ឥណ្ឌា ៖ តារាសម្តែងបូលីវូដ (Bollywood) នាង Rhea Chakraborty ត្រូវបានចាប់ខ្លួនដោយអាជ្ញាធរត្រួតពិនិត្យគ្រឿងញៀនរបស់ឥណ្ឌា ពីបទទិញថ្នាំញៀនសម្រាប់ផ្តល់ឲ្យមិត្តប្រុសរបស់នាងគឺលោក Sushant Singh Rajput ដែលគេស្គាល់ថាជាតួឯកប្រុស ក្នុងរឿងជីវិតស្ត្រីមេផ្ទះ។ គួររំលឹកថា សោកស្តាយ! តួឯកប្រុស «ម៉ាណាវ» ក្នុងរឿងជីវិតស្ត្រីមេផ្ទះ បានបាត់បង់ជីវិតហើយ
សូមរំលឹកថា តារាសម្តែងដ៏ល្បីល្បាញរបស់បូលីវូដ លោក Sushant Singh Rajput អាយុ ៣៤ឆ្នាំត្រូវបានគេរកឃើញថា បាត់បង់ជីវិតនៅក្នុងផ្ទះរបស់ខ្លួន ដែលមានទីតាំងនៅទីក្រុង Mumbai កាលពីថ្ងៃទី ១៤ ខែមិថុនាកន្លងទៅ។ ដោយប៉ូលីសបានបញ្ជាក់ថា ជាករណីធ្វើអត្តឃាត។ ប៉ុន្តែក្រុមគ្រួសាររបស់ Rajput បានចុះបញ្ជីបណ្តឹងរបស់ប៉ូលីសប្រឆាំងនឹង Chakraborty ដោយចោទប្រកាន់នាងជាប់ពាក់ព័ន្ធនឹងការធ្វើអត្តឃាតរបស់តារាសម្តែងប្រុសរូបនេះ។
នាងមិនទាន់ធ្វើការអត្ថាធិប្បាយផ្លូវការណាមួយនៅឡើយទេ ប៉ុន្តែនាងធ្លាប់បានបដិសេធរាល់ការធ្វើខុសទាំងអស់ នៅក្នុងសេចក្តីថ្លែងការណ៍កាលពីពេលកន្លងទៅ។ ពាក់ព័ន្ធនឹងរឿងនេះ បងប្អូនប្រុសរបស់នាងគឺលោក Showik និងអតីតអ្នកគ្រប់គ្រងផ្ទះរបស់លោក Rajput គឺលោក Samuel Miranda ក៏ត្រូវបានចាប់ខ្លួនកាលពីសប្តាហ៍មុនផងដែរ នៅក្នុងករណីគ្រឿងញៀនដូចគ្នា។ ប៉ុន្តែការចោទប្រកាន់លើពួកគេ មិនត្រូវបានបង្ហាញឲ្យដឹងនោះទេ។
ប៉ុន្តែបើយោងតាមសារព័ត៌មានជាច្រើនរបស់ឥណ្ឌា បានរាយការណ៍ថា អ្នកទាំង ៣ (Chakraborty, Showik និង Miranda) ត្រូវរងការចោទប្រកាន់ពីបទរៀបចំ និងផ្តល់ថ្នាំញៀនប្រភេទ Cannabis ដល់ Rajput ។ ហើយករណីនេះ ក៏ជាប់ពាក់ព័ន្ធទៅនឹងការស៊ើបអង្កេតលើការបាត់បង់ជីវិតរបស់លោក Rajput ផងដែរ។
ការិយាល័យត្រួតពិនិត្យគ្រឿងញៀន (NCB) បានស្នើសុំឲ្យតុលាការឃុំឃាំង Chakraborty ដើម្បីបន្តសាកសួរបន្ថែមទៀត ខណៈរបាយការណ៍មួយបានបង្ហាញថា នាងគឺជាផ្នែកមួយ ដែលជាប់ពាក់ព័ន្ធនឹងគ្រឿងញៀនដ៏សកម្មម្នាក់។
ជុំវិញករណីខាងលើនេះ ចៅក្រមក៏បានសម្រេចច្រានចោលការសុំធានានៅក្រៅឃុំរបស់នាង និងបាននាំខ្លួននាងទៅកាន់មន្ទីរឃុំឃាំងតុលាការរហូតដល់ថ្ងៃទី ២២ ខែកញ្ញា៕ (ដកស្រង់ចេញ BBC)
ចែករំលែកព័តមាននេះ