ការនិយាយញុះញង់គឺនិយាយចាក់រុកនាំអុចអាលឱ្យអ្នកដទៃធ្វើអ្វីៗដែលមិនគប្បី, ឱ្យគេឈ្លោះទាស់ទែងគ្នា, ឱ្យបែកបាក់គ្នា, ឱ្យអ្នកដែលធ្លាប់តែស្រឡាញ់រាប់អានបែរជាបែកសាមគ្គី ចែកផ្លូវគ្នាអស់ ។ អ្នកដែលមានចរិយាបែបនេះលុះធ្វើកាលកិរិយាទៅនឹងប្រាកដជាទៅកើតជាប្រេតមិនខាន ។
ប្រេតនោះមានឈ្មោះថា សូចិលោមប្រេត ជាប្រេតមានដែកស្រួចចាក់ខ្ទាស់ច្រូងច្រាងដូចជារោម កំពុងអណ្តែតទៅឯអាកាស ដែកស្រួចទាំងឡាយរបស់ប្រេតនោះដោតចូលទៅតាមក្បាលហើយធ្លាយចេញមកខាងមាត់ ដោតចូលទៅតាមមាត់ ហើយធ្លាយចេញមកខាងទ្រូងដោតចូលទៅតាមទ្រូង ហើយធ្លាយចេញមកខាងពោះដោតចូលមកតាមពោះ ហើយធ្លាយចេញមកខាងភ្លៅទាំងពីរ ដោតចូលមកតាមភ្លៅទាំងពីរ ហើយធ្លាយចេញមកខាងស្មងជើងទាំងពីរ សូចិលោមប្រេតនោះក៏ចេះតែស្រែកថ្ងូរ កំពុងរងទុក្ខវេទនាក្រៃលែង ។
ព្រះមានព្រះភាគបានត្រាស់ថា ម្នាលភិក្ខុទាំងឡាយសត្វនោះកាលពីដើមជាអ្នកញុះញង់គេក្នុងក្រុងរាជគ្រឹះនេះឯង ហើយជាសត្វដែលកំពុងទន្ទឹងរង់ចាំផលបុណ្យអំពីសំណាក់ម្ចាស់ទានទាំងឡាយ ។ សាន សារិន
ចែករំលែកព័តមាននេះ