រាជធានីភ្នំពេញ ៖ ដោយសារតែកម្ពុជាបានជួបនូវបញ្ហាជំងឺកូវីដ១៩ផង និងសហភាពអឺរ៉ុបបានដកប្រព័ន្ធអនុគ្រោះផ្នែកខ្លះនៃ «ទំនិញគ្រប់យ៉ាងលើកលែងតែសព្វាវុធ» (EBA) ផងធ្វើអោយវិស័យសហគ្រាសខ្នាតតូច និងមធ្យមកម្ពុជា (SME) ត្រូវធ្វើពិពិធកម្មខ្សែច្រវ៉ាក់របស់ខ្លួន ដើម្បីជំរុញដល់ការផលិត ដោះស្រាយបញ្ហប្រឈម និងស្វែករកទីផ្សារសម្រាប់ក្នុងស្រុក ។
ដើម្បីអោយវិស័យនេះកាន់តែមានសន្ទុះ និងរីកចម្រើននៅក្នុងប្រទេសកម្ពុជាបាននោះ ប្រធានសម្ព័ន្ធសហគ្រាសធុនតូច និងមធ្យមកម្ពុជាថា នឹងកៀងគរ SME ទាំងអស់ទៅជាបណ្ដុំទីតាំងមួយកន្លែង ដោយបច្ចុប្បន្ននេះ មានក្រុមហ៊ុនក្នុងស្រុកមួយ បានចាប់ផ្ដើមបង្កើតទីតាំងសម្រាប់ជួយដល់ SME ក្នុងការចងក្រងនេះហើយ ។
បើតាមលោកឧកញ៉ា តែ តាំងប៉រ ប្រធានសម្ព័ន្ធសហគ្រាសខ្នាតតូច និងមធ្យមកម្ពុជាបានមានប្រសាសន៍ថា វាដល់ពេលដែលសហគ្រាសទាំងអស់ចងក្រងជាបណ្ដុំហើយ ហើយបើសិនជាមិនចងក្រងជាបណ្ដុំតែមួយនោះ សហគ្រាសខ្នាតតូចនិងមធ្យមបានត្រឹមតែធ្វើអាជីវកម្មជាលក្ខណៈគ្រួសារ នៅតាមផ្ទះប៉ុណ្ណោះ ហើយរដ្ឋាភិបាលក៏ដូចជា FASME មិនដឹងពីខ្សែច្រវ៉ាក់ផលិត និងអាចជួយពួកគេបានដោយរបៀបណានោះទេ ។ លោកបានបន្តថា « បើសិនជាSME នៅតែបន្តសកម្មភាពតាមផ្ទះដដែលនោះ នៅពេលដែលរដ្ឋាភិបាលផ្ដល់អត្ថប្រយោជន៍អ្វីមួយ ក៏ពួកគាត់មិនបានទទួលដែលព្រោះថាអត្ថប្រយោជន៍ទាំងនោះ គេនឹងផ្ដល់ជូនតែក្នុងចង្កោមសហគ្រាសខ្នាតតូចនិងមធ្យមប៉ុណ្ណោះ » ។
លោកឧកញ៉ាបន្តថា បើសិនជាទីតាំងបណ្ដុំសហគ្រាសខ្នាតតូច និងមធ្យមដំបូងនេះបានសម្រួលនិងជួយដល់សហគ្រាសខ្នាតតូច និងមធ្យមច្រើន ថ្ងៃអនាគតលោកនឹងបន្តកៀងគរ SME អោយកាន់តែច្រើនក្នុងការចូលរួម និងចងជាបណ្ដុំតែមួយ ដើម្បីជំរុញការផលិត និងផ្គត់ផ្គង់លើទីផ្សារដោយកាត់បន្ថយនូវការនាំចូលពីបរទេស ។
តំបន់សហគ្រាសខ្នាតតូច និងមធ្យមត្រូវបានចំណាយប្រមាណ២៨លានដុល្លារដោយមិនទាន់រាប់បញ្ចូលតម្លៃដី ។ ការបង្កើតជាតំបន់សហគ្រាសខ្នាតតូចនិងមធ្យម គឺចង់ជំរុញអោយ SME នៅកម្ពុជាកាន់តែមានសមត្ថភាពផលិតបានកាន់តែច្រើនជាងមួយនឹងថ្លៃដើមកាន់តែទាប ដោយសារពួកគាត់ត្រូវជួលទីតាំងក្នុងតម្លៃទាបជាងមុន ។ លោកថា៖« ជាជំហានដំបូង MSE Cluster ត្រូវបានសង់ឡើងលើផ្ទៃដី ៦ហិចតា ហើយបើសិនជាមានការគាំទ្រពី SME យើងនឹងពង្រីកបន្ថែមទៀត ថែមទាំងពង្រីកអោយបានគ្រប់ខេត្តក្រុងផងដែរ ពីព្រោះថា SME មិនមែនមានតែនៅភ្នំពេញទេ គឺនៅបណ្ដាខេត្តក៏មានច្រើនដែរ »។
