រាជធានីភ្នំពេញ ៖ បុរសម្នាក់ចេញពីកម្មវិធីជួបជុំមិត្តភក្តិសង្ស័យផឹកស្រវឹងរួចបើករថយន្តដោយជើងជាន់ហ្គ៊ែរទាំងដេកលក់ ក៏ជ្រុលទៅបុករថយន្តដឹកផ្លែឈើយ៉ាងពេញពេញទំហឹង បណ្តាលអោយក្រឡាប់ជ្រុះផ្លែឈើរាយប៉ាយពេញផ្លូវ និងរងរបួសធ្ងន់២នាក់ស្រាល៤នាក់ ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៣និង២០នាទីទៀបភ្លឺថ្ងៃទី១០ ខែកញ្ញា ឆ្នាំ២០២០…
រាជធានីភ្នំពេញ ៖ បុរសម្នាក់ចេញពីកម្មវិធីជួបជុំមិត្តភក្តិសង្ស័យផឹកស្រវឹងរួចបើករថយន្តដោយជើងជាន់ហ្គ៊ែរទាំងដេកលក់ ក៏ជ្រុលទៅបុករថយន្តដឹកផ្លែឈើយ៉ាងពេញពេញទំហឹង បណ្តាលអោយក្រឡាប់ជ្រុះផ្លែឈើរាយប៉ាយពេញផ្លូវ និងរងរបួសធ្ងន់២នាក់ស្រាល៤នាក់ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៣និង២០នាទីទៀបភ្លឺថ្ងៃទី១០ ខែកញ្ញា ឆ្នាំ២០២០ នៅតាមបណ្តោយផ្លូវលេខ២៥៣ កែងនឹងផ្លូវលេខ២០២ ទល់មុខសាលាបឋមសិក្សាទឹកល្អក់ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។
ភាគីខាងរថយន្តមួយគ្រឿងម៉ាក RAV4 L ពណ៌ទឹកប្រាក់ ពាក់ស្លាកលេខ ភ្នំពេញ 2BC-3977 បើកបរដោយបុរសម្នាក់មិនស្គាល់អត្តសញ្ញាណ ស្ថិតក្នុងស្ថានភាពស្រវឹងជោកជាំ បានរបួសភ្នែកឆ្វេង រីឯរថយន្តរងការខូចខាតមួយកំណាត់ទាំងស្រុង ។ ដោយឡែកភាគីខាងរថយន្តដឹកផ្លែឈើជិះគ្នា៦នាក់ ម៉ាកសាំយ៉ុង ពណ៌ស ពាក់ស្លាកលេខ កំពត 2B-0808 បើកបរ និងអ្នករួមដំណើរ មិនស្គាល់អត្តសញ្ញាណ ក្នុងនោះប្រុស៥នាក់ និងស្រីម្នាក់ រងបួសធ្ងន់២នាក់គឺអ្នកបើកបរ និងបុរសម្នាក់ទៀតអង្គុយក្បែរអ្នកបើកបរ ក្រៅពីនោះរបួសស្រាល តែរថយន្តរងការខូចខាតមួយចំហៀងខាងឆ្វេង និងស្ដាំ បែកកញ្ចក់មុខ ហើយរថយន្តមានដឹកផ្លែឈើចម្រុះពេញមួយកំណាត់ក្រោយ ។
យោងតាមប្រភពព័ត៌មានពីបុរសម្នាក់ជាអ្នករួមដំណើរក្នុងរថយន្តដឹកផ្លែកបានប្រាប់អោយដឹងថា ពួកគាត់ទាំង៦នាក់ ជាអាជីវករលក់ផ្លែឈើបានជួលរថយន្តសាំយ៉ុងខាងលើ មកទិញ និងដឹកផ្លែឈើនៅផ្សារនាក់មាស ដើម្បីយកទៅលក់នៅខេត្តកំពង់ស្ពឺ ។
