ខេត្តសៀមរាប ៖ យោងតាមការបកស្រាយរបស់លោកអភិបាលស្រុកបន្ទាយស្រីបានឲ្យដឹងថា ១៥ឆ្នាំ ដែលមានអភិបាលស្រុកចំនួន៦ បណ្តឹងតវ៉ាគ្នាទៅវិញទៅមក និងកិច្ចប្រជុំសម្របសម្រួលរាប់មិនអស់ ទីបំផុតទំនាស់ដីធ្លីដ៏សែនរ៊ាំរ៉ៃទាំងពីរករណីនៅក្នុងឃុំត្បែងនេះ ត្រូវបានបញ្ចប់ដោយការចាប់ដៃគ្នា សម្បទានទៅវិញទៅមក…
ខេត្តសៀមរាប ៖ យោងតាមការបកស្រាយរបស់លោកអភិបាលស្រុកបន្ទាយស្រីបានឲ្យដឹងថា ១៥ឆ្នាំ ដែលមានអភិបាលស្រុកចំនួន៦ បណ្តឹងតវ៉ាគ្នាទៅវិញទៅមក និងកិច្ចប្រជុំសម្របសម្រួលរាប់មិនអស់ ទីបំផុតទំនាស់ដីធ្លីដ៏សែនរ៊ាំរ៉ៃទាំងពីរករណីនៅក្នុងឃុំត្បែងនេះ ត្រូវបានបញ្ចប់ដោយការចាប់ដៃគ្នា សម្បទានទៅវិញទៅមក និងទទួលយកដំណោះស្រាយដោយស្នាមញញឹមរៀងៗខ្លួន កាលពីពេលថ្មីៗនេះ ។
លោក ឃឹម ហ្វីណង់ អភិបាលខេត្តស្រុកបន្ទាយស្រីបានលើកឡើងថា «អាចថា ជាថ្ងៃដែលខ្ញុំសប្បាយចិត្តបំផុតក្នុងរយៈពេល១១ខែ ក្នុងតួនាទីរបស់ខ្ញុំជាអភិបាលនៃស្រុកមួយដែលពោរពេញទៅដោយទំនាស់ដីធ្លីមួយនេះព្រោះពេលខ្លះខ្ញុំពិតជាមិនហ៊ាន សូម្បីតែសង្ឃឹមថា នឹងអាចរកច្រកចេញបានផង ។ ១៥ឆ្នាំនៃទំនាស់ទាំងនេះបានក្លាយជាឧបសគ្គដល់ការរស់នៅប្រកបដោយសុវត្ថិភាព និងស្ងប់អារម្មណ៍សម្រាប់ភាគីជម្លោះទាំងសងខាងខាតបង់ពេលវេលា និងបាត់បង់ឱកាសប្រើប្រាស់ដីធ្លីរបស់ខ្លួនឱ្យអស់សក្តានុពលដែលសូម្បីតែអាជ្ញាធរក៏ជាប់រវល់ដោះស្រាយខាតបង់ពេលវេលាសម្រាប់យកទៅអភិវឌ្ឍមូលដ្ឋានមិនតិចដែរ ។
លោកបន្តថា លោកសូមថ្លែងអំណរគុណយ៉ាងជ្រាលជ្រៅដល់លោក ឃុន ហាំង ទេសរដ្ឋមន្ត្រីទទួលបន្ទុកបេសកម្មពិសេស និងជាអនុប្រធានប្រចាំការនៃអាជ្ញាធរជាតិដោះស្រាយទំនាស់ដីធ្លី ដែលបានតំណាងឱ្យឯកឧត្តមឧបនាយករដ្ឋមន្ត្រី ជា សុផារ៉ា អញ្ជើញចុះមកដោះស្រាយដោយផ្ទាល់ដល់ស្រុកបន្ទាយស្រី រកឃើញចំនុចឈ្នះទាំងសងខាងលើបញ្ហាជម្លោះ ដែលធ្វើឱ្យមានការបន្ទន់ឥរិយាបថ និងព្រមទទួលយកដំណោះស្រាយដែលអាជ្ញាធរបានប្រឹងប្រែងស្វែងរកជូន ។
លោកបន្តថា«ក្នុងនាមរដ្ឋបាលស្រុក ខ្ញុំសង្ឃឹមយ៉ាងមុតមាំថា ករណីនេះនឹងក្លាយទៅជាបន្ទាត់សម្រាប់ដោះស្រាយករណីដទៃទៀតក្នុងរូបមន្តប្រហាក់ប្រហែលគ្នា ហើយក៏សូមទទូចដល់ភាគីករណីវិវាទដីធ្លីផ្សេងៗទៀត នៅក្នុងស្រុកបន្ទាយស្រីឱ្យបន្ទន់ជំហរសម្បទានគ្នា និងចាប់យកការចរចាជាច្រកចេញ ជៀសវាងការខាតបង់ពេលវេលាដើរលើផ្លូវទាល់ច្រក ជាពិសេសចំពោះរាល់ករណីវិវាទដែលជាប់ពាក់ព័ន្ធនឹងដីគម្របព្រៃឈើរបស់រដ្ឋ» ។
សូមបញ្ជាក់ថា វិវាទដីធ្លីដែលស្មុគស្មាញបំផុតនៅក្នុងស្រុកបន្ទាយស្រី គឺវិវាទដែលមានការអូសបន្លាយយូរអង្វែង និងស្ថិតនៅលើដីគម្របព្រៃដែលជាដីសាធារណៈរបស់រដ្ឋនៅឡើយ ដែលសូម្បីតែឯកសារបញ្ជាក់ការកាន់កាប់នានាសុទ្ធសឹងតែមានវិការៈខាងផ្នែកផ្លូវច្បាប់ ហើយយន្តការតុលាការក៏មិនអាចធ្វើឡើងបាន ដោយសារតែជាទំនាស់នៅលើដីរបស់រដ្ឋ ។
វិវាទបែបនេះ ទោះបីមានការព្រមព្រៀងពីភាគីជម្លោះហើយក៏ដោយ ក៏ត្រូវបំពេញនីតិវិធីខាងផ្លូវច្បាប់បន្តទៀត និងត្រូវរង់ចាំការអនុម័តចុងក្រោយពីរាជរដ្ឋាភិបាលជាមុនសិន ទើបអាចបញ្ចប់ជាផ្លូវការទៅបាន ៕
ចែករំលែកព័តមាននេះ