រាជធានីភ្នំពេញ ៖ កម្មករកម្មការិនីរោងចក្រកាត់ដេរសម្លៀកបំពាក់ «Y&W» ជិត៤ពាន់នាក់ បានប្រមូលផ្ដុំគ្នាធ្វើកូដកម្មបិទផ្លូវលេខ២១៧ ដើម្បីតវ៉ាទាមទារលក្ខខណ្ឌការងារពីថៅកែជាច្រើនចំណុច ប៉ុន្តែចំណុចសំខាន់ដែលជាដើមចមនៃការផ្ទុះជាបាតុកម្មនេះ គឺពាក់ព័ន្ធទៅនឹងចំនួនថ្ងៃនៃការឈប់សម្រាកនាឱកាសបុណ្យភ្ជុំបិណ្ឌតែម្ដង ។…
រាជធានីភ្នំពេញ ៖ កម្មករកម្មការិនីរោងចក្រកាត់ដេរសម្លៀកបំពាក់ «Y&W» ជិត៤ពាន់នាក់ បានប្រមូលផ្ដុំគ្នាធ្វើកូដកម្មបិទផ្លូវលេខ២១៧ ដើម្បីតវ៉ាទាមទារលក្ខខណ្ឌការងារពីថៅកែជាច្រើនចំណុច ប៉ុន្តែចំណុចសំខាន់ដែលជាដើមចមនៃការផ្ទុះជាបាតុកម្មនេះ គឺពាក់ព័ន្ធទៅនឹងចំនួនថ្ងៃនៃការឈប់សម្រាកនាឱកាសបុណ្យភ្ជុំបិណ្ឌតែម្ដង ។ ហេតុការណ៍នោះបានកើតឡើងកាលពីវេលាម៉ោង១០ព្រឹកថ្ងៃទី១០ ខែកញ្ញា ឆ្នាំ២០២០ នៅចំណុចមុខរោងចក្រ Y&W ដែលមានទីតាំង ស្ថិតនៅតាមបណ្ដោយផ្លូវលេខ២១៧ ក្នុងភូមិព្រែជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
កម្មករម្នាក់បាននិយាយថា ពួកគាត់ធ្វើការតវ៉ាតែក្នុងរោងចក្រទេ ដើម្បីទាមទារលក្ខខណ្ឌការងារមួយចំនួនពីថៅកែ ក្នុងនោះមាន១ចំណុចសំខាន់ គឺសុំឈប់សម្រាកក្នុងឱកាសបុណ្យភ្ជុំបិណ្ឌចំនួន៥ថ្ងៃ ខណៈដែលថៅកែបានអនុញ្ញាតឲ្យឈប់សម្រាកត្រឹមតែ៣ថ្ងៃប៉ុណ្ណោះ។ រយៈពេល៣ថ្ងៃសម្រាប់កម្មករដែលមានផ្ទះនៅខេត្តឆ្ងាយគ្រាន់តែទៅនិងមកគ្រប់ទៅហើយមិនអាចធ្វើបុណ្យទាន់បានឡើយ ។ ដូច្នេះហើយទើបពួកគាត់សុំចំនួន៥ថ្ងៃ ប៉ុន្តែថៅកែមិនព្រមទើបថ្ងៃនេះសម្រេចចិត្តនាំគ្នាចេញក្រៅបិទផ្លូវដើម្បីពន្លឿនការដោះស្រាយតែម្តង ។
កម្មករបានបន្តទៀតថា នៅក្នុងរោងចក្រនេះមានកម្មករកម្មការិនីបម្រើការងារសរុបចំនួន៣៨៨៣នាក់ ហើយពួកគាត់ក៏បានដឹងដែរថាការបិទផ្លូវពុំមែនជារឿងត្រឹមត្រូវនោះទេ គឺជាការខុសច្បាប់ទាំងស្រុង និងបានធ្វើឲ្យប៉ះពាល់ដល់សាធារណជនទូទៅជាច្រើនផងដែរ ប៉ុន្តែដោយសារតែគ្មានដំណោះស្រាយទើបធ្វើបែបនេះ ។
ពិសេសទៀតក៏នៅមានលក្ខខណ្ឌក១ចំណុចសំខាន់ទៀតដែរដែលត្រូវតែទាមទារជាចាំបាច់នោះ គឺសុំឲ្យរោងចក្របើកប្រាក់ខែឲ្យបានមុនថ្ងៃទី១៥ គឺសុំបើកនៅត្រឹមថ្ងៃទី១០វិញ ព្រោះត្រូវទៅភ្ជុំបិណ្ឌ ។
បានកត់សម្គាល់ថា នៅព្រឹកថ្ងៃកើតហេតុនោះកម្មករកម្មការិនីបាននាំគ្នាបិទផ្លូវលេខ២១៧ ហៅផ្លូវចំការដូងបង្កឲ្យមានការកកស្ទះចរាចរផងដែរ ហើយភ្លាមៗនោះអាជ្ញាធរខណ្ឌដង្កោដឹកនាំដោយលោកអភិបាលរងខណ្ឌ ជ គឹមស៊រ រួមជាមួយកម្លាំងនគរបាលនៃអធិការដ្ឋានខណ្ឌដង្កោ ដឹកនាំដោយលោកអធិការ ជឹម ស៊ីថា បានចុះទៅសម្របសម្រួលជាមួយកម្មករទើបបើកផ្លូវឡើងវិញ ហើយឲ្យតំណាងកម្មករនិងតំណាងរោងចក្រជួបដោះស្រាយគ្នាជាថ្មីដើម្បីបញ្ចប់រឿងវិវាទនេះ ។ ចំពោះដំណោះស្រាយខាងថៅកែរោងចក្រយល់ព្រមតាមការទាមទាររបស់កម្មករខាងលើហើយ ៕
ចែករំលែកព័តមាននេះ