ខេត្តបាត់ដំបង ៖ អធិការនគរបាលស្រុកបាណន់ លោកប៉ាន់ វ៉ាន់នី បានប្រាប់កោះសន្តិភាព នៅព្រឹកថ្ងៃទី០៣ កញ្ញា ថា សំណុំរឿងមន្ត្រីនគរបាលមកពីអង្គភាព«អគ្គនាយកដ្ឋានអង្គរក្ស អង្គភាពការពារព្រះបរមរាជវាំង» ដែលបាញ់បោះសេរីនៅកន្លែងការដ្ឋានកាយថ្មត្រង់ចំណុច«ភ្នំពឺត» ស្ថិតក្នុងភូមិសំបួរមាស ឃុំស្នឹង ស្រុកបាណន់ កាលពីចុងខែមុននេះ លោកកំពុងធ្វើរបាយការណ៍គោរពជូនទៅអគ្គស្នងការនគរបាលជាតិ ដើម្បីជ្រាបបន្ថែមទៀតហើយ បន្ទាប់ពីអប់រំនិងបង្គាប់ឲ្យមន្ត្រីនោះធ្វើកិច្ចសន្យា។
លោកប៉ាន់ វ៉ាន់នី បានប្រាប់ថា ក្រោយកើតហេតុ លោកបានរាយការណ៍ទៅលោកស្នងការរួចហើយ អំពីហេតុការណ៍បាញ់បោះសេរី ដែលបង្កឡើងដោយមន្ត្រីនគរបាលការពារ ការដ្ឋានកាយដីត្រង់ចំណុចខាងលើនេះ។ ប៉ុន្តែលោកអធិការ មិនបានប្រាប់អត្តសញ្ញាណ មន្ត្រីបាញ់បោះអនាធិបតេយ្យផ្អើលពលរដ្ឋកណ្ដាលយប់នោះទេ តែបានបញ្ជាក់ថា មន្ត្រីនោះមកពី«នាយកដ្ឋានការពារព្រះបរមរាជវាំង» ដែលនៅការពារទីតាំង ការដ្ឋានកាយដីរបស់ក្រុមគ្រឿងចក្រ មកពីបរមរាជវាំងនៅចំណុចខាងលើ។
ដោយឡែក លោកព្រំ សំប៉ាតេ មន្ត្រីនគរបាលអធិការស្រុកបាណន់ទទួលផ្នែកព្រហ្មទណ្ឌ ដែលបានឆ្លងឆ្លើយតាមរយៈខមិនក្នុងបណ្ដាញសង្គម ជាមួយកោះសន្តិភាពដែរ ហាក់មិនបានដឹងអំពីករណីផ្ទុះអាវុធនេះទេ នៅពេលសួរនាំអំពីរឿងនេះ ។ មន្ត្រីរូបនេះបានផ្ដល់ជាចម្ងល់មកវិញថា «ខ្ញុំមិនបានដឹងថា តើប៉ូលិសបាណន់ម្នាក់ណា បានបាញ់នោះទេបង»។ នៅពេលសួរបន្តថា ចុះអ្នកណា អ្នកបាញ់ ? លោកតេបានឆ្លើយតបតាមរយៈខមិន ដោយជម្រុញឲ្យកោះសន្តិភាព សួរបន្តយ៉ាងដូច្នេះ « បងអាចសួរទៅ ឯ.ឧ ស្នងការទៅ ព្រោះលោកគាត់ដឹងច្បាស់ រាល់ព័ត៌មាន បងអាចសួរទៅប្រធានអង្គភាពខ្ញុំ លោកគាត់ដឹងគ្រប់រឿង ក្រោយកើយហេតុ ព្រោះខ្ញុំគ្រាន់តែជាកូនចៅគេទេ» ។
