រាជធានីភ្នំពេញ ៖ តើអ្នកណាខ្លះ ស្គាល់ពីប្រវត្តិលុយ?តើលុយកកើតយ៉ាងដូចម្តេច? ថ្ងៃនេះយើងបានលើកយកប្រធានបទដែលទាក់ទងនឹងប្រវត្តិលុយ ដោយការបកស្រាយនេះ ត្រូវបានលើកឡើងពីអ្នកជំនាញ និងជាអ្នកល្បីល្បាញម្នាក់ខាងផ្នែកអចលនទ្រព្យក្នុងប្រទេសកម្ពុជា ។ មនុស្សគ្រប់រូបតែងតែត្រូវការលុយកាក់សម្រាប់…
រាជធានីភ្នំពេញ ៖ តើអ្នកណាខ្លះ ស្គាល់ពីប្រវត្តិលុយ?តើលុយកកើតយ៉ាងដូចម្តេច? ថ្ងៃនេះយើងបានលើកយកប្រធានបទដែលទាក់ទងនឹងប្រវត្តិលុយ ដោយការបកស្រាយនេះ ត្រូវបានលើកឡើងពីអ្នកជំនាញ និងជាអ្នកល្បីល្បាញម្នាក់ខាងផ្នែកអចលនទ្រព្យក្នុងប្រទេសកម្ពុជា ។
មនុស្សគ្រប់រូបតែងតែត្រូវការលុយកាក់សម្រាប់ ជីវភាព និងជីវិតរស់នៅប្រចាំថ្ងៃ ដែលពឹងពាក់ទៅលើការប្រកបការងារ អាជីវកម្ម និងកសិកម្ម ។ល ។ ដើម្បីដូរ ឬបានលទ្ធផលត្រឡប់មកវិញជាប្រាក់ខែ កម្រៃ ឬប្រាក់ចំណូលនានា ក្នុងការផ្គត់ផ្គង់ត្រឡប់ទៅវិញនៃការរស់នៅ ។
ថ្មីៗនេះ លោក ស៊ាន ធនិន ជាអគ្គនាយកក្រុមហ៊ុន CEO Master Club Investment បានឱ្យដឹងថា «បន្ទាប់ពីមានប្រាក់កាស់ក្នុងដៃហើយ មនុស្សជាច្រើនបានចាយលុយទៅតាមតម្រូវការ ភាពចំបាច់ និងផ្សេងៗទៀតទៅតាមជីវិតឬជីវភាពរស់នៅរបស់ពួកគេ ។ អ្នកខ្លះសន្សំលុយ ដើម្បីចំណាយប្រាក់កាក់ទៅលើភាពចាំបាច់ រឿងចង់បាន និងអ្នកខ្លះសន្សំ ដើម្បីវិនិយោគផង ទាំងនេះគឺជាការចាត់ចែងលុយរបស់យើងប្រចាំថ្ងៃ» ។ លោកបានបន្តថា ចុះហេតុអ្វីបានជាមនុស្សឱ្យតំលៃលុយសំខាន់ម្ល៉េះ ហេតុអ្វីបានជាលុយត្រូវប្រយ័ត្នប្រយែងចាត់ចែងដល់ម្លឹង?តើលុយនឹងពីដំបូងឡើងវាយ៉ាងម៉េច បានមកបច្ចុប្បន្ននេះវាចាំបាច់ដល់ម្លឹង? អ្នកខ្លះបាននិយាយថា លុយមិនសំខាន់ សំខាន់គឺអត់លុយ ។
តាំងពីយូរលង់ណាស់មកហើយ តាំងពី៣០០០ ឆ្នាំមុន រូបរាងនៃលុយមិនទាន់កកើតជារូបរាងដូចលុយយើងនាពេលបច្ចុប្បន្ននេះទេ វាមានទំរង់ ឬប្រភេទផ្សេងៗគ្នា ទៅតាមរូបភាពនៃការដោះដូរទំនិញ ។ ប៉ុន្តែមុនពេលបន្តបកស្រាយអំពីលុយ លោក ស៊ាន ធនិន បានលើកយកនិយមន័យខ្លះៗដែលមានមតិលើកឡើងផ្សេងៗអំពីនិយមន័យនៃលុយថា មានអ្នកខ្លះបាននិយាយ លុយគឺជាមធ្យោបាយនៃការទិញ អ្នកខ្លះទៀតបានលើកឡើងថាលុយ គឺវត្ថុមួយដែលដំណាងតំលៃអ្វីមួយសម្រាប់ការដោះដូរ ។
