ខេត្តប៉ៃលិន ៖ រហូតមកដល់ព្រឹកថ្ងៃទី៣០ ខែសីហា ឆ្នាំ២០២០ គេសង្កេតឃើញកសិករម្នាក់ដែលប្រកបរបរដាំដំណាំហូបផ្លែតាង៉ែន ហៅមៀនប៉ៃលិន មួយកន្លែង ស្ថិតនៅក្នុងភូមិចំការកាហ្វេ សង្កាត់ទួលល្វា…
ខេត្តប៉ៃលិន ៖ រហូតមកដល់ព្រឹកថ្ងៃទី៣០ ខែសីហា ឆ្នាំ២០២០ គេសង្កេតឃើញកសិករម្នាក់ដែលប្រកបរបរដាំដំណាំហូបផ្លែតាង៉ែន ហៅមៀនប៉ៃលិន មួយកន្លែង ស្ថិតនៅក្នុងភូមិចំការកាហ្វេ សង្កាត់ទួលល្វា ក្រុងប៉ៃលិន ខេត្តប៉ៃលិន មានការសប្បាយរីករាយយ៉ាងខ្លាំង ខណ:តម្លៃទីផ្សារដំណាំមួយនេះហក់ឡើងខ្ពស់ជាងមុន ។
បើតាមប្រភពពីស្ត្រីម្នាក់ឈ្មោះ ផន សុភ័ណ្ឌ អាយុ៤៦ឆ្នាំ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ជាអ្នកម៉ៅចម្ការខាងលើ បានរៀបរាប់ឱ្យដឹងថា រហូតមកដល់ពេលនេះ តម្លៃទីផ្សារ ផ្លែតាង៉ែន ហៅមៀនប៉ៃលិន ដែលគាត់បេះលក់ឱ្យគេ ដើម្បីយកទៅសែនក្បាលទឹក គឺបានថ្លៃខ្ពស់ជាងមុន ដោយ១គីឡូក្រម អាចលក់បានរហូតដល់៤០០០រៀល ហើយគាត់គិតថា តម្លៃនេះ គឺហក់ខ្ពស់ជាងមុន ព្រោះប៉ុន្មានឆ្នាំចុងក្រោយនេះ ឈ្មួញដើរទិញផ្លែតាង៉ែនត្រឹមតែ១គីឡូក្រាម២៥០០ ទៅ៣០០០រៀលប៉ុណ្ណោះ ។
ប្រភពបន្តទៀតថា គាត់ដើរម៉ៅទិញផ្លែតាង៉ែននេះ ក្នុងចម្ការប្រជាពលរដ្ឋរស់នៅក្នុងភូមិខាងលើ តម្លៃ៩លានរៀល ដែលមានជាង៣០០ដើម ហើយក្នុង១ដើម អាចប្រមូលផល បានប្រហែល៥០គីឡូក្រាម លុះពេលទុំល្អ គាត់ក៏ទាក់ទងម៉ូយរស់នៅតាមបណ្តាខេត្តនានា ដូចជា បាត់ដំបង សៀមរាប កំពង់ឆ្នាំង កំពង់ចាម និងរាជធានីភ្នំពេញ ដើម្បីមកទិញដឹកយកទៅលក់បន្តផងដែរ ។
គាត់បញ្ជាក់ថា ការដើរម៉ៅទិញផ្លែឈើនៅតាមចម្ការបែបនេះ គឺមិនសូវខាតប៉ុន្មាននោះទេ បើសិនជាតម្លៃទីផ្សារឡើងខ្ពស់ នោះគាត់នឹងមានការចំណេញច្រើន ។ តែបើធ្លាក់ចុះដូចសព្វដង គាត់ក៏មានការខាតបង់តិចតួចដែរ ។ ប៉ុន្តែគាត់មិនបោះបង់ចោលមុខរបរមួយនេះឡើយ ហើយជារៀងរាល់ថ្ងៃ គាត់មិនជួលកម្មករច្រើននោះទេ គឺនាំប្តីហើយនឹងកូន ព្រមទាំងជួលបងប្អូនជិតខាង២ទៅ៣នាក់ ឱ្យជួយបេះផ្លែតាង៉ែនទុំ ដាក់កញ្ឆេលក់ឱ្យម៉ូយ និងដឹកយកទៅលក់បន្តទៀត ។
សូមបញ្ជាក់ផងដែរថា ក្រោយពីដំណាំតាង៉ែន ហៅមៀនប៉ៃលិន មានការធ្លាក់ថ្លៃជាងមុន ធ្វើឱ្យប្រជាពលរដ្ឋមួយចំនួនរស់នៅក្នុងខេត្តប៉ៃលិន បោះបង់ចោលមុខរបរមួយនេះ ដោយបែរទៅដាំដំណាំផ្សេងទៀត ដែលមានតម្លៃខ្ពស់ ។ ចំណែកអ្នកខ្លះទៀត នៅក្នុងចម្ការរបស់ខ្លួនដាំចេករាប់ពាន់ដើម លុះដំណាំចេកធ្លាក់ថ្លៃ ក៏បែរទៅដាំដំណាំតាង៉ែន និងស្វាយកែវរមៀត ។ ប៉ុន្តែរហូតមកដល់ពេលនេះ បែរជាផ្លែចេកមានការស្ទុះឡើងថ្លៃខ្ពស់គួរឱ្យកត់សម្គាល់ ដោយកាលពីមុនផ្លែចេក១ស្និតគេលក់ត្រឹមតែ១០០០ទៅ១៥០០រៀលប៉ុណ្ណោះ ។
តែរហូតមកដល់ពេលនេះ ផ្លែចេក១ស្និតគេលក់ក្នុងតម្លៃខ្ពស់ រហូតដល់២៥០០ទៅ៣០០០រៀលឯណោះ ហើយក៏រកចេកលក់ស្ទើរតែអត់មានដែរ ដោយសារតែគេកាប់ដើមចេកចោលខ្ទេចខ្ទីអស់ បែរទៅដាំដំណាំផ្សេងទៀត ដែលមានតម្លៃខ្ពស់ ហើយប្តូរចុះប្តូរឡើងដេញតាមតម្លៃទីផ្សារ បណ្តាលឱ្យខាតពេលវេលាផងដែរ ៕
ចែករំលែកព័តមាននេះ