តឹងនគរបាលប៉ុស្ដិ៍សំបួរមាសភ្លាមៗដែរ ប៉ុន្តែស្ងាត់ដូចចោរលួចសេះ មិនដឹងថាចោរដឹកក្របីចេញពីក្រោលតាំងពីថ្មើរណាទេ ។
ក្រោយពីទទួលបានព័ត៌មាននេះ កម្លាំងនគរបាលប៉ុស្តិ៍បានសហការជាមួយកម្លាំងយុត្តិធម៌ស្រុក ចុះទៅដល់កន្លែងកើតហេតុនិងស្វែងរកមុខសញ្ញាជាមួយម្ចាស់ក្របី ។ ពេលនោះក៏បានរកឃើញកូនក្របីចំនួន២ក្បាល ដែលចោរលែងចោលទំនងដឹកទៅមិនរួច ចំណែកមេចំនួន៤ ក្បាលនិងឈ្មោល១ក្បាលស្ថិតនៅដៃចោរនៅឡើយទេ ។
ទោះជាយ៉ាងណា ករណីនេះមន្ត្រីនគរបាលជំនាញនិងនគរបាលប៉ុស្តិ៍ កំពុងដុតដៃដុតជើងបន្តស្រាវជ្រាវរកមុខសញ្ញា ដើម្បីចាប់ខ្លួនយកមកផ្តន្ទាទោសតាមច្បាប់ ៕
ចែករំលែកព័តមាននេះ