សម្រាប់លោក លោក ស៊ាន ធនិន វិញបានឱ្យនិយមន័យលុយថា ឱ្យតែបំពេញមុខងារ ឬលក្ខណៈ ៤នេះ គឺគេហៅថាលុយហើយ។ លោកបន្តថាមុខងារ ៤ តើមានអ្វីខ្លះៗ លោកបានរៀបរាប់ដូចនេះថា មុខងារទី១) គឺ ការដោះដូរ ៖ មានថាន័យថាលុយ វាអាចអនុញ្ញាតឱ្យយើងដោះដូរ ទំនិញនិងសេវាកម្មនឹងបាន ដូចនេះរាល់អ្វីៗទាំងឡាយណាដែលបំពេញមុខងារ ដោះដូរពាណិជ្ជកម្ម គេរាប់វាជាលុយហើយ។ ឩទាហរណ៍ថា យើងចង់បានស្ករគ្រាប់ ហើយយើងមានការ៉េម ចឹងយើងអាចយកការ៉េមទៅដោះដូរ ជាមួយស្ករគ្រាប់បាន (ដោះដូរស្មើ) មុខងារទី២) គឺមធ្យោបាយនៃការទូទាត់ ៖ ឧទាហរណ៍ថា យើងចង់ទិញអ្វីមួយ យើងចង់បានអ្វីមួយ ហើយយើងយក លុយនឹងឬអ្វីដែលជាតំណាងនៃលុយនឹង យកវាទៅបង់ឱ្យគេ ដើម្បីបានរបស់នេះមក ជួលកាលយើងអត់ចង់បារីនឹងទេ តែយើងចង់បានស្ករគ្រាប់ ចឹងយើងត្រូវយកអ្វីដើម្បីបានឱ្យស្ករគ្រាប់។
ដូចនេះ ដើម្បីបានស្ករគ្រាប់នេះមក យើងត្រូវមានអ្វីសម្រាប់បង់ឱ្យគេវិញដែរ ។ មុខងារទី៣) គឺ ជាឯកតានៃការវាស់វែង ៖ ឧទាហរណ៍ថា ផ្ទះល្វែង និងផ្ទះវីឡា តើវាខុសថ្លៃគ្នាប៉ុន្មាន? ចឹងដើម្បីដឹងថាខុសគ្នាប៉ុណ្ណា គឺត្រូវយកលុយទៅវាស់ ។ ចឹងផ្ទះល្វែងមានតំលៃ ៥០,០០០ ដុល្លារអារមេរិក រីឯផ្ទះវីឡា តំលៃ ១៥០,០០០ ដុល្លារអាមេរិក ចឹងយើងឃើញហើយថា តំលៃ ផ្ទះវីឡា ថ្លៃជាងផ្ទះល្វែង ១០០,០០០ ដុល្លារអាមេរិក ចឹងយើងដឹងថាថ្លៃគ្នាប៉ុណ្ណា គឺគេយកតួរលេខលុយនេះហើយបានដឹង។ មុខងារទី៤) គឺរក្សាតំលៃរបស់វា ៖ ឧទាហរណ៍ថា យើងសន្សំលុយ ចឹងយើងគិតថា សន្សំលុយបើទោះជា ៥ ឆ្នាំក្រោយ លុយនឹងក៏នៅតែមានតំលៃ ព្រោះបើមិនចឹងប្រហែលយើងសន្សំត្រីបាត់ហើយ មែនទេ? ចុះបើទីញរបស់របរប្រើប្រាស់ ចុះបើវាបែកបាក់ចឹងវាមិនបាត់តំលៃ។ ប៉ុន្តែលុយវានៅតែរក្សាតំលៃ។
ងាកមកមើលមាសវិញ មាសគឺនៅតែមានតំលៃ ហើយអាចដូរបាន ឬលក់បានជាលុយត្រឡប់មកវិញ ដែលវានៅរក្សាតំលៃ ហើយទុកបានយូរទៀត។ គ្រាន់តែថា វត្ថុទាំងពីរនេះ (លុយនិងមាស) វាអាចធ្លាក់តំលៃបន្តិចបន្តួច ឬឡើងតំលៃកប់ពពកក៏ថាបាន វាអាចប្រែប្រួលទៅតាមស្ថានភាព នានាផងដែរ។ លោក ស៊ាន ធនិន បានបន្ថែមថា មកលុយវាអាចបំពេញមុខងារទាំងនេះហើយ ទើបមនុស្សសន្សំវា ចឹងប្រសិនបើវាជាក្រដាស ជាកាក់ ជាមាស ជាដើមនឹង គឺគេហៅថាលុយហើយ៕
ចែករំលែកព័តមាននេះ