សហរដ្ឋអាមេរិក ៖ អ្នកកីឡាកាសដ៏ល្បីល្បាញ Matt Hardy ត្រូវបានបញ្ជូនទៅមន្ទីរពេទ្យ បន្ទាប់ពីរងការប៉ះទង្គិចក្បាល អំឡុងការប្រកួតរបស់ខ្លួន។
ការរងរបួសដ៏រន្ធត់នេះ បានធ្វើឲ្យប្រពន្ធរបស់ Hardy នាង Reby មានការអាក់អន់ចិត្ត និងខឹងសម្បារយ៉ាងខ្លាំង ព្រោះការប្រកួតត្រូវបានអនុញ្ញាតឲ្យបន្ត បើទោះបីជាប្តីរបស់នាង រងការប៉ះទង្គិចក្បាលយ៉ាងណាក្តី។
ហេតុការណ៍នេះ បានកើតឡើងក្នុងការប្រកួតរវាង Hardy ជាមួយនឹង Sammy Guevara ក្នុងកម្មវិធី All Out របស់ស្ថាប័ន AEW កាលពីរាត្រីថ្ងៃសៅរ៍កន្លងទៅ។ អំឡុងការវាយប្រយុទ្ធគ្នា អ្នកទាំង២ បានឡើងទៅលើជណ្តើរយន្តកន្ត្រៃមួយ មុនពេលដែល Guevara បានបុកទម្លាក់ Hardy ឲ្យធ្លាក់លើតុ ហើយក៏ប៉ះទង្គិចក្បាលតែម្តង។
ការប្រកួតត្រូវបានផ្អាកបណ្តោះអាសន្ន ប៉ុន្តែប៉ុន្មាននាទីក្រោយមក បន្ទាប់ពីការត្រួតពិនិត្យសុខភាពពីក្រុមគ្រូពេទ្យ ការប្រកួតក៏អនុញ្ញាតឲ្យបន្ត។ លុះដល់បញ្ចប់ ស្ថាប័ន AEW បានបញ្ជាក់ថា Hardy ត្រូវបានបញ្ជូនទៅមន្ទីរពេទ្យ និងត្រួតពិនិត្យដោយការស្កេន MRI ដើម្បីរកឲ្យឃើញពីការរងរបួស។
ប៉ុន្តែដំណឹងចុងក្រោយបានបញ្ជាក់ឲ្យដឹងថា Matt Hardy បានអនុញ្ញាតឲ្យចេញពីមន្ទីរពេទ្យហើយ បន្ទាប់ពីទទួលបានការពិនិត្យយ៉ាងយកចិត្តទុកដាក់អស់រយៈពេល ២៤ម៉ោង បន្ទាប់ពីរងរបួស។ ដោយក្នុងនោះគ្រូពេទ្យបានបញ្ជាក់ថា បរុសវ័យ ៤៥ឆ្នាំរូបនេះ មិនបានប៉ះពាល់ធ្ងន់ធ្ងរឡើយ។
ប្រពន្ធរបស់ Hardy ក៏បានប្រើប្រាស់ប្រព័ន្ធ Twitter របស់ខ្លួន ដើម្បីទះកំផ្លៀងស្ថាប័ន AEW ចំពោះការដោះស្រាយស្ថានភាពដោយខ្វះការទទួលខុសត្រូវរបស់ពួកគេ ខណៈដែលប្តីរបស់ខ្លួន បានរងរបួសចំកន្លែងគ្រោះថ្នាក់បំផុត៕ (ដកស្រង់ចេញពី The Sun)
ចែករំលែកព័តមាននេះ