រឿងបណ្តេញចេញចំពោះការតាំងទីលំនៅ ទោះរស់នៅយូរក្តី… ទើបរស់នៅក្តី… វាពិតជាអាក្រក់មើលមែនហើយ… ហើយក៏ដោយសារអំណាចផងដែរ ដែលខ្លះបង្កប់ដោយត្រីងៀតឆ្លៀតពង ។ល។
ដីសាធារណៈរបស់រដ្ឋ… ដីរបស់រដ្ឋដែលបំរុងទុកម៉េចមិនរៀបចំយុទ្ធវិធី ឬយុទ្ធសាស្ត្រការពារច្បាស់លាស់ ? ទុកឱ្យរខេករខាក ដុះព្រៃ ដុះស្មៅ… ទុកចោល… ដល់យូរពេក រាស្ត្រ-មន្ត្រីលើកគ្នាទៅរស់នៅ… ខ្លះកកូនពូនជាចៅអស់ទៅហើយ ស្រាប់តែលើកគ្នា«បណ្តេញ» ទៅដុត… ទៅបំផ្លាញ… ។
ដីចិញ្ចើមផ្លូវ… ដីចិញ្ចើមផ្សារ… មានអ្នកលក់ដូរពាសពេញ… បណ្តោយឱ្យលក់ដូររកផ្លូវដើរគ្មាន… ដែលភាគច្រើន«បង់ខែ» ទើបលក់ដូរបាន ។ យូរៗស្រាប់តែលើកគ្នាអាងតែអំណាចទៅ«បណ្តេញ» ចេញធ្វើឱ្យទឹកភ្នែកហូរ… ។ អ្នកយកខែ… យកទៅ… ឯអ្នកផ្សេងមកបណ្តេញ… វាពិតជាអាក្រក់ណាស់… អាក្រក់មែន ។
សូម្បីចំការអាកាស្យាខ្លះ ដែលជាផលិតផលនៃ«រុក្ខទិវា» គេកាប់ចោលអស់ ចែកគ្នាសង់ផ្ទះពេញទឹកពេញដី… ទើបលើកគ្នាទៅបណ្តេញ… ទីបំផុតបានទៅលើមន្ត្រីច្រើនជាងរាស្ត្រក្រីក្រ… ។
រដូវនេសាទដែលច្បាប់ហាម… ទុកឱ្យអ្នកនេសាទដាក់ឧបករណ៍នេសាទពេញទាំងអស់… ក្រាលពេញផ្ទៃទឹក… ស្រាប់តែលើកគ្នាទៅកាប់ចោល… ទៅបំផ្លាញអស់រាប់ម៉ឺនរាប់សែនដុល្លារ ។ ហេតុម៉េចមិនរារាំងឱ្យបានមុន ?
បើតាមពិនិត្យឱ្យវាដិតដល់ទៅ… វាច្រើនតែមាន«ខ្នង» បង្កប់ដោយអំពើពុករលួយ… ដែលមិនខុសពីពាក្យថា «ត្រីងៀតឆ្លៀតពង» នោះឡើយ ។
មិនដែលចាប់បានត្រីងៀតទេ… ណ្ហើយទុកឱ្យវាឆ្លៀតពងពេញទឹក ពេញដីតាមអំណាចទៅចុះ……!
អាឡេវ
ចែករំលែកព័តមាននេះ