ខេត្តកំពង់ឆ្នាំង ៖ ឧត្តមសេនីយ៍ឯក ពូ សាប៊ុតឌី មេបញ្ជាការរងកងទ័ពជើងគោក និងជាមេបញ្ជាការយោធភូមិភាគពិសេស មានប្រសាសន៍ថា ក្នុងនាមយើងជាយុទ្ធជនត្រូវប្រឆាំង
ដាច់ខាតនូវអំពើភេរវកម្មផ្សេងៗពីពួកអមិត្ត និងប្រឆាំងដាច់ខាតការធ្វើបដិវត្តន៍ពណ៌ពីសំណាក់
ក្រុមប្រឆាំង ដែលប៉ងផ្តួលរំលំរាជរដ្ឋាភិបាលស្របច្បាប់ ។
លោក ពូ សាបុ៊តឌី មានប្រសាសន៍បែបនេះ នៅក្នុងឱកាសអញ្ជើញជាអធិបតីភាពក្នុងពិធីបើកវគ្គបណ្ដុះបណ្ដាលនាយទាហានរងជាន់ទាបចំនួន៨០រូប នៅសាលាពលទាហានភូមិភាគពិសេស កាលពីព្រឹកថ្ងៃទី២ ខែកញ្ញា ឆ្នាំ២០២០ ។
ឧត្តមសេនីយ៍ឯក ពូ សាបុ៊តឌី បន្តថា ដើម្បីក្លាយខ្លួនទៅជាយុទ្ធជនក្នុងជួរកងទ័ពដែលមានស្មារតីរឹងមាំ មានវីរភាពល្អ ដាច់ខាតមកទីនេះត្រូវប្រឹងប្រែងសិក្សារៀនសូត្រទាំងទ្រឹស្ដី និងការអនុវត្តជាក់ស្ដែង ។ ការហ្វឹកហាត់នៅទីនេះសិក្ខាកាមគ្រប់រូបត្រូវស្គាល់នូវយុទ្ធវិធី បច្ចេកទេស ការប្រើប្រាស់អាវុធ មានវិន័យសណ្ដាប់ធ្នាប់ គឺដើម្បីបង្កើននូវគុណភាពរបស់កងទ័ព និងធានាបានការបំពេញភារកិច្ច តាមបទបញ្ជាដែលថ្នាក់លើប្រគល់ជូន ។ ត្រូវម្ចាស់ការរៀបចំសម្ភារសម្រាប់បម្រើឱ្យការងារហ្វឹកហ្វឺន មានការគោរពវិន័យ បទបញ្ជាផ្ទៃក្នុង ត្រូវមានសាមគ្គីភាព ជាមួយមិត្តក្នុងវគ្គ ដោយចេះជួយគ្នាទៅវិញទៅមក ។
សិក្ខាកាមទាំងអស់ ដាច់ខាតត្រូវជៀសឲ្យឆ្ងាយពីល្បែងពាលាអាវ៉ាសែ ចាកឆ្ងាយពីគ្រឿងញៀន និងត្រូវយកចិត្តទុកដាក់រួមចំណែកការងារជួយប្រជាពលរដ្ឋជុំវិញកងឯកភាព ។ ជាមួយគ្នានេះ ត្រូវរក្សាអនាម័យឱ្យបានល្អ ដើម្បីរួមចំណែកក្នុងការទប់ស្កាត់បង្ការជំងឺកូវីដ-១៩ តាមការណែនាំរបស់ក្រសួងសុខាភិបាលដូចជា ការលាងដៃនឹងសាប៊ូ ឬអាល់កុល ឬជែល និង សូមយកចិត្តទុកដាក់ពង្រឹងស្មារតីប្រឹងប្រែងរៀនសូត្រឱ្យបានម៉ឺងម៉ាត់បំផុត ។
ឧត្តមសេនីយ៍ឯក ពូ សាប៊ូឌី ក៏បានផ្តាំផ្ញើដល់គ្រូបង្វឹក នាយកគ្រប់គ្រងសាលា ត្រូវប្រឹងប្រែងបង្ហាត់បង្រៀនដល់សិក្ខាកាម នូវយុទ្ធវិធីគ្រប់យ៉ាងដែលមានស្រាប់ និងប្រឹងប្រែងស្រាវជ្រាវនូវមេរៀនថ្មីៗ ល្អៗបន្ថែមទៀត មកបង្ហាត់ដល់សិស្សនាយទាហាន ដើម្បីឱ្យពួកគាត់មានស្មារតី
មានយុទ្ធសាស្ត្រក្នុងខ្លួនសម្រាប់ចេញទៅបំពេញភារកិច្ចទទួលបានជោគជ័យ ។
យោងតាមរបាយការណ៍របស់ឧត្តមសេនីយ៍ កង ប៊ុនធឿន នាយកសាលាហ្វឹកហ្វឺនពលទាហានយោធភូមិភាគពិសេស បានឲ្យដឹងថា វគ្គបណ្ដុះបណ្ដាលនេះមានរយៈពេល៦ខែ ដោយគិតចាប់ពីថ្ងៃបើកវគ្គរហូតដល់ថ្ងៃបញ្ចប់វគ្គ គឺនៅថ្ងៃទី២២ ខែមីនា ឆ្នាំ២០២១ សិក្ខាកាមសរុបមានចំនួន ៨០នាក់ មកពីអង្គភាពខុសគ្នា ។ ចំណែកវគ្គសិក្សាមាន លំហាត់របៀប ឋានៈលេខា វិន័យយោធា បច្ចេកទេសអាវុធថ្មើរជើង យុទ្ធវិធីថ្មើរជើង និងចិត្តសាស្ត្រផងដែរ ៕
ចែករំលែកព័តមាននេះ