ជាមួយគ្នានេះដែរ បើតាមរបាយការណ៍ដែលផ្ដល់ដោយ លោកសាត សៀត អធិការរងស្រុកបាណន់ដែរ បានឲ្យដឹងថា មន្ត្រីនគរបាល ដែលបាញ់បោះសេរីនោះ ឈ្មោះ ផុន ថៃ អាយុ៣៣ឆ្នាំ នៅនាយកដ្ឋានអង្គរក្ស អង្គភាពការពារព្រះបរមរាជវាំង អត្តលេខ ៦២០៥១ មានឋានន្តរសក្តិអនុសេនីយ៍ឯក ។ របាយការណ៍បានបញ្ជាក់ថា មន្ត្រីនេះ បានប្រើប្រាសកាំភ្លើង AK47 ស្វាយបត់បាញ់ឡើងលើចំនួន០៥គ្រាប់ នៅត្រង់ចំណុចកើតហេតុខាងលើ។ មូលហេតុ គឺ«បាញ់ការពារ កន្លែងគ្រឿងចក្រដែលជាព្រះរាជទ្រព្យរបស់ព្រះបរមរាជវាំង ដែលស្នាក់នៅកន្លែងស្ងាត់ពេក»។
ព្រឹត្តិហេតុបានបញ្ជាក់នៅក្នុងរបាយការណ៍នេះថា ករណីផ្ទុះអាវុធនេះ បានកើតឡើង នៅវេលាម៉ោង៩ និង៤០នាទីយប់ថ្ងៃទី៣១ សីហា កន្លងទៅថ្មីៗនេះ នៅត្រង់ចំណុចពឺត ស្ថិតក្នុងភូមិសំបួរមាស ឃុំស្នឹង ស្រុកបាណន់ ដែលជាកន្លែងការដ្ឋានគ្រឿងចក្រកាយយកថ្ម ហើយមន្ត្រីនគរបាលបាញ់បោះសេរីនោះ ជាអ្នកការពារគ្រឿងចក្រក្នុងការដ្ឋាននេះ។ ប៉ុន្តែបើតាមប្រភពព័ត៏មានបឋម ដែលកោះសន្តិភាពទទួលបានពីប្រជាពលរដ្ឋនៅថ្ងៃបន្ទាប់ថា គេសង្ស័យមន្ត្រីនគរបាលនោះស្រវឹងស្រា ទើបទាញកាំភ្លើងAK បាញ់មេឃផ្អើលអ្នកភូមិទាំងយប់បែបនេះ។ ប្រភពក៏បានបញ្ជាក់ដែរថា មន្ត្រីដែលចុះពិនិត្យ និងសួរនាំមន្ត្រីនោះទំនងក៏បានដឹងពីរឿងមន្ត្រីផឹកស៊ីស្រវឹងដែរ តែជួយបិទបាំងគ្នា។
អធិការស្រុកបាណន់ លោក ប៉ាន់ វ៉ាន់នី មិនបានដាក់ការមន្ទិលទៅលើរឿងនេះទេ ក្រោយមន្ត្រីជំនាញរបស់លោក ចុះទៅពិនិត្យកន្លែងកើតហេតុ។
លោកអធិការបានប្រាប់យ៉ាងដូច្នេះថា « នៅថ្ងៃបន្ទាប់ ខ្ញុំឃើញមន្ត្រីបង្កហេតុនោះ មានទឹកមុខធម្មតា មិនមានអ្វីប្លែកទេ។ រីឯកន្លែងកើតហេតុ ក៏មិនឃើញមានអ្វីកត់សម្គាល់ដែរ តែខ្ញុំទទូលស្គាល់ថា មន្ត្រីរូបនេះ ពិតជាបាញ់កាំភ្លើងចំនួន០៥គ្រាប់មែន»។ លោក ប៉ាន់ វ៉ាន់នី បានស្រង់សំដីមន្ត្រីនោះថា គាត់បានបាញ់ ដោយសារនៅទីនោះស្ងាត់ពេក និងសង្ស័យមានមនុស្សចង់ចូលទីតាំងការដ្ឋានផង។ ប៉ុន្តែយ៉ាងណា តាមគោលការណ៍ លោកស្នងការខេត្ត លោកបានហៅមន្ត្រីនោះ មកអប់រំណែនាំ និង ធ្វើកិច្ចសន្យារួចហើយ។ ក្នុងកិច្ចសន្យា លោក ផុន ថៃ មន្ត្រីបាញ់បោះសេរី បាននិយាយថា ខ្លួនជានគរបាល នៅនាយកដ្ឋានអង្គរក្ស អង្គភាពការពារព្រះបរមរាជវាំង មានភារកិច្ចចុះការពារគ្រឿងចក្រ ចុះកាយ និងស្ដារអាងព្រះស្រែ ស្ថិតក្នុងភូមិព្រះស្រែ ឃុំស្នឹង ស្រុកបាណន់។
