អ្នកព្រៃវែង ក្នុងស្រុកមេសាង ជាច្រើនគ្រួសារ កាន់ប័ណ្ណក្រីក្រ ចុះថតផ្ទះផ្ទាល់ទើបដឹង!
ខេត្តព្រៃវែង ៖ ក្រោយពីមានគណនីហ្វេសប៊ុកមួយ ឈ្មោះ ទិត សុខុម បានផ្សព្វផ្សាយព័ត៌មានលើបណ្តាញសង្គមហ្វេសប៊ុក (Facebook) កាលពីថ្ងៃទី០២ ខែកញ្ញា…
ខេត្តព្រៃវែង ៖ ក្រោយពីមានគណនីហ្វេសប៊ុកមួយ ឈ្មោះ ទិត សុខុម បានផ្សព្វផ្សាយព័ត៌មានលើបណ្តាញសង្គមហ្វេសប៊ុក (Facebook) កាលពីថ្ងៃទី០២ ខែកញ្ញា ឆ្នាំ២០២០ ដោយចោទប្រកាន់ទៅលើក្រុមការងារកំណត់អត្តសញ្ញាណកម្មគ្រួសារក្រីក្រថា មានប័ណ្ណសមធម៌ហើយ(ប័ណ្ណក្រីក្រ) ក៏ប៉ុន្តែមិនបានទទួលថវិកា តាមគោលការណ៍របស់រាជរដ្ឋាភិបាលទេ ។
គណនីហ្វេសប៊ុកឈ្មោះ ទិត សុខុម បានសរសេរថា «ប្រជាពលរដ្ឋជាច្រើនគ្រួសារ ដែររស់នៅក្នុងឃុំស្វាយជ្រុំ ស្រុកមេសាង ខេត្តព្រៃវែង សូមអំពានាវដល់រាជរដ្ឋាភិបាល និងសម្ដេចពុក មេត្តាជួយពួកគាត់ផង ព្រោះពួកគាត់កំពុងតែជួបទុក្ខលំបាកយ៉ាងខ្លាំង ដោយសារមានប័ណ្ណសមធម៌ ហើយក៏ប៉ុន្តែមិនបានទទួលថវិកា តាមគោលការណ៍របស់រាជរដ្ឋាភិបាលទេ ហេតុដូច្នេះហើយពួកគាត់ សូមស្នើទៅដល់ប្រមុខរាជរដ្ឋាភិបាល និងសម្ដេចពុក មេត្តាជួយរកយុត្តិធម៌ជូនពួកគាត់ផង សូមអរគុណ» ។
ជាការផ្លើយតប តាមរយៈមន្ត្រីក្រសួងផែនការ បានអោយដឹងយ៉ាងដូច្នេះថា ក្រសួងផែនការបានជម្រាបជូនជនរួមជាតិយើងជារៀងរាល់ដងថា កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងគ្រួសាររងគ្រោះប៉ះពាល់ដោយសារ Covid-19 របស់រាជរដ្ឋាភិបាលកម្ពុជា គឺផ្តល់ជូនតែ គ្រួសារក្រីក្រពិតប្រាកដ តែប៉ុណ្ណោះ ។
ប៉ុន្តែមានបុគ្គល (ទិត សុខុម) ដែលខិតខំបំផ្លើសព័ត៌មាននេះ មានបំណងអ្វី គាត់ចង់មានទោស ឬយ៉ាងណា ? ក្រុមការងារ និង អាជ្ញាធរមូលដ្ឋាន បានចុះដល់មូលដ្ឋានពួកគាត់ផ្ទាល់ ឃើញថា ស្ថានភាពប្រជាជនទាំងនោះ មានជីវភាពប្រសើរ ដូចក្នុងរូបភាព ឯបុគ្គល ទិត សុខុម គាត់បានគេចខ្លួន មិនចូលរួមបំភ្លឺឡើយ ។
ទោះជាយ៉ាងណា ក៏មានមតិមួយចំនួននៅលើបណ្ដាញសង្គម បានលើកឡើងថា ក្រសួងបានរកឃើញថា ប្រជាពលរដ្ឋច្រើនគ្រួសាររស់នៅក្នុងឃុំស្វាយជ្រុំ ស្រុកមេសាង ខេត្តព្រៃវែង មានជីវភាពប្រសើរ ហេតុអ្វីហ្វេសប៊ុក«ទិត សុខុម»បានបង្ហាញរូបភាពនីមួយៗ ពួកគាត់មានប័ណ្ណសមធម៌(ប័ណ្ណក្រីក្រ) ?
សូមរម្លឹកដែរថា កាលពីថ្ងៃទី៣០ មិថុនា ពាក់ព័ន្ធករណីបន្លំធ្វើជាគ្រួសារក្រីក្រនេះដែរ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានថ្លែងព្រមាន ចាត់វិធានការក្ដៅ ទៅកាន់អាជ្ញាធរមូលដ្ឋាន គឺមេភូមិ និងក្រុមប្រឹក្សាឃុំ/សង្កាត់ ប្រសិនបើរកឃើញថា នៅក្នុងភូមិ និងឃុំ/សង្កាត់មួយណា មានករណីមិនប្រក្រតី ក្នុងការផ្ដល់សាច់ប្រាក់ ជូនពលរដ្ឋក្រីក្រនោះ ។
កន្លងមក កោះសន្តិភាព ធ្លាប់ចុះផ្សាយរួចមកហើយ «មើលផ្ទះអ្នកក្រីក្រ ២គ្រួសារ នៅប៉ៃលិន ដែលតវ៉ាចង់បានប័ណ្ណសមធម៌(ប័ណ្ណក្រីក្រ)» ។ ក្រោយទទួលបានព័ត៌មាននេះ រដ្ឋបាលខេត្តបានដឹកនាំក្រុមការងារចុះពិនិត្យ និងធ្វើការសម្ភាសន៍ផ្ទាល់ ឃើញថា ម្តាយឪពុកគាត់ជាចាស់ជរានោះ គឺជាគ្រួសារដែលមានជីវភាពសមរម្យ មានផ្ទះថ្មមួយល្វែង មានដីចំការចំនួន០៣ហិកតា និងមានសម្ភារៈ ប្រើប្រាស់ដូចជាម៉ូតូជាដើម ៕
ចែករំលែកព័តមាននេះ