ADផ្ទាំងផ្សព្វផ្សាយពាណិជ្ជកម្ម

ម្ចាស់ផ្ទះរវល់លក់ដូរ អ្នកជិតខាងមកប្រាប់ លុះរត់ទៅមើលឃើញភ្លើងឆេះមែន

3 ឆ្នាំ មុន

ភ្នំពេញ
០៣ ខែ កញ្ញា ឆ្នាំ ២០២០ ម៉ោង ១៤:៤២

រាជធានីភ្នំពេញ ៖ ផ្ទះល្វែងមួយកន្លែងត្រូវបានអគ្គិភ័យឆាបឆេះគ្រឿងក្នុងជាន់ទី២ ដែលសង្ស័យថាបណ្ដាលមកពីការឆ្លងចរន្តអគ្គិសនី ខណៈដែលស្ត្រីជាម្ចាស់ផ្ទះនោះជាប់រវល់លក់ដូរនៅខាងក្រោម ហើយភ្លាមៗនោះមានការជួយអន្តរាគមន៍ពីអាជ្ញាធរនិងសមត្ថកិច្ចនាំយករថយន្តពន្លត់អគ្គិភ័យទៅបាញ់ពន្លត់ទាន់ពេលវេលា ទើបភ្លើងបានរលត់ទៅវិញទាំងស្រុង។ ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី៣ ខែកញ្ញាឆ្នាំ ២០២០…

ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី៣ ខែកញ្ញាឆ្នាំ ២០២០ នៅបុរីពិភពថ្មីចំការដូង ស្ថិតនៅក្នុងភូមិសំបួរសង្កាត់ដង្កោ ខណ្ឌដង្កោ រាជធានីភ្នំពេញ។

ម្ចាស់ផ្ទះខាងលើឈ្មោះអ៊ី សុវណ្ណរដ្ឋា ភេទស្រី អាយុ៣៣ឆ្នាំ មុខរបរលក់ដូរ ស្នាក់នៅក្នុងផ្ទះកើតហេតុខាងលើនេះតែម្ដង។

ស្ត្រីដែលជាម្ចាស់ផ្ទះខាងលើបាននិយាយថា នៅមុនពេលកើតហេតុ ខណៈដែលគាត់កំពុងជាប់រវល់លក់ដូរនៅខាងក្រោម អ្នកជិតខាងបានរត់ទៅប្រាប់ថា ភ្លើងឆេះផ្ទះជាន់ទី២ ខណៈនោះគាត់ក៏បានរត់ទៅមើលឃើញមានផ្សែងហុយចេញពីបន្ទប់ជាន់នោះមែន។បន្ទាប់មកទៀតគាត់ក៏បានឡើងទៅបើកទ្វារមើលឃើញភ្លើងកំពុងឆាបឆេះគ្រែ ពូកទើបស្រែកឆោឡោបង្កឲ្យមានការភ្ញាក់ផ្អើល ហើយអ្នកជិតខាងបាននាំគ្នាយកបំពង់ពន្លត់អគ្គិភ័យទៅជួយបាញ់ ពន្លត់អស់ចំនួន៤បំពង់តែភ្លើងមិនបានរលត់នោះឡើយ ទើបរាយការណ៍ទៅកាន់អាជ្ញាធរនិងសមត្ថកិច្ចឲ្យជួយ។

បើតាមនគរបាលបានឲ្យដឹងថា បន្ទាប់ពីទទួលបានព័ត៌មានខាងលើនេះ ភ្លាមអាជ្ញាធររួមជាមួយនគរបាលនិងកងរាជអាវុធហត្ថខណ្ឌបានចេញអន្តរាគមន៍និងនាំយករថយន្តពន្លត់អគ្គិភ័យរបស់ស្នងការរាជធានីភ្នំពេញប្រចាំនៅសាលាខណ្ឌដង្កោ១គ្រឿងទៅបាញ់ពន្លត់អស់ទឹក១ស៊ីទែន ទើបភ្លើងរលត់ទៅវិញទាំងស្រុង ។

នៅក្នុងហេតុការណ៍ខាងលើនេះបានបណ្ដាលឲ្យបន្ទប់ជាន់ទី២រងការខូចខាតហើយភ្លើងបានឆេះគ្រែពូក១ កញ្ចក់ទ្វារ៣ផ្ទាំងផងដែរ ចំណែកមូលហេតុបណ្ដាលមកពីឆ្លងចរន្តអគ្គិសនី៕ (កែសម្រួលដោយ ៖ ធីតា)