ខេត្តតាកែវ ៖ យ៉ាងហោចណស់ មនុស្សចំនួន៣នាក់បានបាត់បង់ជីវិត ចំណែកម្នាក់ទៀតរងរបួសធ្ងន់ ក្នុងករណីគ្រោះថ្នាក់ចរាចររវាងម៉ូតូបុកជាមួយម៉ូតូក្នុងទិសដៅបញ្ច្រាសគ្នា ។
ហេតុករណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៤និង១០នាទីរសៀលថ្ងៃទី៣ ខែកញ្ញា ឆ្នាំ២០២០ នៅលើបណ្តោយផ្លូវលេខ១២៩ ចន្លោះគីឡូម៉ែត្រលេខ២៥-២៦ ស្ថិតនៅភូមិព្រៃល្លាកើត ឃុំព្រៃល្វា ស្រុកព្រៃកប្បាស ខេត្តតាកែវ។
លោកឡេង ប៊ុនឡុង អធីការនគរបាលស្រុកព្រែកប្បាសបានអោយដឹងថា ភាគីខាងម៉ូតូ១គ្រឿងម៉ាកវ៉េវ ពណ៌ទឹកបិច ពាក់ស្លាកលេខ ព្រៃវែង 1A-8233 បើកបរដោយឈ្មោះ តែម នាង ភេទប្រុស អាយុ៣០ឆ្នាំ រស់នៅភូមិព្រៃព្រំ ឃុំព្រៃកប្បាស ស្រុកព្រៃកប្បាស ខេត្តតាកែវ បានបាត់បង់ជីវិតនៅកន្លែងកើតហេតុ និងអ្នករួមដំណើរម្នាក់ឈ្មោះ ចឹម ជីវ័ន្ត ភេទប្រុស អាយុ៦ឆ្នាំ រងរបួសធ្ងន់ ក្រោយមកបានបាត់បង់ជីវិតពេលបញ្ជូនទៅដល់មន្ទីរពេទ្យ។
ដោយឡែកភាគីខាងម៉ូតូមួយគ្រឿងទៀតម៉ាកភីស៊ីអិច បើកបរដោយឈ្មោះ អ៊ឹម ស្រីពៅ ភេទស្រី អាយុ២២ឆ្នាំ រស់នៅភូមិតាមួង ឃុំរំចង់ ស្រុកសំរោង ខេត្តតាកែវ បានបាត់បង់ជីវិតនៅកន្លែងកើតហេតុ និងអ្នករួមដំណើរម្នាក់ឈ្មោះ ប៊ុន សូណាត ភេទស្រី អាយុ២៦ឆ្នាំ រស់នៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ រងរបួសធ្ងន់។
លោកអធីកានគរបាលស្រុកបានបញ្ជាក់ថា ក្រោយកើតហេតុ ប៉ូលិសចរាចរណ៍បានចុះទៅដល់កន្លែងកើតហេតុ និងហៅរថយន្តសង្គ្រោះរបស់មន្ទីរពេទ្យបង្អែកស្រុកមកដឹកយកអ្នករងរបួសទៅសង្គ្រោះនៅមន្ទីរពេទ្យ ចំណែកសពជនរងគ្រោះត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី ដោយឡែកម៉ូតូទាំង២គ្រឿងត្រូវបានយកទៅរក្សាទុកនៅអធីការនគរបាលស្រុក ដើម្បីដោះស្រាយគ្នានៅពេលក្រោយ៕ (កែសម្រួលដោយ ៖ ធីតា)
ចែករំលែកព័តមាននេះ