រាជធានីភ្នំពេញ ៖ មេដឹកនាំក្រុមសហជីពធំៗបានបង្ហាញពីគោលបំណងចង់ឱ្យប្រាក់ឈ្នួលអប្បបរមាសម្រាប់កម្មករកាត់ដេរនៅក្នុងឆ្នាំ២០២១នេះឡើងដល់ជាង២០០ដុល្លារក្នុងមួយខែ ខណៈដែលការចរចាបានកំពុងដំណើរការ ហើយគ្រោងនឹងប្រកាសលទ្ធផលនៅមុនថ្ងៃបុណ្យភ្ជុំបិណ្ឌ ។ លោក អ៊ិត សំហេង រដ្ឋមន្ត្រីក្រសួងការងារ…
រាជធានីភ្នំពេញ ៖ មេដឹកនាំក្រុមសហជីពធំៗបានបង្ហាញពីគោលបំណងចង់ឱ្យប្រាក់ឈ្នួលអប្បបរមាសម្រាប់កម្មករកាត់ដេរនៅក្នុងឆ្នាំ២០២១នេះឡើងដល់ជាង២០០ដុល្លារក្នុងមួយខែ ខណៈដែលការចរចាបានកំពុងដំណើរការ ហើយគ្រោងនឹងប្រកាសលទ្ធផលនៅមុនថ្ងៃបុណ្យភ្ជុំបិណ្ឌ ។
លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវ: និងជាប្រធានក្រុមប្រឹក្សាជាតិប្រាក់ឈ្នួលអប្បបរមាបានកំណត់ឲ្យក្រុមប្រឹក្សាជាតិប្រាក់ឈ្នួលអប្បបរមា រួមគ្នាបញ្ចប់កិច្ចពិភាក្សាប្រាក់ឈ្នួលត្រឹមថ្ងៃទី៩-១០ ខែកញ្ញាមុនបុណ្យភ្ជុំបិណ្ឌខាងមុខ ។
នៅព្រឹកថ្ងៃព្រហស្បតិ៍ ទី៣ ខែកញ្ញា ម្សិលមិញ ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំលើកទី១ ដើម្បីពិភាក្សាប្រាក់ឈ្នួលអប្បបរមាផ្នែកវាយនភណ្ឌកាត់ដេរនិងផលិតស្បែកជើងសម្រាប់ឆ្នាំ២០២១នេះ ។
ប្រធានសម្ព័ន្ធសហជីពចលនាកម្មករកម្ពុជា លោក ប៉ាវ ស៊ីណា បានថ្លែងប្រាប់អ្នកសារព័ត៌មានក្រោយចប់កិច្ចប្រជុំនោះថា តំណាងកម្មករ និងសហជីពបានស្នើដល់រដ្ឋាភិបាលធ្វើការតម្លើងប្រាក់ឈ្នួលអប្បបរមាចំនួន២០១.៥៩ដុល្លារក្នុងមួយខែនៅឆ្នាំក្រោយ ពោល គឺស្នើតម្លើង១១.៥៩ដុល្លារបន្ថែម លើប្រាក់ឈ្នួលអប្បបរមាក្នុងឆ្នាំនេះ ដែលមាន១៩០ដុល្លារ ។
ចំណែកប្រធានសហភាពការងារកម្ពុជា លោក អាត់ ធន់ បង្ហាញក្តីសង្ឃឹមថា ការចរចាប្រាក់ឈ្នួលអប្បបរមាសម្រាប់កម្មករក្នុងឆ្នាំ២០២១ នឹងមានតួលេខមួយដែលអាចទទួលបាន ប្រសិនបើកម្ពុជារក្សាបានកំណើនវិនិយោគ ។ លោកថា ថៅកែបញ្ចេញប្រាក់ចំណេញដែលបានចំណេញរាប់ឆ្នាំមកជួយកម្មករ និងស្របពេលដែលរដ្ឋាភិបាលរកវិធីបញ្ចៀសផលប៉ះពាល់ពីការដកផ្នែកខ្លះនៃប្រព័ន្ធអនុគ្រោះពន្ធ (EBA) ចំនួន២០% និងជំងឺកូវីដអាចបញ្ចប់នៅ រយៈពេលដ៏ខ្លីខាងមុខ ។
មេដឹកនាំសហជីពបានលើកឡើងថា ជីវភាពកម្មករនៅតែមានការលំបាក ហើយកាន់តែលំបាកនៅពេលមានវិបត្តិកូវីដ១៩នេះ ។ នៅចំពោះមុខនេះទំនិញគ្រប់មុខបានឡើងថ្លៃខ្ពស់ទៀតផង ។ កិច្ចប្រជុំលើកទី១ កាលពីម្សិលមិញ ភាគីពាក់ព័ន្ធបានលើកឡើងពីស្ថិតិសំខាន់ៗសម្រាប់ ធ្វើជាមូលដ្ឋានក្នុងការប្រើប្រាស់លក្ខណៈវិនិច្ឆ័យ និងស្តាប់គោលជំហរភាគីទាំងនោះទៅលើការធ្វើវិនិច្ឆ័យសង្គម និងសេដ្ឋកិច្ច ក្នុងការចរចាប្រាក់ឈ្នួលអប្បបរមាសម្រាប់ឆ្នាំ២០២១ប៉ុណ្ណោះ មិនទាន់មានការកំណត់តួលេខណាមួយឡើយ ។
លោក អ៊ិត សំហេង បានគូសបញ្ជាក់ថា យ៉ាងណាក៏ដោយក្រុមប្រឹក្សាជាតិប្រាក់ឈ្នួលអប្បបរមារួមគ្នា ដើម្បីបញ្ចប់កិច្ចពិភាក្សាប្រាក់ឈ្នួលមុនបុណ្យភ្ជុំបិណ្ឌខាងមុខ ដើម្បីឲ្យកម្មករនិយោជិតក៏ដូចជា ភាគីដែលមានសមាសភាពក្នុងក្រុមប្រឹក្សាជាតិប្រាក់ឈ្នួលអប្បបរមាមានភាពស្ងប់ចិត្តក្នុងការឈប់សម្រាកនាឱកាសធ្វើបុណ្យទាននោះ ។ សូមបញ្ជាក់ថា ប្រាក់ឈ្នួលអប្បបរមាសម្រាប់កម្មករឆ្នាំ២០២០នេះ មានចំនួន១៩០ដុល្លារ៕
ចែករំលែកព័តមាននេះ