ខេត្តប៉ៃលិន ៖ កសិករវ័យចំណាស់១គ្រួសារ បានប្រកបរបរចិញ្ចឹមសត្វមាន់ ដើម្បីភ្ញាស់ពងលក់កូនតូចៗ មានការកាក់កប និងអាចរកប្រាក់ចំណូលសម្រាប់ផ្គត់ផ្គង់ជីវភាពគ្រួសារប្រចាំថ្ងៃ ។ លើសពីនេះ គាត់អាចសន្សំប្រាក់សម្រាប់ទិញម៉ាស៊ីនភ្ញាស់ពងមាន់ផ្ទាល់ខ្លួន រហូតដល់២គ្រឿងទៀតផង ហើយអាចរកប្រាក់ចំណូលបានក្នុង១ខែៗប្រហែល៣០០ដុល្លារ និងជួនកាលក៏អាចលើសនេះ ដោយមិនភ័យព្រួយពីការខ្វះខាតនោះឡើយ ។
ជួបជាមួយភ្នាក់ងារសារព័ត៌មានកាលពីថ្ងៃទី០៩ ខែកញ្ញា ឆ្នាំ២០២០ ស្ត្រីម្នាក់ឈ្មោះ ភួង ថា អាយុ៧០ឆ្នាំ មានប្តីឈ្មោះ ណូស សាន់ អាយុ៨៣ឆ្នាំ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន បានរៀបរាប់ឱ្យដឹងថា ៖ គ្រួសារវ័យចំណាស់របស់គាត់បានប្រកបរបរចិញ្ចឹមមេមាន់ ភ្ញាស់កូនលក់អស់រយ:ពេល២ឆ្នាំមកហើយ ដោយនៅឆ្នាំដំបូង គាត់មានការបរាជ័យយ៉ាងខ្លាំង ស្ទើរតែអស់រនូតអស់រនាបយំលែងចេញ ពោលគឺគ្មានសល់ថវិកាសម្រាប់ផ្គត់ផ្គង់ជីវភាពគ្រួសារនោះឡើយ ។
គាត់បន្តទៀតថា មូលហេតុ ដែលនាំឱ្យគាត់បរាជ័យបែបនេះ គឺដោយសារតែអត់ចេះពីរបៀបនៃការថែទាំកូនមាន់ មិនចេះដាក់ភ្លើងកំដៅ អត់ចេះចាក់វ៉ាក់សាំងការពារជំងឺអុត ជំងឺផ្តាសាយ បណ្តាលឱ្យកូនមាន់ងាប់អស់រាប់ពាន់ក្បាល ។ កាលពីគាត់ចាប់ផ្តើមចិញ្ចឹមដំបូងនៅឆ្នាំ២០១៩ គាត់បានដាក់មេមាន់ចំនួន៦០ក្បាល ហើយអត់មានទូភ្ញាស់ត្រឹមត្រូវនោះឡើយ ភ្ញាស់តាមរបៀបធម្មជាតិ លុះបំបែកពីមេអត់មានកំដៅគ្រប់គ្រាន់ ធ្វើឱ្យកូនមាន់រងាងាប់ជាបន្តបន្ទាប់ ។
គាត់បន្តទៀតថា លុះក្រោយពីរកថវិកាបានមួយចំនួន គាត់ក៏ទិញទូភ្ញាស់ចំនួន២គ្រឿង ហើយរៀនសូត្រតាមយូធូប និងមានការពន្យល់ពីម្ចាស់ទូភ្ញាស់ ទើបធ្វើឱ្យគាត់យល់កាន់តែច្បាស់ រហូតមកដល់ឆ្នាំ២០២០នេះ គាត់ចេះពីរបៀបថែទាំ និងចេះប្រើថ្នាំព្យាបាល ទើបធ្វើឱ្យកូនមាន់របស់គាត់កើតមក គឺរស់ទាំងអស់មិនមានងាប់ច្រើនដូចពីមុនឡើយ ។
គាត់បញ្ជាក់ទៀតថា ៖ ការលក់កូនមាន់ គឺបន្ទាប់ពីកូនញាស់បានរយ:ពេល២១ថ្ងៃ ដោយមានការចាក់ថ្នាំវ៉ាក់សាំងរួចរាល់ មានម៉ូយមកពីក្នុងក្រុងប៉ៃលិន ទិញយកទៅចិញ្ចឹម ដោយលក់១ក្បាលតម្លៃ៥០០០រៀល រីឯពងមាន់ គាត់លក់១គ្រាប់តម្លៃ១៥០០រៀល ។ រហូតមកដល់ពេលនេះ បទពិសោធន៍នៃការចិញ្ចឹមកូនមាន់របស់គាត់កាន់តែច្បាស់ ធ្វើឱ្យគាត់អាចលក់កូនមាន់បានប្រាក់ចំណូលក្នុង១ខែៗ ប្រហែលជា៣០០ដុល្លារ ហើយគាត់ក៏បន្តពង្រីកទ្រុងបន្ថែមទៀត នៅលើដីខាងក្រោយផ្ទះរបស់ខ្លួន ។
គាត់ក៏សំណូមពរឱ្យមានអង្គការ ឬខាងមន្ទីរកសិកម្មជួយបង្រៀនគាត់បន្ថែមទៀត ដើម្បីឱ្យគាត់មានជំនាញច្បាស់លាស់ ហើយក៏សូមអំពាវនាវដល់ប្រជាពលរដ្ឋរស់នៅក្នុងក្រុងប៉ៃលិន ដែលមានចំណាប់អារម្មណ៍ចង់ចិញ្ចឹមសត្វមាន់ស្រែ អាចទិញកូនមាន់របស់គាត់យកទៅចិញ្ចឹម ព្រោះជាប្រភេទមាន់ស្រែ តែមានមាឌធំ និងមានទម្ងន់ធ្ងន់ គាត់ក៏មានលក់ចំណីធម្មជាតិ សម្រាប់ដាក់ឱ្យកូនមានស៊ីឆាប់ធំលឿនផងដែរ ៕
ចែករំលែកព័តមាននេះ