ខេត្តកំពង់ឆ្នាំង ៖ ក្រោយពីផ្ទុះបាតុភាពដ៍អាក្រក់ ផ្អើលពេញបណ្តាញសង្គម រវាងភាគីម្ខាង ជាកូនប្រុសលោកឧកញ៉ាកៅ បានទាញកាំភ្លើងអាកា ស្វាយបត់ AK47 ពីក្នុងរថយន្តម៉ាស្តា គំរាមភាគីម្ខាងទៀត ជាអ្នកបើកម៉ូតូ គ្រាន់តែជម្លោះពាក្យសម្តីតិចតួច នៅតាមដងផ្លូវរួចមក ត្រូវសមត្ថកិច្ចនគរបាលជំនាញតាមចាប់ខ្លួនបាន នៅរំលងអាធ្រាតុ ក្នុងខេត្តកំពង់ឆ្នាំង ។
បើតាមលោកឧត្ដមសេនីយ៍ទោ ខូវ លី ស្នងការ នៃស្នងការដ្ឋាននគរបាលខេត្តកំពង់ឆ្នាំង បានអោយកោះសន្តិភាពដឹងថា បន្ទាប់ពីទទួលបានព័ត៌មាននេះភ្លាម លោកបានចេញបញ្ជាឲ្យកម្លាំងសមត្ថកិច្ច តាមស្រាវជ្រាវក្នុងរឿងនេះ រហូតឈានដល់ការចាប់ខ្លួនកូនប្រុសលោកឧកញ៉ាបាន នៅវេលាម៉ោងជាង១រំលងអាធ្រាតុ ឈានចូលថ្ងៃទី០១ ខែកញ្ញា ឆ្នាំ២០២០ ពីបទ កាន់កាប់ដឹកជញ្ជូនអាវុធដោយគ្មានការអនុញ្ញាត និងគំរាមកំហែងភាគីម្ខាង ជាសាធារណៈ ។
សូមរម្លឹកថា កូនប្រុសលោកឧកញ៉ា ទាញកាំភ្លើង AK គំរាមបុរសម្នាក់ជិះម៉ូតូនៅខេត្តកំពង់ឆ្នាំង នៅវេលាម៉ោង៤ និង៤៥នាទី រសៀលថ្ងៃទី៣១ ខែសីហា ឆ្នាំ២០២០ នៅចំណុចផ្លូវចូលចម្ការអំពៅ របស់ក្រុមហ៊ុនលោកឧកញ៉ា ញ៉ឹក ផន (ហៅកៅ) ស្ថិតក្នុងភូមិថ្នល់កែង ឃុំក្បាលទឹក ស្រុកទឹកផុស ខេត្តកំពង់ឆ្នាំង មានជម្លោះពាក្យសម្តីគ្នា រវាងឈ្មោះ ញឹក ផល អាយុ៣៨ឆ្នាំ មានទីលំនៅភូមិថ្នល់កែង ឃុំក្បាលទឹកស្រុកទឹកផុស ដែលគេស្គាល់ថា ជាកូនប្រុសរបស់លោកឧកញ៉ា ញឹក ផន (ហៅកៅ) ជាមួយនឹងភាគីម្ខាងទៀត ឈ្មោះ ប្រាក់ សំបាន ដែលជាអ្នកជិៈម៉ូតូ ។
ក្នុងហេតុការជម្លោះពាក្យសំដីនោះ ឈ្មោះ ញឹក ផល បានឈានដល់ទាញយកកាំភ្លើងអាកា ពីក្នុងរថយន្តម៉ាកម៉ាស្តា ពាក់ស្លាកលេខ ភ្នំពេញ 2AD.0819 មកគំរាមភាគីអ្នកជិៈម៉ូតូ ធ្វើឱ្យមានការភ្ញាក់ផ្អើលជាខ្លាំងក្នុងបណ្តាញសង្គម ព្រោះតែភាគីអ្នកជិៈម៉ូតូឈ្មោះ ប្រាក់ សំបាន បានថតសកម្មភាពរបស់ឈ្មោះ ញឹក ផល ដែលបានយកកាំភ្លើងពីក្នុងរថយន្តមកគំរាមខ្លួន ហើយបានបង្ហោះតគ្នាពេញបណ្តាញសង្គម ។
ក្រោយពីទទួលបាននូវព័ត៌មាននេះភ្លាមលោក ខូវ លី ស្នងការនគរបាលខេត្តកំពង់ឆ្នាំង បានចាត់កម្លាំងមន្ត្រីជំនាញ សហការជាមួយនគរបាលស្រុកទឹកផុស ចុះស្រាវជ្រាវ ទើបឈានដល់ការចាប់ខ្លួន ឈ្មោះ ញឹក ផល ដែលជាអ្នកប្រើប្រាស់អាវុធ អាកា គំរាមទៅលើភាគីទំនាស់ ។
យោងតាមប្រភពពីមន្ត្រីនគរបាលខេត្តបានខ្សឹបប្រាប់កោះសន្តិភាពឲ្យដឹងថា ជនឈ្មោះ ញឹក ផល មានរហ័សនាម ក្នុងចំការអំពៅ ថា(០៩) ជាកូនលោកឧកញ៉ា ញឹក ផន ហៅកៅ បានឆ្លើយបំភ្លឺចំពោះមុខសមត្ថកិច្ចថា «ខ្លួនជាជនស៊ីវិល ចំណែកអាវុធ ដែលខ្លួនបានកាន់នោះ គឺរើសបានទេ! ហើយខ្លួនពុំមានតួនាទីកាន់អាវុធឡើយ» ។
ចំពោះដើមចម ជនឈ្មោះ ញឹក ផល បានប្រាប់ថា ដើមហេតុ មុនមានជម្លោះពាក្យសម្តីនៅតាមដងផ្លូវ ដោយសារខ្លួនឃើញភាគីអ្នកជិៈម៉ូតូស្រវឹង សូមបើកបរឲ្យប្រយ័ត្ន ។
ជុំវិញបញ្ហានេះ ភាគីឈ្មោះ ប្រាក់ សំបាន កោះសន្តិភាពមិនអាចសុំការបំភ្លឺបានទេ តែមានគេស្គាល់ថា ឈ្មោះនេះ ជាកូនចៅរបស់អ្នកសារព័ត៌មាន K.01 ។ ចំណែកមូលហេតុពិតយ៉ាងណា នៅមិនទាន់ច្បាស់នៅឡើយទេ ពោលគឺត្រូវរងចាំសមត្ថកិច្ច ធ្វើការកោះហៅឈ្មោះ ប្រាក់ សំបាន មកសាកសួរសិន ។
តាមការបញ្ជាក់របស់អ្នកច្បាប់ អោយដឹងថា ឈ្មោះ ញឹក ផល ជាកូនប្រុសលោកឧកញ៉ា ញឹក ផន ហៅកៅ អាចប្រឈមចំពោះមុខច្បាប់ ក្នុងបទ (គំរាមកំហែង និងកាន់កាប់ដឹកជញ្ជូនអាវុធដោយគ្មានការអនុញាត) ៕
កាំភ្លើងAK កូនប្រុសលោកឧកញ៉ា ឆ្លើយថា រើសបាន! ករណីគំរាមបុរសម្នាក់ជិះម៉ូតូ(វីដេអូ)
កូនប្រុសលោកឧកញ៉ា ទាញកាំភ្លើង AK គំរាមបុរសម្នាក់ជិះម៉ូតូនៅខេត្តកំពង់ឆ្នាំង
ចែករំលែកព័តមាននេះ