រាជធានីភ្នំពេញ៖ គម្រោងការដាំដើមឈើប្រណិត(ដើមធ្នង់) នៅតាមបណ្ដោយផ្លូវ២១៧ ឬផ្លូវជើងឯកចំការដូង ចាប់ពីស្ពានដែករហូតដល់រង្វង់មូលគូរស្រូវ ជាប់ព្រំប្រទល់ខេត្តកណ្ដាលនោះ ពេលនេះ រដ្ឋបាលរាជធានីភ្នំពេញ បានចាប់ផ្តើមដំណើរការដាំហើយ ដែលគ្រោងបញ្ចប់ក្នុងរយៈពេលប្រមាណមួយឬពីរខែ…
រាជធានីភ្នំពេញ៖ គម្រោងការដាំដើមឈើប្រណិត(ដើមធ្នង់) នៅតាមបណ្ដោយផ្លូវ២១៧ ឬផ្លូវជើងឯកចំការដូង ចាប់ពីស្ពានដែករហូតដល់រង្វង់មូលគូរស្រូវ ជាប់ព្រំប្រទល់ខេត្តកណ្ដាលនោះ ពេលនេះ រដ្ឋបាលរាជធានីភ្នំពេញ បានចាប់ផ្តើមដំណើរការដាំហើយ ដែលគ្រោងបញ្ចប់ក្នុងរយៈពេលប្រមាណមួយឬពីរខែ ។
នៅព្រឹកថ្ងៃទី៣ ខែកញ្ញានេះ លោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញ ដោយមានការចូលរួមពីតំណាងមន្ទីរកសិកម្ម និងអាជ្ញាធរខណ្ឌដង្កោ បានចាប់ដំណើរការដាំដើមធ្នង់ចំនួន២ពាន់ដើម ។
លោកសំ សាមុត បានឲ្យដឹងថា ដើមឈើប្រណីតដែលត្រូវដាំនេះ ធ្វើឡើងទៅតាមការណែនាំរបស់លោកឃួង ស្រេងអភិបាលរាជធានីភ្នំពេញ ដោយត្រូវដាំគម្លាតពីគ្នា៨ម៉ែត្រ និង ពីចិញ្ចើមផ្លូវពី៥ម៉ែត្រទៅជិត១០ម៉ែត្រទៅតាមសណ្ឋានផ្លូវ ដើមឈើនោះមានកំពស់៣ម៉ែត្រ ដែលត្រូវដាំចាប់ពីស្ពានដែកចំការដូង រហូតដល់រង្វង់មូលគួរស្រូវជាប់ព្រំប្រទល់ខេត្តកណ្តាល ហើយប្រភេទកូនឈើដែលត្រូវដាំជាប្រភេទឈើធ្នង់ធំៗ ប្រមាណ២០០០ដើម ដែលប្រើរយៈពេលនៃការដាំចំនួន១ខែទៅ២ខែ។
លោកបន្តថា លោកឃួង ស្រេង អភិបាលរាជធានីភ្នំពេញ ក្នុងកិច្ចប្រជុំថ្មីៗនេះ គឺបានសម្រេចអោយអង្គភាពសួនច្បារនិងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញជាអ្នកដាំ ដោយសហការជាមួយមន្ទីរកសិកម្មនិងអាជ្ញាធរមូលដ្ឋាន ហើយឈើដែលត្រូវដាំ មិនមែនកូនឈើតូចៗនោះទេ គឺជាប្រភេទកូនឈឺធ្នង់ធំៗ ដែលមានទំហំប៉ុនកំភួនជើង ប្រមាណពី១៥០០ដើមទៅ២០០០ដើម ដោយដាំអមសងខាងផ្លូវចន្លោះពីគ្នាប្រមាណ៨ម៉ែត្រតាមបណ្ដោយផ្លូវ២១៧ ក្នុងខណ្ឌដង្កោ ចាប់ផ្ដើមដាំពី ស្ពាន ដែកចំការដូងរហូតដល់រង្វង់មូលគួរស្រូវ ជាប់ព្រំប្រទល់ខេត្តកណ្ដាល លើចំងាយផ្លូវប្រវែង៧គីឡូម៉ែត្រសងខាង (ស្មើ ១៤គីឡូម៉ែត្រ)។
លោកក៏បានណែនាំដល់មន្ត្រីពាក់ព័ន្ធទាំងអស់ ត្រូវសិក្សាឲ្យបានច្បាស់លាស់មុននឹងដាំដើមឈើទាំងនេះ ជាពិសេសទំហំនៃគម្រោងពង្រីកផ្លូវ និងការដាក់ប្រព័ន្ធលូជាដើម ជៀសវាងមានបញ្ហាហើយ យើងកាប់ដើមឈើចោលវិញ គឺពិតជាគួរអោយស្តាយណាស់៕ (កែសម្រួលដោយ ៖ ធីតា)
ចែករំលែកព័តមាននេះ