ខេត្តបន្ទាយមានជ័យ ៖ គ្រោះអគ្គិភ័យមួយបានកើតឡើងកាលពីវេលាម៉ោងប្រមាណ
១១យប់ថ្ងៃទី២៨ ខែសីហា ឆ្នាំ២០២០ នៅភូមិរហាល ឃុំរហាល ស្រុកព្រះនេត្រព្រះ បណ្តាលឲ្យផ្ទះ១ខ្នង ធ្វើអំពីឈើលើថ្មក្រោម ខូចខាតអស់ស្ទើរទាំងស្រុង ។
លោកវរសេនីយ៍ឯក មាស ឫទ្ធី អធិការនគរបាលស្រុកព្រះនេត្រព្រះ បានឲ្យដឹងថា ក្រោយពីទទួលបានព័ត៌មានពីគ្រោះអគ្គិភ័យនេះ លោកបានដឹកនាំកម្លាំងនគរបាលស្រុកនិងប៉ុស្តិ៍ និងរថយន្តពន្លត់អគ្គិភ័យ១គ្រឿងទៅជួយអន្តរាគមន៍ពន្លត់ ដោយមានការចូលរួមពីប្រជាពលរដ្ឋផងដែរ ។
ផ្ទះដែលរងគ្រោះដោយអគ្គិភ័យនេះមានទំហំ០ម៉ែត្រ ទទឹង៧ម៉ែត្រ ធ្វើពីឈើប្រក់ស័ង្កសី ជញ្ជាំងក្តារ ថ្មក្រោម មានម្ចាស់ផ្ទះឈ្មោះ ស្មុក មុំ ភេទស្រី អាយុ៤៧ឆ្នាំ ជាស្ត្រីមេម៉ាយ រស់នៅជាមួយចៅតូចៗ ។
លោកអធិការបញ្ជាក់ថា តាមការរៀបរាប់ របស់ស្ត្រីជាម្ចាស់ផ្ទះ នៅមុនពេលកើតហេតុ រូបគាត់និងចៅៗចំនួន៣នាក់ដេកនៅខាងក្រោម ចំណែកខាងលើគ្មានមនុស្សដេកទេ ។ ឯភ្លើងបានចាប់ផ្តើមឆេះពីខាងលើ រួចធ្លាក់រងើកភ្លើងមកខាងក្រោមត្រូវចង្ក្រានហ្គាសផ្ទុះឆេះកាន់តែខ្លាំង ហើយគាត់និងចៅតូចៗនាំគ្នារត់ចេញមកក្រៅផុតពីគ្រោះថ្នាក់ ដោយមិនបានយកអ្វីទាន់នោះឡើយ ។
ចំពោះសម្ភារនិងទ្រព្យសម្បត្តិនៅក្នុងផ្ទះ មានប្រាក់ចំនួន១៥ម៉ឺនបាត លោហធាតុពណ៌លឿង មួយ១វង់ទម្ងន់៥ជី ម៉ាស៊ីនត្រជាក់១គ្រឿង ទូទឹកកក១គ្រឿង ចង្ក្រានហ្គាស៣ គ្រែដេក១ និងសម្ភារប្រើប្រាស់មួយចំនួនទៀត ត្រូវភ្លើងឆេះអស់ទាំងស្រុង ។
លោកអធិការបញ្ជាក់ថា ផ្ទះត្រូវខូចខាតអស់ប្រមាណ៨០% ហើយតាមការសន្និដ្ឋានជំហានដំបូង គឺបណ្តាលមកពីទុស្សខ្សែភ្លើងនៅផ្ទះឈើខាងលើ បន្ទាប់មកក៏ធ្លាក់ដុំភ្លើងមកក្រោមត្រូវនឹងចង្ក្រានហ្គាស បង្កឲ្យកាន់តែឆាបឆេះខ្លាំងឡើង ។ ពេលរថយន្តពន្លត់អគ្គិភ័យទៅដល់ ភ្លើងបានឆាបឆេះសន្ធោសន្ធៅទៅហើយ ហើយយើងបានបាញ់ទឹកអស់១រថយន្តទើបអាចគ្រប់គ្រងស្ថានការណ៍បាន និងមិនរាលដាលដល់ផ្ទះអ្នកជិតខាង។
ទោះជាយ៉ាងណា ក្នុងគ្រោះអគ្គិភ័យនេះពុំបណ្តាលឲ្យរងគ្រោះថ្នាក់ដល់ម្ចាស់ផ្ទះឡើយ គឺខូចខាតតែផ្ទះ ទ្រព្យសម្បត្តិមួយចំនួន និងសម្ភារប្រើប្រាស់ក្នុងផ្ទះតែប៉ុណ្ណោះ ៕
ចែករំលែកព័តមាននេះ