រាជធានីភ្នំពេញ ៖ ទីបំផុតលោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ នាព្រលប់ថ្ងៃទី៦ ខែកញ្ញា ឆ្នាំ២០២០ បានចេញដីកាសម្រេចឃុំខ្លួនស្ត្រីម្នាក់ដាក់ពន្ធនាគារជាបណ្តោះអាសន្ន ពីបទ.រំលោភលើទំនុកចិត្ត ពាក់ព័ន្ធករណីរកស៊ីទិញ-លក់ដី បានផលចំណេញមិនចែកឲ្យភាគហ៊ុន ។
ស្ត្រីរូបនេះមានឈ្មោះ អៀង សេងហុង ហៅសារិទ្ធ មុំ អាយុ៤៥ឆ្នាំ មានទីលំនៅផ្ទះលេខ៤A ផ្លូវលេខ២ ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានឲ្យដឹងថា ស្ត្រីសង្ស័យខាងលើបានតាំងខ្លួនជាចៅក្រមសាលាឧទ្ធរណ៍ និងបានយកឈ្មោះថ្នាក់ដឹកនាំមួយចំនួន ដើរឆបោកប្រាក់អ្នកដទៃរហូតដល់ទៅជិត១លានដុល្លារអាមេរិក ហើយបានវេចលុយគេចខ្លួនទៅដល់ភាគឥសាន្តប្រទេស ទើបត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលខេត្តព្រះវិហារ តាមចាប់ដល់ស្រុកគូលែន រួចបញ្ជូនឲ្យមកដេកគុកនៅភ្នំពេញវិញ។
សមត្ថកិច្ចបានឲ្យដឹងថា ស្ត្រីរូបនេះបានដើរប្រាប់ជនរងគ្រោះថា ខ្លួនជាបងប្អូនថ្នាក់ដឹកនាំធំៗ ដែលមានការអីគេចាំជួយពីក្រោយ ។
សូមបញ្ជាក់ថា កាលពីព្រឹកថ្ងៃទី៣ ខែកញ្ញា ឆ្នាំ២០២០ បានតាមឃាត់ខ្លួនស្ត្រីម្នាក់រហូតដល់ស្រុកគូលែន ខេត្តព្រះវិហារ តាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ក្រោមបទចោទប្រកាន់រំលោភសេចក្តីទុកចិត្ត ។
បើតាមពាក្យមួយបានបញ្ជាក់ថា កាលពីថ្ងៃទី១៩ ខែកុម្ភៈ ឆ្នាំ២០១៦ ជនសង្ស័យបានឆបោកប្រាក់ចំនួន ៨៣៥,០០០ដុល្លារអាមេរិក ពីឈ្មោះ មិន ស្ស័យ ភេទប្រុស អាយុ៥៨ឆ្នាំ មានទីលំនៅផ្ទះលេខ៩៩ ផ្លូវលំ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រឿងទិញ-លក់ដីធ្លីនៅស្រុកព្រៃនប់ ខេត្តព្រះសីហនុ ។ គ្រានោះជនសង្ស័យបានយកប្រាក់ពីជនរងគ្រោះទៅទិញដីចូលគ្នា ដោយបានធ្វើកិច្ចសន្យាផ្ទៃក្នុងជាមួយគ្នាថា ពេលណាលក់ដីបានផលចំណេញចែកគ្នា៥០%ស្មើ ។
តែផ្ទុយទៅវិញនៅពេលលក់ដីបានចំណេញ បែរជាជនសង្ស័យវេចលុយគេចខ្លួនមិនបានចែកឲ្យភាគហ៊ុននោះទេ ដូច្នោះហើយទើបបានម្ចាស់ប្រាក់គេប្តឹងឲ្យសមត្ថកិច្ចតាមទៅចាប់ខ្លួន ដើម្បីនាំយកមកទទួលទោសតាមអំពើដែលគាត់ប្រព្រឹត្ត ៕
ចែករំលែកព័តមាននេះ