ខេត្តបន្ទាយមានជ័យ ៖ ភ្លៀង១មេធំមានរយៈពេលជាង១ម៉ោង នៅល្ងាចថ្ងៃទី៤ ខែកញ្ញា ឆ្នាំ២០២០ បានពន្លិចផ្ទះប្រជាពលរដ្ឋភាគច្រើនរស់នៅភូមិ៣ ក្នុងសង្កាត់ព្រះពន្លា ត្រង់ចំណុចរង្វង់មូលស្រីគ្រប់លក្ខណ៍ ។…
ខេត្តបន្ទាយមានជ័យ ៖ ភ្លៀង១មេធំមានរយៈពេលជាង១ម៉ោង នៅល្ងាចថ្ងៃទី៤ ខែកញ្ញា ឆ្នាំ២០២០ បានពន្លិចផ្ទះប្រជាពលរដ្ឋភាគច្រើនរស់នៅភូមិ៣ ក្នុងសង្កាត់ព្រះពន្លា ត្រង់ចំណុចរង្វង់មូលស្រីគ្រប់លក្ខណ៍ ។ បានជន់លិចនេះត្រូវបានអះអាងថា ដោយសារតែមានការស្ទះលូ ដែលកន្លែងខ្លះជន់លិចកន្លះម៉ែត្រ ខ្លះទៀតលិច១ម៉ែត្រ ។ ចំណែកទ្រព្យសម្បត្តិយកមិនទាន់ ត្រូវខូតខាតអស់ទាំងស្រុង ។
ជំនន់ទឹកភ្លៀងនេះ បានបង្កឲ្យលិចនៅចំណុចសំខាន់ៗនៅជុំវិញទីរួមខេត្តគ្រប់ច្រកល្ហក ពិសេសចំណុចម្តុំផ្សារសិរីសោភ័ណ ចំណុចបេនរថយន្តចាស់ ចំណុចបេនរថយន្តថ្មី ចំណុចរង្វង់មូលស្រីគ្រប់លក្ខណ៍ ។ ពលរដ្ឋម្នាក់លក់អីវ៉ាន់ជិតរង្វង់មូលស្រីគ្រប់លក្ខណ៍បានប្រាប់ថា ជារៀងរាល់ឆ្នាំ នៅចំណុចម្តុំបេនរថយន្តចាស់ និងផ្សារសិរីសោភ័ណ ចំណុចរង្វង់មូលស្រីគ្រប់លក្ខណ៍ ឲ្យតែមានភ្លៀងខ្លាំងគឺលិចមានជម្រៅជិត១ម៉ែត្រ ដោយសារតែទឹកហូរមិនទាន់ និងស្ទះលូ ។
ដោយសារតែស៊ូទ្រាំរស់នៅផ្ទះទឹកលិចមិនបានតទៅទៀត គាត់ក៏បានចាក់ដីចង់១ម៉ែត្រដើម្បីកុំឲ្យទឹកភ្លៀងលិចបន្ត ស្រាប់តែនៅថ្ងៃទី៤ ខែកញ្ញា ឆ្នាំ២០២០ នេះ មានភ្លៀងខ្លាំងធ្លាក់មកមួយមេ ស្រាប់តែផ្ទះរបស់គាត់នៅតែលិចទៀត គាត់ហួសចិត្តអីវ៉ាន់ក៏ត្រូវខូចខាតមួយចំនួន ព្រោះគាត់ប្រមូលយកមិនទាន់ ។
ទាក់ទិននឹងករណីទឹកលិចចូលផ្ទះនេះ មានមតិប្រជាពលរដ្ឋខ្លះគាត់បានរិះគន់ មូលហេតុមកពីប្រជាពលរដ្ឋខ្លះដណ្តើមគ្នាចាក់ដីសាងសង់ផ្ទះ អាចបណ្តាលឲ្យបិទប្រព័ន្ធលូទឹក និងកន្លែងខ្លះគឺគ្មានប្រព័ន្ធលូរំដោះទឹកតែម្តង និងកន្លែងខ្លះទៀតលូតូចទឹកហូរមិនទាន់ ។
ប្រពលរដ្ឋបានបញ្ជាក់ឲ្យដឹងទៀតថា ឆ្នាំមុនឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោក ហ៊ឹល រ៉ាយ៉ា បានពួតដៃគ្នាដាក់លូ១ខ្សែ ពីចំណុចផ្លូវប្របបែនរថយន្តថ្មីចាក់ទៅមាត់ស្ទឹង មុខកាត់១ម៉ែត្រ២តឹក ក្រោយគេចាប់ធ្វើសួនគេដាក់លូមុខកាត់តូចទៅវិញ បណ្តាលឲ្យទឹកភ្លៀងហូរមិនទាន់ ហើយថ្ងៃនេះភ្លៀងខ្លាំងជាង១ម៉ោងទៀត ធ្វើឲ្យទឹកលិចលង់តែម្តង ។
ទាក់ទិននឹងបញ្ហានេះដែរ បើតាមការអះអាងរបស់ជំនាញបានឲ្យដឹងថា មូលហេតុទឹកជំនន់លិចផ្ទះប្រជាពលរដ្ឋនេះ ដោយសារតែស្ទះលូហូរមិនទាន់ បច្ចុប្បន្ននេះកំពុងរកវិធីដោះស្រាយ កុំឲ្យប្រជាពលរដ្ឋប្រឈមនឹងការលំបាក ដោយសារជំនន់ទឹកភ្លៀងបែបនេះបន្តទៅទៀត ៕
ចែករំលែកព័តមាននេះ