នៅក្នុងកិច្ចសន្យាមន្ត្រីរូបនេះ មិនបាននិយាយពីមូលហេតុ ដែលឈានដល់ការទាញកាំភ្លើងបាញ់រះទៅលើមេឃទេ តែបានសារភាពថា ខ្លួនពិតជាបានប្រើប្រាស់កាំភ្លើងAK47 បាញ់មេឃចំនួន០៥គ្រាប់មែន ពេលខ្លួនចុះទៅយាមទីតាំងការដ្ឋានកាយយកថ្ម នៅចំណុចភ្នំពឺតនោះ។ យ៉ាងណា មន្ត្រីរូបនេះបានសន្យាថា «ខ្ញុំនឹងបញ្ឍប់ការបាញ់បោះខុសច្បាប់នេះ។ ប្ដេជ្ញាគោរពបទវិន័យរបស់កងកម្លាំងនគរបាលជាតិលេខ០០៦ តែប្រសិនបើថ្ងៃខាងមុខ ខ្ញុំប្រព្រឹត្តផ្ទុយពីកិច្ចសន្យានេះ ខ្ញុំសូមទទូលខុសត្រូវចំពោះមុខច្បាប់ជាធរមាន»។
ពាក់ព័ន្ធនឹងករណីនេះ លោក លឹម ពុទ្ធីឡា ស្នងការរងខេត្ត បានបញ្ជាក់ប្រាប់កោះសន្តិភាពថា លោកបានទទូលសេចក្ដីរាយការណ៍នេះ នៅថ្ងៃបន្ទាប់ ហើយលោកស្នងការបានបញ្ជាឲ្យមន្ត្រីមូលដ្ឋានចុះទៅពិនិត្យទីតាំងកើតហេតុភ្លាមៗដែរ ហើយថែមទាំងបានហៅមន្ត្រីរូបនោះ មកសួរនាំទៀតផង ។ បើតាមចម្លើយ មន្ត្រីនោះថា ខ្លួនមានការសង្ស័យថា មានមនុស្សព្យាយាមចូលទីតាំងគ្រឿងចក្រ ទើបបានជាប្រើប្រាស់កាំភ្លើងបាញ់ដូច្នេះ។ លោកស្នងការរងបានបញ្ជាក់ដែរថា ពេលនេះ យើងបានឲ្យមន្ត្រីបង្កការផ្ទុះអាវុធនោះ ធ្វើកិច្ចសន្យាបញ្ឈប់សកម្មភាពបែបនេះទៀតហើយ និង ត្រូវចូលរួមសហការជាមួយមន្ត្រីមូលដ្ឋាន ប្រសិនបើមានហេតុការណ៏ផ្សេងៗ ដែលគួរឲ្យមានការសង្ស័យ។
ប៉ុន្តែលោក ប៉ាន់ វ៉ាន់នី អធិការស្រុកបាណន់ បានបញ្ជាក់ផងដែរ នៅព្រឹកថ្ងៃទី០៣ កញ្ញានេះថា ពិតមែនតែលោកស្នងការខេត្ត បានបញ្ជាឲ្យមន្ត្រីបង្កហេតុនោះ ធ្វើកិច្ចសន្យារួចហើយ តែពេលនេះថ្នាក់លើ បានបញ្ជាឲ្យលោកបានធ្វើរបាយការណ៍លំអិតអំពីករណីផ្ទុះអាវុធនេះបន្ថែមទៀត ដើម្បីដាក់គោរពជួនទៅអគ្គស្នងការនគរបាលជាតិបាន
ជ្រាប៕
ចែករំលែកព័តមាននេះ