ខេត្តស្ទឹងត្រែង ៖ បើតាមសេចក្តីរាយការណ៍បានឱ្យដឹងថា មនុស្សចំនួន៤នាក់ត្រូវបានចាប់ខ្លួនដោយកម្លាំងសមត្ថកិច្ចចម្រុះ ខណៈពេលកំពុងធ្វើសកម្មភាពប្រើប្រាស់ឧបករណ៍ឆក់ត្រីខុស ច្បាប់នៅតំបន់អភិរក្ស កាលពីថ្ងៃ២៩ និងថ្ងៃទី៣០ ខែសីហា ឆ្នាំ២០២០…
ខេត្តស្ទឹងត្រែង ៖ បើតាមសេចក្តីរាយការណ៍បានឱ្យដឹងថា មនុស្សចំនួន៤នាក់ត្រូវបានចាប់ខ្លួនដោយកម្លាំងសមត្ថកិច្ចចម្រុះ ខណៈពេលកំពុងធ្វើសកម្មភាពប្រើប្រាស់ឧបករណ៍ឆក់ត្រីខុស ច្បាប់នៅតំបន់អភិរក្ស កាលពីថ្ងៃ២៩ និងថ្ងៃទី៣០ ខែសីហា ឆ្នាំ២០២០ នេះ។
តាមការបញ្ជាក់ពីមន្ត្រីជលផលខេត្តបានឱ្យដឹងថា កម្លាំងចម្រុះ រួមមាននគរបាលប៉ុស្តិ៍ឆ្មាំទន្លេ ព្រមទាំងនគរបាលការពារព្រំដែន បានឃាត់ខ្លួនក្រុមជនសង្ស័យក្នុងពេលកំពុងធ្វើសកម្មភាពប្រើប្រាស់ឧបករណ៍ឆក់ត្រីខុសច្បាប់ រយៈពេលពីរថ្ងៃមកនេះ។
មន្ត្រីដដែលបន្តថា ក្រុមជនសង្ស័យខាងលើ មាន ទី១-មានគ្នាចំនួន២នាក់បានប្រើឧបករណ៍ឆក់ប្រព្រឹត្តនៅភូមិច្រប់ ឃុំក្បាលរមាស ស្រុកសេសាន កាលពីថ្ងៃទី៣០ ខែសីហា ។ ហើយត្រូវកម្លាំងចម្រុះបានដកហូតវត្ថុតាងរួមមាន ក្បាលឆក់មួយគ្រឿង អាគុយមួយគ្រឿង និងត្រីប្រមាណជាង២០គីឡូក្រាម។
ប្រភពដដែលបន្តថា ជនសង្ស័យទាំង២នាក់មានម្នាក់ ឈ្មោះ អិន រតនា ភេទប្រុស អាយុ២០ឆ្នាំ និងម្នាក់ទៀតឈ្មោះ ផាត ម៉ល់ ភេទប្រុស អាយុ២៦ឆ្នាំ អ្នកទាំងពីរ រស់នៅភូមិឃុំខាងលើ។
ដោយឡែកក្រុមជនសង្ស័យ ទី២.មានគ្នាចំនួន២នាក់បានប្រើឧបករណ៍ត្រីខុសច្បាប់នៅចំណុចអូរនាងខ្មៅ ព្រំប្រទល់ខេត្តស្ទឹងត្រែង និងខេត្តព្រះវិហារ កាលពីព្រឹកថ្ងៃទី២៩ ខែ សីហា ២០២០។
ក្រោយការឃាត់ខ្លួន សមត្ថកិច្ចចម្រុះបានដកហូតក្បាលឆក់មួយគ្រឿង អាគុយកម្លាំង៤០អំពែមួយគ្រឿង និងម៉ូតូហុងដា ពណ៌ខ្មៅ សេរីឆ្នាំ២០១២មួយគ្រឿងផងដែរ។ ក្រុមនេះមានម្នាក់ឈ្មោះ ប៉ុក ធឿន ភេទប្រុស អាយុ៤២ឆ្នាំ មានស្រុកកំណើតនៅភូមិសូប៉េង ឃុំវត្តអង្គ ស្រុកបន្ទាយមាស ខេត្តកំពត បច្ចុប្បន្នស្នាក់នៅបណ្តោះអាសន្នភូមិកំពង់ព្រះឥន្ធ ឃុំស្រឡៅពីរ ស្រុកឆែប ខេត្តព្រះវិហារ និងម្នាក់ទៀតឈ្មោះ ញ៉ាន ស៊ី ភេទប្រុស អាយុ២៤ឆ្នាំ មានស្រុកកំណើតនៅភូមិសូប៉េង ឃុំវត្តអង្គ ស្រុកបន្ទាយមាស ខេត្តកំពត បច្ចុប្បន្នស្នាក់នៅបណ្តោះអាសន្នភូមិកំពង់ព្រះឥន្ធ ឃុំស្រឡៅពីរ ស្រុកឆែប ខេត្តព្រះវិហារ។
ក្រោយការឃាត់ខ្លួនក្រុមជនសង្ស័យខាងលើ កម្លាំងសមត្ថកិច្ចចម្រុះបាននាំខ្លួនមកកាន់ប៉ុស្តិ៍រដ្ឋបាលជលផល សាកសួរ និងកសាងសំណុំរឿងបញ្ជូនទៅសាលាដំបូង ដើម្បីបន្តតាមនីតិវិធី៕
ចែករំលែកព័តមាននេះ