តាមប្រភពដដែលបានបន្តថា ខណៈទិញផ្លែឈើពេញរថយន្តរួចហើយ ពួកគាត់ក៏នាំគ្នាបើករថយន្តត្រឡប់ទៅខេត្តកំពង់ស្ពឺវិញ ដោយពេលធ្វើដំណើរតាមបណ្ដោយផ្លូវលេខ253 ក្នុងទិសដៅពីលិចទៅកើត ក្នុងល្បឿនយឺតល្មម លុះមកដល់ចំនុចកើតហេតុខាងលើ ក៏មានរថយន្ដមួយគ្រឿងម៉ាក RAV4 Lខាងលើ បើកបរដោយយុវជនម្នាក់ក្នុងស្ថានភាពស្រវឹងជោកជាំ បើករថយន្តលឿនដូចហោះ តាមបណ្ដោយផ្លូវលេខ202 ក្នុងទិសដៅពីជើងទៅត្បូង កាត់ទទឹងផ្លូវគ្នា ។
តាមប្រភពដដែលបានបន្តថា ដោយអ្នកបើកបររថយន្តម៉ាក RAV4 L ស្រវឹងរហូតដេកលក់បើករថយន្តជើងជាន់ហ្គ៊ែរទាំងដេកលក់ ទៅបុកចំពាក់កណ្តាលរថយន្តសាំយ៉ុងដឹកផ្លែឈើយ៉ាងពេញទំហឹងចំហៀងខាងស្តាំ បណ្តាលអោយរថយន្តដឹកផ្លែឈើក្រឡាប់ផ្ងារជើងរងការខូចខាត និងជ្រុះផ្លែឈើរាយប៉ាយពេញផ្លូវ បណ្ដាលឱ្យបុរស២នាក់ ជាអ្នកបើកបរ និងអ្នកអង្គុយជាប់អ្នកបើកបររងរបួសធ្ងន់ និង៤នាក់ទៀតរបួសស្រាល ។
តាមប្រភពដដែលបានបន្តថា ចំណែករថយន្តម៉ាក RAV4 L វិញ រងការខូចខាតខ្ទេចមួយកំណាត់មុខទាំងស្រុង និងឆ្លងចរន្តបណ្តាលអោយឆេះរថយន្ត ទាំងអ្នកបើកបរស្រវឹងដេកលក់អត់ដឹងខ្លួន ។ ភ្លាមៗនោះបានអ្នកនៅក្នុងរថយន្តសាំយ៉ុងដឹកផ្លែឈើចេញពីរថយន្តមកទាន់ ក៏នាំគ្នាជួយសង្គ្រោះទាញបុរសជាអ្នកបើកបររថយន្ត RAV4 L ចេញពីថយន្ត និងភ្ញាក់ផ្អើលដល់ប្រជាពលរដ្ឋក្បែរកន្លែងកើតហេតុនាំគ្នាទាញបំពង់ពន្លត់អគ្គិភ័យ បានអន្តរាគមន៍ទប់ស្កាត់ទាន់ពេលវេលា ។
តាមប្រភពព័ត៌មានពីម្ចាស់រថយន្តម៉ាក RAV4 L វិញបានប្រាប់អោយដឹងថា គាត់ទើបនឹងចេញពីកម្មវិធីជួបជុំមិត្តភ័ក្តិ ហើយផឹកស្រាបៀរអស់៦កំប៉ុង ក៏បើករថយន្តត្រឡប់ទៅផ្ទះវិញ នៅក្រោយវិទ្យាល័យបឹងសាឡាង ខណៈមកដល់កន្លែងកើតហេតុក៏ជួបគ្រោះថ្នាក់បែបនេះតែម្ដង ទាំងរូបគាត់ផ្ទាល់ក៏មិនដឹងខ្លួនថា គាត់បើករថយន្តរបៀបយ៉ាងម៉េច ទើបមកជួបគ្រោះថ្នាក់បែបនេះដែរ ។
ក្រោយកើតហេតុ ជនរងគ្រោះរងរបួសធ្ងន់ទាំង២នាក់ ត្រូវបានរថយន្តសង្គ្រោះគ្លីនិកឯកជនមកដឹកយកទៅព្យាបាលភ្លាមៗផងដែរ នៅសល់តែរថយន្តសាំយ៉ុងដឹកផ្លែឈើ ត្រូវបានក្រុមអាជីវករលើកផ្លែឈើចេញប្រគល់រថយន្ដទៅអោយសមត្ថកិច្ច រួមនឹងរថយន្តម៉ាក RAV4 Lយកទៅរក្សាទុកបណ្ដោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