ខេត្តបាត់ដំបង ៖ «ចូលរួមគោរពច្បាប់ចរាចរណ៍ផ្លូវគោកគឺដើម្បីការពារជីវិតរបស់យើងជីវិតគ្រួសារយើង និងជីវិតអ្នកដទៃ» នេះជាការលើកឡើងរបស់លោកឧត្តមសេនីយ៍ទោ អ៊ុច សុខុន ស្នងការនគរបាល ខេត្តបាត់ដំបង បាននាំយកអំណោយដ៏ថ្លៃថ្លារបស់សម្តេចក្រឡាហោម…
ខេត្តបាត់ដំបង ៖ «ចូលរួមគោរពច្បាប់ចរាចរណ៍ផ្លូវគោកគឺដើម្បីការពារជីវិតរបស់យើងជីវិតគ្រួសារយើង និងជីវិតអ្នកដទៃ» នេះជាការលើកឡើងរបស់លោកឧត្តមសេនីយ៍ទោ អ៊ុច សុខុន ស្នងការនគរបាល ខេត្តបាត់ដំបង បាននាំយកអំណោយដ៏ថ្លៃថ្លារបស់សម្តេចក្រឡាហោម ស ខេង និងលោកជំទាវប្រគល់ជូនកងកម្លាំងនគរបាលវរៈព្រំដែនគោកលេខ៨១៧ នាឱកាសបុណ្យកាន់បិណ្ឌ ភ្ជំបិណ្ឌនៅរសៀលថ្ងៃទី០២ ខែកញ្ញា ឆ្នាំ២០២០នេះ បានដឹកនាំប្រតិភូនៃស្នងការដ្ឋាននគរបាលខេត្ត បាត់ដំបងចុះសំណេះសំណាល សួរសុខទុក្ខដល់កងកម្លាំងវរសេនាតូចនគរបាលការពារព្រំដែនគោក លេខ៨១៧ដែលឈរជើងនៅស្រុកសំពៅលូនខេត្តបាត់ដំបង។
ក្នុងពិធីសំណេះសំណាលនេះ លោកឧត្តមសេនីយ៍ទោស្នងការបានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ព្រមទាំងប្រសាសន៍ផ្តាំផ្ញើសួរសុខទុក្ខរបស់ លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ចំពោះកងកម្លាំងនគរបាល ទាំងអស់ព្រមទាំងក្រុមគ្រួសារនាឱកាសនៃពិធីបុណ្យ កាន់បិណ្ឌ ភ្ជុំបិណ្ឌ ប្រពៃណីជាតិខ្មែរដែលនឹងឈាន ចូលមកដល់នាថ្ងៃខាងមុខ ហើយបានកោតសរសើរចំពោះទឹកចិត្តអង់អាចក្លាហាន និងកិច្ចខិតខំប្រឹងប្រែងបំពេញភារកិច្ចរបស់កងកម្លាំងនគរបាលជាតិពិសេសនគរបាលវរសេនាតូចការពារព្រំដែនគោក ដែលកំពុងបំពេញ ភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែន កម្ពុជា ថៃ នាពេលកន្លងមក។
លោកឧត្តមសេនីយ៍ស្នងការ បានផ្តាំផ្ញើដល់កងកម្លាំងនគរបាលទាំងអស់ត្រូវបន្តខិតខំបំពេញ ភារកិច្ចស្របតាមតួនាទី និងភារកិច្ច របស់ខ្លួនជាកងកម្លាំងនគរបាលជាតិត្រូវតស៊ូ និងស្មោះត្រង់ចំពោះជាតិ សាសនា ព្រះមហាក្សត្រ ស្មោះត្រង់ជាមួយរាជរដ្ឋាភិបាលស្របច្បាប់ និងត្រូវមានសាមគ្គីភាពផ្ទៃក្នុងឱ្យកាន់តែល្អប្រើសើរទេ្វរដង បន្តកិច្ចសហប្រតិបត្តិការល្អជាមួយសមត្ថកិច្ច អាជ្ញាធរពាក់ព័ន្ធនៅមូលដ្ឋាន រួមទាំងសមត្ថកិច្ចជាប់ព្រំដែននៃប្រទេសទាំងពីរ ក្រៅពីនោះកងកម្លាំងនគរបាលត្រូវគោរពប្រតិបត្តិនូវវិន័យលេខ០០៦ របស់កងកម្លាំងនគរបាលជាតិ គោរពច្បាប់ត្រូវចៀសឱ្យឆ្ងាយកុំយកខ្លួន ទៅពាក់ព័ន្ធនឹងករណីល្មើសច្បាប់ផ្សេងៗ ហើយត្រូវចូលរួមគោរពច្បាប់ចរាចរណ៍ផ្លូវគោកទាំងអស់គ្នា។
ក្នុងឱកាសពិធី បុណ្យកាន់បិណ្ឌ ភ្ជុំបិណ្ឌប្រពៃណីជាតិខ្មែរដែលឈានចូលមកដល់នាថ្ងៃខាងមុខ សូមកងកម្លាំងនគរបាលទាំងអស់ព្រមទាំងក្រុមគ្រួសារបន្តយកចិត្តទុកដាក់ថែទាំសុខភាពជាប់ជាប្រចាំធ្វើអនាម័យខ្លួនឱ្យបានល្អប្រសើរបំផុត ចៀសឱ្យផុតពីជំងឺកូវីដ-១៩ ទាំងអស់គ្នា ដោយគោរពឱ្យបាននូវសេចក្តីណែនាំ និងអំពាវនាវរបស់ក្រសួងសុខាភិបាល។ ក្នុងពិធីសំណេះសំណាលសួរសុខទុក្ខនេះ លោកឧត្តមសេនីយ៍ទោ អ៊ុច សុខុន បាននាំយកនូវអំណោយដ៏ថ្លៃថ្លារបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ តាមរយៈក្រុមការងារក្រឡាហោមមនុស្សធម៌បាត់ដំបងដែលមានលោក ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូនជាប្រធាន និងរបស់លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ឧបត្ថមដល់កងកម្លាំងនគរបាលដូចខាងក្រោម ៖
១-អំណោយរបស់សម្ដេចក្រឡាហោម ស ខេង និងលោកជំទាវ ថវិកាចំនួន ២.០០០.០០០ (ពីរលានរៀល), អង្ករចំនួន ២.០០០ គីឡូក្រាម, មីថៃ ចំនួន១០កេសតូច, ទឹកក្រូចចំនួន ១០កេស, ទឹកបរិសុទ្ធចំនួន ១០កេស, ត្រីខចំនួន ១០យួរ,ទឹកត្រីចំនួន១០យួរ, ទឹកស៊ីអ៊ីវចំនួន១០យួរ, ខ្ទឹមសចំនួន ០៥គីឡូក្រាម,ប៊ីចេងចំនួន ០៥គីឡូក្រាម,ស្ករសចំនួន ០៥គីឡូក្រាម។
២-អំណោយរបស់ លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ថវិកា ចំនួន ១.០០០.០០០(មួយលានរៀល)។
៣-អំណោយរបស់ លោក ងួន រតនៈ អភិបាលនៃគណៈអភិបាលខេត្តបាត់ដំបង ថវិកាចំនួន ១.០០០.០០០ រៀល(មួយលានរៀល)។ ៤-អំណោយរបស់ លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ថវិកា ចំនួន ១.០០០.០០០(មួយលានរៀល)៕ ដោយ ៖ ហួត សុងហាក់
ចែករំលែកព័តមាននេះ