ADផ្ទាំងផ្សព្វផ្សាយពាណិជ្ជកម្ម

អំពាវនាវកសិករសន្សំសំចៃទឹកទុកប្រើប្រាស់ ខណៈព្រួយបារម្ភបញ្ហាកង្វះខាតទឹក

3 ឆ្នាំ មុន

កំពង់ចាម
០៨ ខែ កញ្ញា ឆ្នាំ ២០២០ ម៉ោង ១៤:៤៨

ខេត្តកំពង់ចាម ៖ ស្ថានភាពកំពស់ទឹកទន្លេមេគង្គនៅក្នុងឆ្នាំ២០២០នេះ នឹងអាចបង្កផលប៉ះពាល់ដោយប្រជាកសិកររស់នៅ ស្របតាមដងទន្លេប្រឈមនឹងកង្វះខាតទឹកសម្រាប់បង្កបង្កើនផលដំណាំស្រូវរួមនិងដំណាំផ្សេងៗទៀតផងដែរ។ លោក ចាន់ដា អភិបាលខេត្ត មានប្រសាសន៍ឲ្យដឹងនៅក្នុងពិធីសម្ពោធដាក់ឱ្យប្រើប្រាស់ស្នាក់ការគណបក្សប្រជាជនកម្ពុជាឃុំអូរស្វាយ ស្រុកកំពង់សៀម…

លោក ចាន់ដា អភិបាលខេត្ត មានប្រសាសន៍ឲ្យដឹងនៅក្នុងពិធីសម្ពោធដាក់ឱ្យប្រើប្រាស់ស្នាក់ការគណបក្សប្រជាជនកម្ពុជាឃុំអូរស្វាយ ស្រុកកំពង់សៀម កាលពីព្រឹកថ្ងៃទី៥ កញ្ញា២០២០ ដោយលើកឡើងថា កត្តាធម្មជាតិនៅក្នុងឆ្នាំនេះហាក់បីដូចជាមានការប្រែប្រួល ហើយទឹកភ្លៀងបានបង្អុរធ្លាក់ចុះមកក៏នៅមានកម្រិតនៅឡើយ ហើយកំពស់ទឹកទន្លេមេគង្គត្រឹមតែជាង៨ម៉ែត្រ ដោយមិនបានធ្វើឱ្យព្រែកបឹងបួរនានាប្របតាមដងទន្លេ មានទឹកចូលត្រៀបត្រានោះទេ។

លោកអ៊ុន ចាន់ដា អភិបាលខេត្ត មានប្រសាសន៍បន្តថា ដោយសារតែកំពស់ទឹកទន្លេនៅទាបបែបនេះនិងជះឥទ្ធិពលបង្កផលវិបាកដល់ប្រជាកសិករដែលមានស្រុកនៅជាប់នឹងដងទន្លេ ត្រូវប្រឈមនឹងកង្វះខាតទឹកសម្រាប់ប្រើប្រាស់ ស្រោចស្រពដំណាំស្រូវ។កាលពីឆ្នាំ២០១៩ ក្នុងរយៈពេលខែដូចគ្នាកំពស់ទឹកទន្លេឡើងដល់រហូតជាង១៤ម៉ែត្រ ព្រែកបឹងបួរត្រូវទឹកហូរចូល ដែលមានលក្ខណៈអំណោយផលល្អដល់បងប្អូនកសិករមានទឹកប្រើប្រាស់។តែមកដល់ឆ្នាំ ២០២០ នេះកម្ពស់ទឹកទន្លេបែជានៅទាប ក្នុងរយៈពេលដូចគ្នាខុសរហូតទៅដល់ជិត៦ម៉ែត្រ ដូច្នេះដើម្បីបញ្ចៀសនូវបញ្ហាកង្វល់ផ្សេងៗនោះសូមឱ្យប្រជាកសិករត្រូវប្រើប្រាស់ទឹកដោយសន្សំសំចៃ ។

លោកអ៊ុ វិបុល ប្រធានមន្ទីរធនធានទឹកនិងឧតុនិយមខេត្តបានប្រាប់ឲ្យដឹងនៅល្ងាចថ្ងៃទី៦កញ្ញា២០២០ ថា បើសិនជាក្នុងករណីកម្ពស់ទឹកទន្លេមេគង្គនៅទាបបែបនេះនឹងបន្តស្រកទៅវិញក្នុងពេលខាងមុខនិងជះឥទ្ធិពលអាចនឹងធ្វើឲ្យប្រជាកសិករប្រឈមនឹងកង្វះខាតទឹកសម្រាប់ប្រើប្រាស់ស្រោចស្រពដំណាំស្រូវជាក់ជាមិនខាន។

សូមបញ្ជាក់ថាក្នុងឆ្នាំ២០១៩កន្លងទៅប្រទេសកម្ពុជាបានទទួលរងផលប៉ះពាល់ពីអែលនីណូ ក្នុងនោះខេត្តកំពង់ចាម មានតំបន់មួយចំនួនបានប្រឈមនឹងកង្វះខាតទឹកសម្រាប់ស្រោចស្រពដំណាំស្រូវក្នុងនោះរួមមានស្រុកកំពង់សៀម ស្រុកព្រៃឈរ ស្រុកជើងព្រៃ និងតំបន់មួយចំនួនទៀត តែដោយមានការយកចិត្តទុកដាក់ពីសំណាក់លោកអ៊ុន ចាន់ដា អភិបាលខេត្ត បានចាត់ឲ្យមន្ទីរធនធានទឹកខេត្តចុះអន្តរាគមន៍ដោយយកម៉ាស៊ីនបូមទឹក ពីកន្លែងដែលមានប្រភពទឹក ទៅស្រោចស្រពដំណាំស្រូវបានរាប់ពាន់ហិតាផងដែរ ៕ (កែសម្រួលដោយ ៖ ធីតា)