ខេត្តកំពង់ឆ្នាំង ៖ សមត្ថកិច្ចចម្រុះ ដឹកនាំដោយមន្ត្រីខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទខេត្ត កាលពីព្រឹកថ្ងៃទី១ ខែកញ្ញា ឆ្នាំ២០២០ បានចុះបង្ក្រាបបទល្មើសនេសាទក្នុងរដូវបិទនេសាទ ក្នុងភូមិសាស្ត្រខេត្តកំពង់ឆ្នាំង ជា២គោលដៅ គឺនៅស្រុកជលគិរី
និងស្រុកបរិបូណ៌ ដោយរឹបអូសឧបករណ៍ល្មើសនេសាទមានដូចជា របាំងស្បៃមុង របាំងសាច់អួនក្រឡាញឹក ព្រមទាំងលែងកូនត្រីចម្រុះជាច្រើនគីឡូក្រាមចូលទៅក្នុងទន្លេ និងបឹងធម្មជាតិវិញ។
លោក លី ឡា នាយខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់និងនេសាទខេត្ត ដែលបានដឹកនាំការបង្ក្រាបផ្ទាល់ បានឲ្យដឹងថា នៅព្រឹកថ្ងៃទី១ ខែកញ្ញានោះ សមត្ថកិច្ចចម្រុះបានសហការជាមួយសហគមន៍នេសាទ កងរាជអាវុធហត្ថ មន្ត្រីបរិស្ថាន និងមន្ត្រីនគរបាល ធ្វើការបែងចែកកម្លាំងជាគោលដៅ ក្នុងនោះគោលដៅទី១-ចុះបង្ក្រាបបទល្មើសនៅឃុំឆ្នុកទ្រូស្រុកបរិបូណ៌ និងគោលដៅទី២-ចុះបង្ក្រាបនៅស្រុកជលគីរី ។
លោក លី ឡា បន្តថា ជាលទ្ធផលសរុបទាំង២កន្លែង ក្នុងការបង្ក្រាបរយៈពេលមួយព្រឹកថ្ងៃទី១ ខែកញ្ញានោះ គឺបង្ក្រាបរបាំងស្បៃមុងចំនួន១៥កន្លែង ស្មើនឹង៤០០ម៉ែត្រ លបលូស្បៃមុងចំនួន១៧មាត់ រឹបអូសអួនក្រឡាញឹកបាន ៣៨កន្លែង ស្មើនឹង៧៦០ម៉ែត្រ លបលូសាច់អួនក្រឡាញឹក៣៨មាត់ ដកហូតបង្គោលសរុបចំនួន៨០០ដើម និងចាក់លែងកូនត្រីចម្រុះចូលទៅក្នុងទន្លេនិងបឹងធម្មជាតិវិញជាង៨០គីឡូក្រាម ។
ក្នុងប្រតិបត្តិការបង្ក្រាបនេះ សមត្ថកិច្ចចម្រុះបានប្រើប្រាស់កម្លាំងសរុបចំនួន៣៧នាក់ ដោយបានប្រើប្រាស់កាណូតបាឡាស្មាច់ចំនួន១០ គ្រឿង ។ ជាការកត់សម្គាល់ ក្នុងរដូវបិទនេសាទដែលទឹកទន្លេទើបនឹងឡើងបន្តិចបន្តួចនេះ បទល្មើសនេសាទនៅក្នុងភូមិសាស្ត្រឃុំឆ្នុកទ្រូ ស្រុកបរិបូណ៌ គឺប្រើរបាំងនិងលបធ្វើពីសាច់អួនក្រឡាញឹក ចំណែកនៅស្រុកជលគិរីគឺប្រើរបាំងនិងលបស្បៃមុង ។
លោកនាយខណ្ឌរដ្ឋបាលជលផល លី ឡា បានអំពាវនាវដល់ប្រជាពលរដ្ឋ សូមកុំបន្តនេសាទក្នុងរដូវហាមឃាត់ ដូចជាការប្រើប្រាស់លបលូស្បៃមុង និងលបសាច់អួនក្រឡាញឹកនេះជាដាច់ខាត ។ ក្នុងរដូវបិទនេសាទគឺត្រីកំពុងសម្រុករកព្រៃដើម្បីពងកូន ប្រសិនបើយើងនៅតែបន្តនេសាទ បំផ្លាញវា គួបផ្សំនឹងទឹកទន្លេ ទើបឡើងបន្តិចបន្តួចផងនោះ ពូជមច្ឆជាតិនឹងត្រូវវិនាសសាបសូន្យជាមិនខានឡើយ ៕
ចែករំលែកព័តមាននេះ