ខេត្តកណ្ដាល ៖ សេចក្តីរាយការណ៍បឋមឱ្យដឹងថា កាលពីម៉ោង៤ និង៣០នាទីទៀបភ្លឺថ្ងៃទី៧ កញ្ញា មានការភ្ញាក់មួយបានកើតឡើងនៅចំណុចវត្ត «កំពង់សំបួរ»ស្ថិតភូមិកំពង់សំបួរក្រោម ឃុំព្រែកថ្មី ស្រុកកោះធំ ខេត្តកណ្ដាល ជាករណីចោរលួចយកម៉ូតូរបស់ជនរងគ្រោះ ពេលគាត់ទៅបោះបាយបិណ្ឌជាមួយប្អូនស្រី ។
ជនរងគ្រោះឈ្មោះ ហេង សុងហ៊ ភេទប្រុស អាយុ២៣ឆ្នាំ ជាជាងឡាន រស់នៅភូមិកំពង់សំបួរក្រោម ឃុំព្រែកថ្មី ស្រុកកោះធំ ខេត្តកណ្ដាល ។ សម្ភារបាត់បង់ ម៉ូតូ១គ្រឿង ម៉ាក់ហុងដា ឌ្រីម សេ១២៥ ស៊េរី២០១៦ ពណ៌ខ្មៅ ពាក់ផ្លាក់លេខកណ្ដាល 1AF-1265 ។
តាមការបំភ្លឺពីម្ចាស់ម៉ូតូរៀបរាប់ប្រាប់សមត្ថកិច្ចថា មុនកើតហេតុវេលាម៉ោងប្រមាណជាង៤ទៀបភ្លឺគាត់ ជាជនរងគ្រោះនិងប្អូនស្រី បានជិះម៉ូតូ១គ្រឿងដូចមានភិនភាគខាងលើ ទៅធ្វើបុណ្យបោះបាយបិណ្ឌ រួចបានចតម៉ូតូទុកនៅខាងត្បូងជាប់មុខសាលាធម្មសភា ដោយបានចាក់សោកយ៉ាងត្រឹមត្រូវ ហើយក៏បានដើរទៅបោះបាយបិណ្ឌ ។
លុះពេលបោះបាយបិណ្ឌហើយ បានដើរមកកន្លែងទុកម៉ូតូវិញ ស្រាប់តែបាត់ម៉ូតូ មិនដឹងជាប្រ៉ែតចោរ លួចតាំងពីពេលណា ពេលនោះទើបបាននាំគ្នាផ្អើលឆោឡោ និងដើររកប៉ុន្តែហួសពេលដែរ ។ ចុងក្រោយ ជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលព្រែកថ្មី ស្រុកកោះធំ ខេត្តកណ្តាលឲ្យជួយស្រាវជ្រាវ ស្វែងរកមុខសញ្ញា ដែលធ្វើសកម្មភាពលួចម៉ូតូនោះវិញ ៕
ចែករំលែកព័តមាននេះ