អ្នកភូមិឆោឡោ! ក្រោយប្រទះឃើញឡិចស៊ីស RX-330 ខ្ទេចមុខគ្របទុកចោលតាមផ្លូវ
- ភ្នំពេញ
រាជធានីភ្នំពេញ ៖ រថយន្តម៉ាកឡិចស៊ីស RX-330 មួយគ្រឿង អត់មានស្លាកលេខ អត់ប័ណ្ណបង់ពន្ធ ឆៀក និងមីញ៉ែតពន្ធ ហើយបានរងការខូចខាតខ្ទេចមុខ…
រាជធានីភ្នំពេញ ៖ រថយន្តម៉ាកឡិចស៊ីស RX-330 មួយគ្រឿង អត់មានស្លាកលេខ អត់ប័ណ្ណបង់ពន្ធ ឆៀក និងមីញ៉ែតពន្ធ ហើយបានរងការខូចខាតខ្ទេចមុខ…
រាជធានីភ្នំពេញ ៖ រថយន្តម៉ាកឡិចស៊ីស RX-330 មួយគ្រឿង អត់មានស្លាកលេខ អត់ប័ណ្ណបង់ពន្ធ ឆៀក និងមីញ៉ែតពន្ធ ហើយបានរងការខូចខាតខ្ទេចមុខ ធ្លាក់កាងក្រោយនិងក្រពិតទ្វារក្រោយទៀតផងនោះ ត្រូវបានម្ចាស់គ្របក្រណាត់ទុកចោលនៅតាមផ្លូវមុខផ្ទះប្រជាពលរដ្ឋមួយកន្លែង បង្កឲ្យមានការភ្ញាក់ផ្អើលទាំងព្រឹក ព្រោះសង្ស័យថាជាប់ពាក់ព័ន្ធនិងបទល្មើសអ្វីមួយ។
ក្រោយមកទើបលេចមុខបុរសម្នាក់ទៅកាន់ទីនោះដែរនិងអះអាងថាគាត់ជាម្ចាស់រថយន្តនេះហើយគាត់បានប្រាប់នគរបាលថា បានជួបឧប្បត្តិហេតុគ្រោះថ្នាក់ចរាចរកាលពីយប់ ប៉ុន្តែគាត់និយាយមិនប្រាកដថា កើតឡើងនៅកន្លែងណាឡើយ។ ដោយម្ដងប្រាប់ថាកើតនៅក្នុងខណ្ឌទួលគោក ម្ដងថានៅក្នុងខណ្ឌសែនសុខ និងក្រោយមកថាបុកបារ៉ាស់នៅការដ្ឋានស្ថាបនាស្ពានអាកាសរង្វង់មូលថ្នល់បំបែកចោមចៅទៅវិញ។
ហេតុការណ៍ខាងលើនេះបង្កការភ្ញាក់ផ្អើលបានកើតឡើងកាលពីវេលាម៉ោង៧ព្រឹកថ្ងៃទី៣ ខែកញ្ញា ឆ្នាំ២០២០ នៅតាមផ្លូវបេតុង ស្ថិតនៅក្នុងភូមិចំការឪឡឹក១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
អ្នកភូមិបាននិយាយថា នៅមុនពេលមានការភ្ញាក់ផ្អើល ក្រោយពេលភ្ញាក់ពីដំណេកបានប្រទះឃើញរថយន្ត១គ្រឿងចតចោលនៅតាមផ្លូវក្នុងភូមិ ប៉ុន្តែនៅភ្លាមៗនោះអត់ទាន់ស្គាល់ថាជារថយន្តម៉ាកអ្វីនៅឡើយទេ ហើយដោយមានការសង្ស័យពួកគាត់ក៏បានបើកក្រណាត់មើល ទើបស្គាល់ថាជាម៉ាកឡិចស៊ីស RX-330 ពណ៍ស្ករ ។ មិនតែប៉ុណ្ណោះអ្វីដែលរឹតតែមានការសង្ស័យខ្លាំងថែមទៀតនោះគឺរថយន្តនេះបានរងការខូចខាតខ្ទេចមុខ ធ្លាក់កាងក្រោយនិងក្រពិតទ្វារក្រោយ ហើយថែមទាំងអត់មានស្លាកលេខ អត់ប័ណ្ណបង់ពន្ធ ឆៀក និងមីញ៉ែតពន្ធទៀតផង។
