រាជធានីភ្នំពេញ ៖ រដ្ឋបាលរាជធានីភ្នំពេញអំពាវនាវសុំឲ្យពលរដ្ឋទុកដាក់សំរាមឱ្យបានត្រឹមត្រូវក្នុងឱកាសថ្ងៃឈប់សម្រាកនៃពិធីបុណ្យភ្ជុំបិណ្ឌ ដើម្បីធានាឲ្យរាជធានីភ្នំពេញនៅតែរក្សាបានភាពស្អាតគ្មានគំនរសំរាមរាយប៉ាយនៅតាមដងផ្លូវ ។
ក្នុងឱកាសប្រជាពលរដ្ឋបានឈប់សម្រាកក្នុងឱកាសបុណ្យភ្ជុំបិណ្ឌ រដ្ឋបាលរាជធានីភ្នំពេញបានចេញសេចក្តីជូនដំណឹងឲ្យពលរដ្ឋបន្តទុកដាក់សំរាមក្នុងឱកាសថ្ងៃឈប់សម្រាកនៃពិធីបុណ្យភ្ជុំបិណ្ឌដែលត្រូវនឹងនៅថ្ងៃទី១៦ ,១៧ និងថ្ងៃទី១៨ ខែកញ្ញា ឆ្នាំ២០២០នេះ ។
ការអំពាវនាវនេះបានធ្វើឡើង ដោយសារតែបុគ្គលិក កម្មករ របស់ក្រុមហ៊ុនស៊ីនទ្រី មួយចំនួនត្រូវបានឈប់សម្រាកពីការងារធ្វើដំណើរទៅកាន់ស្រុកកំណើតរបស់ពួកគាត់នៅតាមបណ្តាខេត្តនានា ដែលធ្វើឱ្យការផ្តល់សេវាសម្អាត ប្រមូល និងដឹកជញ្ជូនសំរាម សំណល់រឹង ក្នុងរាជធានីភ្នំពេញមានភាពរអាក់រអួលមិនបានពេញលេញដូចថ្ងៃធម្មតានោះទេ ។
ដូចនេះ ដើម្បីថែរក្សាសោភណភាព អនាម័យ បរិស្ថាន រាជធានីភ្នំពេញ សូមអំពាវនាវដល់បងប្អូនប្រជាពលរដ្ឋជាម្ចាស់លំនៅឋានម្ចាស់អាជីវកម្ម សេវាកម្ម ដែល មានទីតាំងនៅក្នុងរាជធានីភ្នំពេញទាំងអស់ សូមមេត្តាយោគយល់ និងអធ្យាស្រ័យ កុំបញ្ចេញសំរាមសំណល់រឹងមកដាក់នៅតាមដងផ្លូវសាធារណៈនៅ ក្នុងអំឡុងពេលថ្ងៃឈប់សម្រាកនេះ ដោយសូមរក្សាការទុកដាក់សំរាមឱ្យបានត្រឹមត្រូវនៅក្នុងទីតាំងរៀងៗខ្លួនជាបណ្តោះអាសន្នសិន ។
រដ្ឋបាលរាជធានីភ្នំពេញសង្ឃឹមជឿជាក់ថា ម្ចាស់លំនៅឋាន ម្ចាស់អាជីវកម្ម សេវាកម្ម និងបងប្អូនប្រជា ពលរដ្ឋក្នុងរាជធានីភ្នំពេញទាំងអស់នឹងចូលរួមចំណែកថែរក្សាអនាម័យបរិស្ថានរាជធានីភ្នំពេញយើងឱ្យបានល្អប្រសើរជាមិនខាន ៕
ចែករំលែកព័តមាននេះ