រាជធានីភ្នំពេញ ៖ ជាមួយនឹងការរីកចម្រើននាពេលបច្ចុប្បន្ន តម្រូវការ និងរបៀបរស់នៅរបស់ប្រជាជនកម្ពុជាក៏បាននឹងកំពុងធ្វើឱ្យមានការផ្លាស់ប្តូរគួរឱ្យកត់សម្គាល់ដែលការផ្លាស់ប្តូរខ្លះបានបង្កជាបញ្ហាជាច្រើនមិនថា បញ្ហាសង្គម ឫបញ្ហាបរិស្ថាន ។
បញ្ហាទាំងនេះ ភាគច្រើនកើតចេញពីរបៀបរស់នៅរបស់បុគ្គលនីមួយៗ ដែលមានតម្រូវការលើសកំណត់ និងមានការគិតមិនទាន់ស៊ីជម្រៅអំពីផលប៉ះពាល់ដែលបណ្តាលមកពីការមើលរំលងទៅលើសកម្មភាពតូចៗ ដែលខ្លួនបានប្រព្រឹត្ត ហើយជះឥទ្ធិពលអវិជ្ជមានទៅដល់សុខុមាលភាពរបស់ភពផែនដី ។ ដោយសង្កេតឃើញ និងចង់បង្កើតឱកាសឱ្យមានជាវេទិកាសម្រាប់បង្ហាញក៏ដូចជា ពិភាក្សាអំពីបញ្ហាទាំងនេះទៅកាន់ប្រជាជនកម្ពុជាអេកូយុវទូតបាននឹងកំពុងបង្កើតគម្រោងថ្មីមួយមានឈ្មោះថា «ដេកគិត» ដែលជាប្រព័ន្ធបណ្ដាញផ្សព្វផ្សាយសង្គម (Multimedia platform) សម្រាប់ធ្វើការបង្ហាញដល់ប្រជាជនកម្ពុជាឱ្យចាប់អារម្មណ៍ទៅលើចំនុចតូចៗដែលនាំឲ្យមានការប្រែប្រួលបែបអវិជ្ជមានទៅលើភពផែនដីរបស់យើង ។
តាមរយៈការបកស្រាយរបស់អ្នកគ្រប់គ្រងកម្មវិធីវ័យក្មេងលោកប្រាជ្ញ សឹង្ហជាលី ប្រធានកម្មវិធីអប់រំផ្សព្វផ្សាយចំណេះដឹងបរិស្ថាននៃអេកូយុវទូតកម្ពុជាបានឱ្យដឹងនៅថ្ងៃទី២ ខែកញ្ញា ឆ្នាំ២០២០ថា «ផែនដី គឺជាផ្ទះតែមួយគត់របស់យើង ដូចនេះបញ្ហារបស់ភពផែនដី គឺជាទំនួលខុសត្រូវរបស់យើងទាំងអស់គ្នា ។ វាគួរតែដល់ពេលហើយ ដែលយើងត្រូវចេះគិតគូរពីរសកម្មភាពតូចៗដែលយើងមើលរំលង តែវាបានបង្កជាគ្រោះថ្នាក់ដល់សុខភាពរបស់ភពផែនដីមួយនេះ» ។
លោកបានបន្តថា មិនតែប៉ុណ្ណោះ «ដេកគិត» ក៏ចង់បង្ហាញអោយប្រជាជនកម្ពុជាយល់ដឹងអំពីឫសគល់នៃបញ្ហាក៏ដូចជា សិក្សាបន្ថែមពីដំណោះស្រាយបែបស៊ីជម្រៅដែលមានភាពសមស្របក្នុងការយកមកអនុវត្តជាក់ស្តែង ក្នុងបរិបទរស់នៅរបស់ប្រជាជនកម្ពុជានាពេលបច្ចុប្បន្នផងដែរ ។
ការចង់ដឹង ចង់លឺនូវអ្វីថ្មីៗរបស់យុវជន ជាហេតុនាំឲ្យ «ដេកគិត» ជឿជាក់ថា ក្រុមយុវជនដែលមានអាយុចាប់ពី១៥ឆ្នាំ ដល់២៥ឆ្នាំ គឺជាកតាលិករដ៏សំខាន់ក្នុងការធ្វើអោយគោលបំណងរបស់ ដេកគិត ទទួលបានជោគជ័យ តាមរយៈមាតិការឌីជីថលរបស់ខ្លួន ។ ដោយមើលឃើញពីតម្រូវការរបស់ក្រុមគោលដៅ និងដើម្បីឆ្លើយតបទៅនឹងគោលបំណងខាងលើ ដេកគិត នឹងធ្វើការផលិតជាមាតិការឌីជីថលថ្មីៗ ក្នុងរូបភាពជាវីដេអូស៊េរី អត្ថបទពង្រឹងចំណេះដឹង និងរូបភាពក្រាហ្វិចអប់រំផ្សេងៗ ដែលសុទ្ធសឹងជាជំនួយសម្រាប់ក្រុមគោលដៅ ក្នុងការសិក្សាបន្ថែមអំពីប្រធានបទនីមួយៗដែលនឹងនិយាយអំពីទម្លាប់រស់នៅ ដែលនាំអោយមានផលប៉ះពាល់អវិជ្ជមានរបស់យើងទាំងអស់គ្នា ។
«ដេកគិត» សង្ឃឹមថា អ្នកទាំងអស់គ្នានឹងទទួលបានផលប្រយោជន៍ពីមាតិកាដែលដេកគិត និងផ្ដល់ឲ្យ ដើម្បីជាការដាស់អារម្មណ៍ឲ្យប្រជាជនកម្ពុជា ជាពិសេសយុវជនជំនាន់ថ្មីទទួលយកក៏ដូចជា ស្វែងយល់បន្ថែមអំពីរបៀបរស់នៅដែលប្រកបដោយនិរន្តភាព និងសន្តិភាពរវាងមនុស្ស និងធម្មជាតិនាពេលអនាគត ៕
ចែករំលែកព័តមាននេះ