ខេត្តបាត់ដំបង ៖ ទណ្ឌិតម្នាក់ត្រូវកម្លាំងផ្នែកអនុវត្តស៊ដីកានៃការិយាល័យព្រហ្មទណ្ឌកំរិតធ្ងន់ចាប់ខ្លួនភ្លាមៗតាមដីកាតុលាការ នៅវេលាម៉ោង៩និង៣០នាទីព្រឹកថ្ងៃទី៩ កញ្ញា ខណ:ដែលជននេះកំពុងធ្វើដំណើតាមដងផ្លូវ នៅខាងមុខយោធភូមិភាគទី៥ ស្ថិតក្នុងភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង ដែលជាប់ចោទពីបទ «ជូញដូរគ្រឿងញៀន»។
នាយរងការិយាល័យព្រហ្មទណ្ឌកំរិតធ្ងន់ទទូលផ្នែកអនុវត្តដីកា លោក កង សុផាណ្ណា បានឱ្យដឹងថា ជនជាប់ចោទឈ្មោះ ចៅ ឃុន ហៅកាំង អាយុ៣៧ឆ្នាំ នៅភូមិរំចេក១ សង្កាត់រតនះ ក្រុងបាត់ដំបង។ ជននេះត្រូវកម្លាំងរបស់លោកចាប់ខ្លួនតាម ដីកាបង្គាប់ឲ្យចាប់ខ្លួន.ឃុំខ្លួន លេខ៥៦៧ ចុះថ្ងៃទី ០៣ ខែកញ្ញា ឆ្នាំ២០២០ ដោយលោក ជុំ សង្វា ចៅក្រមជំនុំជម្រះ នៃសាលាដំបូងខេត្ត។
បើយោងលើដីការបស់លោក ជុំ សង្វា ចៅក្រមជំនុំជម្រះ ឈ្មោះ ចៅ ឃុន ហៅ កាំង ត្រូវបានតំណាងអយ្យការអមសាលាដំបូងខេត្ត ចោទប្រកាន់ពីបទ«រក្សាទុក, ដឹកជញ្ជូន និង ជួញដូរដោយខុសច្បាប់នូវសារធាតុញៀន»ដែលប្រព្រឹត្តនៅភូមិសំរោងតាកុក ឃុំសំរោងក្នុង ស្រុកឯកភ្នំ កាលពីថ្ងៃទី២១ ខែធ្នូ ឆ្នាំ២០១៩ កន្លងទៅ ។
បើតាមសមត្ថកិច្ចបាននិយាយថា នៅក្នុងការប្រព្រឹត្តបទល្មើស ជននេះមិនត្រូវបានសមត្ថកិច្ចចាប់ខ្លួនបានភ្លាមៗទេ។ ជននេះបានព្យាយាមរត់គេចពីផ្ទះ រហូតឃើញស្ថានភាពស្ងប់ស្ងាត់បន្តិច ស្រាប់តែគេឃើញជននេះបង្ហាញមុខ ទើបត្រូវកម្លាំងការិយាល័យព្រហ្មទណ្ឌកំរិតធ្ងន់ តាមស្ទាក់ជាប់រួចអានដីកាឱ្យស្ដាប់តែម្ដង ។
លោក កង សុផាណ្ណា បានបញ្ជាក់ថា បើយោងតាមដីកាបង្គាប់ឱ្យចាប់.ឃុំខ្លួន ទណ្ឌិត ចៅ ឃុន ហៅ កាំង នេះត្រូវបានតុលាការបើកការជំនុំជម្រះរួចហើយ ដោយផ្តន្ទាទោស ជាប់គុកចំនួន៣ឆ្នាំ ដោយគិតចាប់ពីថ្ងៃចាប់ខ្លួនបាន។ ពេលនេះ កម្លាំងផ្នែកអនុវត្តដីការបស់លោកបានបញ្ជូនជននេះ ទៅកាន់សាលាដំបូងខេត្ត ដើម្បីចាត់ការតាមនិតិវិធី ៕
ចែករំលែកព័តមាននេះ