លោក Charles Esterhoy ស្ថាបនិកនិងជាអ្នកបង្កើតគម្រោងបណ្ដុំសហគ្រាសខ្នាតតូចនិងមធ្យម បានអោយដឹងថា ដំណោះស្រាយ ក្នុងការផ្សារភ្ជាប់គម្លាតរវាងអ្នក វិនិយោគផ្នែកផលិតកម្មអន្តរជាតិ និងសហគ្រាសធុនតូចនិងមធ្យមក្នុងប្រទេសរបស់យើងនោះគឺ ចាំបាច់ត្រូវតែ បង្កើតឡើងនិងដាក់ចេញនូវខ្សែច្រវ៉ាក់ផលិតកម្មពេញលេញមួយ ស្ថិតក្នុងប្រព័ន្ធបរិក្ខារ សម្របសម្រួល សេវាកម្ម គាំទ្រដោយប្រព័ន្ធបច្ចេកវិទ្យាព័ត៌មាននិងទំនាក់ទំនង ដែលមានលក្ខណៈបត់បែននិងឆ្លើយតបខ្ពស់។
ដោយប្រើ ប្រាស់នូវបច្ចេកវិទ្យាឧស្សាហកម្ម ៤.០ និង បញ្ចូលនូវបច្ចេកទេសគ្រប់គ្រងបែបសកម្ម ខ្សែចង្វាក់ផលិតកម្ម និង ប្រព័ន្ធទាំងនេះ ត្រូវបានផ្សាភា្ជប់ជាមួយគ្នា ដើម្បីអាចផលិតបាននូវទិន្នផលដែលមានតម្លៃខ្ពស់ សម្រាប់ទីផ្សារ ក្នុងស្រុកនិងក្រៅប្រទេស។ លោកថា៖«ដំណើរការសាងសង់នៃបណ្ដុំសហគ្រាសធុនតូចនិងមធ្យមទីមួយនេះនឹងចាប់ផ្ដើម ឡើងនៅក្នុងខែតុលា ឆ្នាំ២០២០ ហើយគ្រោង នឹងចាប់ដំណើរការជាផ្លូវការនៅក្នុងខែមេសា ឆ្នាំ២០២០១ខាងមុខ» ។
គួរបញ្ជាក់ថា បណ្តុំសហគ្រាសធុនតូចនិងមធ្យមផ្អែកលើប្រព័ន្ធគោលឧស្សាហកម្ម 4.0 ដែលមានលក្ខណៈខុសប្លែកពី តំបន់ សេដ្ឋកិច្ចពិសេស ឬសួនឧស្សាហកម្ម ឬចង្កោមសហគ្រាសដែលមានសព្វថ្ងៃនេះ គឺជាដំណោះស្រាយប្រកបដោយ នវានុវត្តន៍ដែលគាំទ្រដល់គោលដៅអភិវឌ្ឍន៍ឧស្សាហកម្ម និងដើរតួជាយាន្តដែលអាចជួយឲ្យសម្រេចបានកាន់តែ ងាយស្រួលនូវគោលនយោបាយរបស់រាជរដ្ឋាភិបាលកម្ពុជា ក្នុងការបង្កើតការងារផ្អែកលើជំនាញ ការអភិវឌ្ឍន៍ សហគ្រាសធុនតូចនិងមធ្យម ការពង្រីកការកែឆ្នៃផលិតផលកសិកម្ម និងការធ្វើពិពិធកម្មឧស្សាហកម្ម។
អ្វីដែល សំខាន់ជាងគេនោះគឺថាបណ្តុំសហគ្រាសធុនតូចនិងមធ្យមនេះ នឹងនាំមកនូវអនាគតមួយថ្មីសម្រាប់ សហគ្រាស ធុនតូចនិងមធ្យម សហគ្រិន និងការវិនិយោគលើវិស័យបច្ចេកវិទ្យាព័ត៌មាននិងទំនាក់ទំនង ក៏ដូចជាការវិនិយោគ លើ វិស័យផលិតកម្មនៅក្នុងប្រទេសកម្ពុជា ដោយនាំវិស័យទាំងអស់នេះ ឲ្យចូលរួមក្នុងច្រវ៉ាក់សង្វាក់ផលិតកម្មបាន ពេញលេញ ងប្រកបដោយការសហការនិងប្រកួតប្រជែង ៕
ចែករំលែកព័តមាននេះ