ខេត្តបន្ទាយមានជ័យ ៖ ឯកឧត្តមឧត្តមសេនីយ៍ទោ អាត់ ខែម ទីប្រឹក្សាក្រសួងមហាផ្ទៃ ជាស្នងការនគរបាលខេត្ត និងជាប្រធានក្រុមការងារខ២៧ ចុះជួយស្រុកស្វាយចេក ក្នុងឱកាសជួបសំណេះសំណាលជាមួយសមាជិកបក្សឃុំ ភូមិ នាថ្ងៃទី៣០ ខែសីហា ឆ្នាំ២០២០ នៅស្នាក់ការគណបក្សស្រុកស្វាយចេក ខេត្តបន្ទាយមានជ័យ បានផ្តាំផ្ញើដល់ប្រធាន បក្សឃុំ ភូមិ ទាំងអស់ដែលជាអាជ្ញាធរមូលដ្ឋាន ត្រូវធ្វើតែអំពើល្អដល់ប្រជាពលរដ្ឋដោយមិនប្រកាន់និន្នាការនយោបាយ នោះឡើយ នៅក្នុងមូលដ្ឋានដែលខ្លួនគ្រប់គ្រងដោយរាប់ទាំងអត្តចរិត អាកប្បកិរិយា សីលធម៌ ពាក្យសម្ដីនិយាយទៅ កាន់ពួកគាត់។
ជាងនេះទៀតគឺត្រូវយកចិត្តទុកដាក់ជួយគាត់នៅពេលដែលគាត់ត្រូវការឲ្យយើងជួយ ក្នុងពេលដែលគាត់ មានធុរៈពិសេសគឺការបម្រើសេវាសាធារណៈជូនគាត់ឲ្យបានទាន់ពេលវេលា។ ត្រូវធ្វើយ៉ាងណាឲ្យប្រជាពលរដ្ឋមាន ជំនឿជឿជាក់មកលើអាជ្ញាធរភូមិ ឃុំ ដូចមេបក្សភូមិ ឃុំ នោះផងដែរ។ ជាមួយគ្នានោះដែរ ឯកឧត្តម ប្រធានក្រុមការងារ ខ២៧ ចុះជួយស្រុកស្វាយចេក ថ្លែងនូវអំណរគុណដល់ក្រុមការងារទាំងអស់ក៏ដូចជាមេបក្ស ឃុំ ភូមិ ដែលបានយក អស់ស្មារតីខិតខំបំពេញភារកិច្ចតាមមុខងារ និងតួនាទីរបស់ខ្លួនបានល្អប្រសើរកន្លងមក។
ជាងនេះទៀតខេត្តបន្ទាយមានជ័យ មានឯកឧត្តមនាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានក្រុម ការងារថ្នាក់ជាតិ ចុះជួយខេត្តបន្ទាយមានជ័យ និងលោកជំទាវ ម៉ៅ ម៉ាល័យ កែគឹមយ៉ាន បានយកចិត្តទុកដាក់ ក្នុងការកសាងនូវសមិទ្ធផលជាច្រើន នៅក្នុងខេត្តនិយាយជារួម និងនិយាយដោយឡែក ក្នុងស្រុកស្វាយចេកយើងនេះ ក៏មានមានស្នាដៃដ៏ធំធេងបានកសាងនូវសមិទ្ធផលជាច្រើនរបស់ឯកឧត្តមប្រធានក្រុមការងារ និងលោកជំទាវផងដែរ។
ដែលសមិទ្ធផលទាំងអស់នោះគឺផ្តើមចេញពីថ្នាក់ដឹកនាំរបស់គណបក្សប្រជាជនកម្ពុជា ជាអ្នកកសាងដើម្បី ផលប្រយោជន៍រួមរបស់ប្រជាពលរដ្ឋ គឺផ្ទុយស្រឡះពីគណបក្សណាផ្សេងដែលបានតែនិយាយបានតែថា តែមិនដែលបានជួយធ្វើអ្វីដល់សង្គមជាតិឲ្យមានការរីកចម្រើននោះឡើយ។ ឯកឧត្តមឧត្តមសេនីយ៍ទោ អាត់ ខែម បានគូសបញ្ជាក់ថា៖ ប្រទេសជាតិយើងមានការរីករហូតមកទល់បច្ចុប្បន្ននេះ ដោយសារមានសុខសន្តិភាព ដូច្នេះយើងទាំងអស់សូមអរគុណសន្តិភាព។ សន្តិភាពនេះជាការបានមកដោយពិបាក ដែលសម្តេចតេជោ ហ៊ុន សែន និងឥស្សរជនជាច្រើនទៀតបានយកជីវិតទៅប្តូរ យើងទាំងអស់គ្នាត្រូវតែរួមគ្នាការពាសន្តិភាពនេះ ពិសេសគឺគោល នយោបាយឈ្នះឈ្នះ របស់សម្តេចតេជោ ហ៊ុន សែន ប្រធានគណបក្ស និងជានាយករដ្ឋមន្ត្រី នៃព្រះរាជាណាចក្រកម្ពុជា។
បន្ទាប់គណៈអធិបតីបានប្រគល់ថវិកាចំនួន៥០០ដុល្លារ ជាអំណោយរបស់ឯកឧត្តម នាយឧត្តមសេនីយ៍ឧបនាយករដ្ឋមន្ត្រី កែ គឹមយ៉ាន និងលោជំទាវ នឹងសន្យាជួយ២,០០០បន្ថែមទៀត ក្នុងការចូលរួមស្ថាបនាស្ពាននាគ និងបានចែកជូនជានិមិត្តរូបនូវក្រមា០១ និងថវិកា២ម៉ឺនរៀល ដល់សមាជិក សមាជិកា ដែលមកចូលរួមជាង៣០០នាក់ និងបានឃើញពិនិត្យមើលស្ពាននាគ ដែលធ្វើឆ្លងស្ទឹងស្រុកស្វាយចេក ដែលំពុងសាងសង់ បាន៨០% ជាអំណោយរបស់ ឯកឧត្តមនាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន និងលោកជំទាវផងដែរ៕ ដោយ ៖ ណុប រក្សា
ចែករំលែកព័តមាននេះ