ខេត្តមណ្ឌលគិរី ៖ មន្ត្រីឧទ្យានុរក្សប្រចាំដែនជម្រកការពារសត្វព្រៃកែវសីមា ត្រូវមហាជនសង្ស័យថា ជាអ្នកនៅពីក្រោយខ្នងនៃសកម្មភាពក្រុមឈ្មួញរកស៊ីឈើខុសច្បាប់ ក្រោយគណៈបញ្ជាការឯកភាពស្រុកកែវសីមា ចាប់បង្ក្រាបបទល្មើសព្រៃឈើរាប់សិបករណីក្នុងឆ្នាំ២០២០នេះ ។
សេចក្តីរាយការណ៍បានឲ្យដឹងថា ឡានកែច្នៃធុនធំមួយគ្រឿងត្រូវកម្លាំងចម្រុះដេញចាប់បានកាលពីវេលារំលងអធ្រាត្រថ្ងៃទី០២ កញ្ញា ២០២០ ខណៈឡាននេះបានដឹកឈើឡាំងជ្រុងពេញទ្រុង បម្រុងឆ្លងដែនទៅយួន។ឡាននេះដឹកឈើប្រភេទ សុក្រំ ស្រឡៅ ចំនួន១៨ដុំ ដោយពុំទាន់បានធ្វើការវាស់វែងនៅឡើយ។
ក្នុងករណីនេះ ក្រុមតាមដានបទល្មើសព្រៃឈើនិយាយថា គេសង្ស័យទៅលើដែនជម្រកសត្វព្រៃកែវសីមាដែលប្រចាំការនៅភូមិសាស្ត្រឃុំស្រែព្រះ ដែលមានស្នាក់ការ២កន្លែង គឺស្នាក់ការពូគង់ និងស្នាក់ការស្រែផ្លែង ដែលត្រូវរ៉ូវគ្នាជាមួយក្រុមឈ្នួញទើបពួកគេអាចរកស៊ីដឹកជញ្ជូនឈើខ្នាតយក្សបែបនេះបាន។
ជុំវិញករណីនេះលោក ថាច់ ពិននីរ៉ូ មន្ត្រីបរិស្ថានដែនជម្រកសត្វព្រៃកែវសីមា បាននិយាយថា រថយន្តខាងលើពុំមែនដឹកចេញពីព្រៃឡើយ គឺជារថយន្តដែលជួលដឹកឈើ ដែលបង្ក្រាបនៅចំណុចអូរខ្ចង។លោក នីរ៉ូ បន្តថា ក្នុងការជួលរថយន្តនេះគឺមានការដោះដូរថ្លៃឈ្នួលជាឈើ ហើយគេដឹកឈើបង្ក្រាបមិនទាន់អស់ផង បែជារថយន្តខាងលើដឹកឈើគេចពុំព្រមយកទៅទំលាក់នៅស្នាក់ការបរិស្ថាននោះឡើយ។
ឆ្លើយតបករណីនេះនាយសង្កាត់រដ្ឋបាលព្រៃឈើចុងផ្លាស់+ស្រែព្រះ លោក ឈាង ណាក់ បញ្ជាក់ថា ទោះបីជារថយន្តជួលដឹកឈើដែលបង្ក្រាបដោយកម្លាំងបរិស្ថានយ៉ាងណាក្តី ប៉ុន្តែវាព្យាយាមគេចមិនព្រមយកទៅទុកនៅស្នាក់ការបរិស្ថាន ដូចច្នេះត្រូវតែចាប់ កសាងសំណុំរឿង ។ ព្រោះមកដល់ដែនសមត្ថកិច្ចរដ្ឋបាលព្រៃឈើនោះហើយ ដោយក្រុមជនល្មើសបានដឹកបង្ហួស បម្រុងឆ្ពោះទៅប្រទេសវៀតណាម ដោយគៀកនិងច្រកចេញទៅហើយ។
ដោយឡែក អភិបាលរងស្រុកកែវសីមាលោក ហឿន សុខណា បញ្ជាក់ថា លោកពុំបានដឹងថា មន្ត្រីបរិស្ថានបង្ក្រាបចាប់បទល្មើសព្រៃឈើ នៅចំណុចអូរខ្ចងនោះឡើយ ហើយពួកគាត់ក៏មិនត្រូវឲ្យថ្លៃឈ្នួលរថយន្តដឹកឈើជាឈើនោះទេ ព្រោះបើឲ្យជាឈើ ក៏ត្រូវរាយការណ៏ជូនអាជ្ញាធរដែរ៕
ចែករំលែកព័តមាននេះ