តាមប្រភពដដែលបានបន្តទៀតថា ពេលនោះដោយខ្លាចរថយន្តនេះជាប់ពាក់ព័ន្ធទៅនឹងបទល្មើសអ្វីផ្សេងទៀតក្រៅពីឧប្បត្តិហេតុគ្រោះថ្នាក់ចរាចរណ៍នោះ ទើបពួកគាត់រាយការណ៍ជូននគរបាលប៉ុស្តិ៍កាកាបទី១ ឲ្យចុះទៅធ្វើការត្រួតពិនិត្យភ្លាមៗ ចំណែកខាងកម្លាំងនគរបាលចរាចរខណ្ឌពោធិ៍សែនជ័យក៏បានចុះទៅដែរ។ នៅពេលភ្លាមៗ នគរបាលក៏មិនទាន់ដឹងថាជាករណីអ្វីឲ្យប្រាកដដែរ ប៉ុន្តែនៅក្នុងខណៈដែលកំពុងមានការភ្ញាក់ផ្អើល ស្រាប់តែមានបុរសម្នាក់ស្លៀកខោខ្លីពណ៍ខៀវ ពាក់អាវយឺត ពណ៍ខ្មៅដៃខ្លី ចេញមុខថាជារថយន្តរបស់ខ្លួនដែលបានជួបឧប្បត្តិហេតុគ្រោះថ្នាក់ចរាចរកាលពីយប់មិញ ហើយខ្លួនមានទីលំនៅជិតកន្លែងកើតហេតុនោះដែរ។
បុរសម្នាក់ដែលអះអាងថាជាម្ចាស់រថយន្តខាងលើបាននិយាយប្រាប់នគរបាលថា រថយន្តរបស់គាត់មានស្លាកលេខ ប័ណ្ណបង់ពន្ធ ឆៀក និងមីញ៉ែតពន្ធត្រឹមត្រូវ តែក្រោយកើតហេតុ ខ្លួនបានដោះទុក ហើយកាលពីវេលាម៉ោង២យប់រំលងអាធ្រាត្រឈានចូលថ្ងៃទី២ ខែកញ្ញា បានជួបឧប្បត្តិហេតុគ្រោះថ្នាក់ចរាចរ ទើបបណ្ដាលឲ្យរងការខូចខាតបែបនេះ។ ប៉ុន្តបុរសនេះហាក់និយាយត្រឡប់ត្រឡិនមិនច្បាស់លាស់សោះ ដោយម្ដងថាជួបគ្រោះថ្នាក់នៅក្នុងខណ្ឌទួលគោក និងម្ដងថានៅក្នុងខណ្ឌសែនសុខ ។
លុះក្រោយមក បុរសខាងលើបាននិយាយថា នៅវេលាយប់នោះ គាត់ និងប្រពន្ធបានទៅផឹកស៊ីនៅម៉ុងឌីយ៉ាល់ លុះពេលត្រឡប់មកផ្ទះវិញ មិនបានចូលផ្ទះឡើយដោយបានបើកហួសទៅរកទិញទឹកហូបនៅឯរង្វង់មូលថ្នល់បំបែកចោមចៅ ដែលមានចម្ងាយប្រមាណជាង៣គីឡូម៉ែត្រពីផ្ទះ ។ ក្រោយពេលទិញរួចក៏បើករថយន្តត្រឡប់មកវិញហើយ ក៏បានបុកបារ៉ាស់នៅការដ្ឋានស្ថាបនាស្ពានអាកាសរង្វង់មូលថ្នល់បំបែកចោមចៅបណ្ដាលឲ្យរងការខូចខាតបែបនេះតែម្ដង បន្ទាប់មកគាត់បានបើករថយន្តទាំងខូចខាតបន្តដំណើរទៅផ្ទះ តែដោយសារតែទៅមុខទៀតលែងរួចទើបចតទុកចោលកន្លែងនោះតែម្ដងទៅ។
នគរបាលបានប្រាប់ថា មិនទាន់ជឿលើការនិយាយរបស់បុរសជាម្ចាស់រថយន្តរូបនេះទាំងស្រុងនៅឡើយទេ ព្រោះបុរសរូបនោះនិយាយមិនច្បាស់ពីកន្លែងគ្រោះថ្នាក់ឲ្យប្រាកដថាកន្លែងណាមួយសោះ ដូច្នេះមិនអាចប្រគល់រថយន្តឲ្យយកទៅជួសជុលភ្លាមៗបានទេ មានតែស្ទូចយកទៅរក្សាទុកសិន រង់ចាំបុរសជាម្ចាស់រថយន្តចង្អុលបង្ហាញពីទីកន្លែងគ្រោះថ្នាក់ឲ្យបានច្បាស់សិនថាតើមានការប៉ះពាល់ទ្រព្យសម្បត្តិរដ្ឋឬឯកជនណាមួយឬអត់សិន ទើបអាចដោះស្រាយនិងប្រគល់រថយន្តជូនគាត់វិញបាន៕ (កែសម្រួលដោយ ៖ ធីតា)
ចែករំលែកព័តមាននេះ