ខេត្តស្វាយរៀង ៖ ជំងឺសាទឹកនិងបូសខ្យល់ បណ្តាលឲ្យគោក្របីងាប់ចំនួន៤៩ក្បាលជាបន្តបន្ទាប់ និងឈឺជាង២៥០ក្បាល ក្នុងនោះនៅឃុំទួលស្តី និងឃុំសំរោង ស្រុកចន្ទ្រា មានគោក្របីងាប់៣៥ក្បាល ឈឺជិត២០០ក្បាល…
ខេត្តស្វាយរៀង ៖ ជំងឺសាទឹកនិងបូសខ្យល់ បណ្តាលឲ្យគោក្របីងាប់ចំនួន៤៩ក្បាលជាបន្តបន្ទាប់ និងឈឺជាង២៥០ក្បាល ក្នុងនោះនៅឃុំទួលស្តី និងឃុំសំរោង ស្រុកចន្ទ្រា មានគោក្របីងាប់៣៥ក្បាល ឈឺជិត២០០ក្បាល និងនៅភូមិបាយ៉ាប ឃុំប្រាសាក់ ស្រុកស្វាយជ្រំមានគោក្របីឈឺ៥៣ក្បាល និងងាប់១៤ក្បាល ដោយសារជំងឺសាទឹក ។ មូលហេតុមិនបានចាក់វ៉ាក់សាំង មុនពេលភ្លៀងធ្លាក់ដើមរដូវវស្សា ។
លោក ប៉ែន ចន្ធី ប្រធានការិយាល័យផលិតកម្មនិងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងនៅថ្ងៃទី១ ខែកញ្ញា ឆ្នាំ២០២០ថា មានគោក្របីរបស់ប្រជាពលរដ្ឋនៅឃុំប្រាសាក់ ស្រុកស្វាយជ្រំ ចាប់ផ្តើមឈឺតាំងពីថ្ងៃទី១៥ ខែសីហា ឆ្នាំ២០២០ និងទើបតែថ្ងៃទី២៨ ខែសីហា បានរាយការណ៍មកដល់មន្ត្រីជំនាញ ចុះទៅមើលឃើញគោក្របីឈឺ៥៣ក្បាល ហើយបានព្យាបាលជាសះស្បើយ៣៩ក្បាល និងគ្មានឈឺទៀតទេ ។
លោកបន្តថា ក្រៅពីឈឺ៥៣ក្បាល គោក្របីរបស់ពលរដ្ឋតំបន់នេះបានងាប់ចំនួន១៤ក្បាល ។ដោយឃើញពីបញ្ហានេះ ខាងអគ្គនាយកដ្ឋានបានចុះមកពិនិត្យតាមដាន ផ្តល់ថ្នាំ ចែកថ្នាំ និងចាក់វ៉ាក់សាំងដល់គោក្របីមិនទាន់ឈឺ ដើម្បីកុំឲ្យសត្វឈឺនិងឆ្លងទៅសត្វផ្សេងទៀត ក្នុងនោះបានចាក់វ៉ាក់សាំងដល់គោក្របីបានចំនួន២.៧១២ក្បាល ក្នុងចំណោមសត្វសរុប៤.០៤៨ក្បាល ។
លោកប្រធានការិយាល័យបន្ថែមថា ដោយឡែកនៅឃុំទួលស្តី និងឃុំសំរោង ស្រុកចន្ទ្រា មិនមានគោក្របីឈឺទៀតទេ ហើយមន្ត្រីជំនាញចាក់វ៉ាក់សាំងបាន២.៧៦៧ក្បាល ក្នុងចំណោមសត្វសរុប៣.៨១៤ក្បាល ។ កន្លងមក នៅឃុំទាំង២នេះ មានគោក្របីងាប់៣៥ក្បាល ហើយឈឺជិត២០០ក្បាល តែមកដល់ថ្ងៃទី១ ខែកញ្ញា បានព្យាបាលជាសះស្បើយអស់ហើយ ។
មូលហេតុនាំឲ្យគោក្របីមានជំងឺច្រើនរហូតងាប់ជាបន្តបន្ទាប់នេះ ដោយសារប្រជាពលរដ្ឋជាម្ចាស់គោក្របីរាយការណ៍យឺតយ៉ាវ និងម្យា៉ងចំថ្ងៃឈប់សម្រាកសងថ្ងៃបុណ្យចូលឆ្នាំទៀតចំណែកគោក្របីឈឺហើយឆ្លងគ្នាដោយសារប្រជាពលរដ្ឋមានកន្លែងឃ្វាលតែមួយ ។
ទោះបីជាយ៉ាងណា មន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទខេត្ត បានសហការជាមួយមន្ត្រីជំនាញនៃនាយកដ្ឋានផលិតកម្ម និងបសុព្យាបាល ចុះមកជួយអន្តរាគមន៍ពិនិត្យ និងព្យាបាល ព្រមទាំងចាក់វ៉ាក់សាំងដល់គោក្របី មិនទាន់មានជំងឺកុំឲ្យឈឺបន្តទៀត ៕
ចែករំលែកព័តមាននេះ